తెలంగాణలో గ్రాడ్యుయేట్ ఎమ్మెల్సీ పోరు.. ఎవరి వ్యూహం ఫలిస్తుంది?

Graduate Elections: తెలంగాణలో మరో ఆసక్తికర రాజకీయం మొదలైంది. రెండు గ్రాడ్యుయేట్ ఎమ్మెల్సీ స్థానాల్లో పదవీ కాలం వచ్చే ఏడాది మార్చి 29తో ముగియనుంది. ఈసారి స్థానాలను కైవసం చేసుకునేందుకు కాంగ్రెస్ హైకమాండ్ సీనియర్ మంత్రులను ఆరు నెలల ముందే రంగంలోకి దింపింది.

మంత్రులకు భాధ్యతలు..

మహబూబ్‌నగర్ – హైదరాబాద్-రంగారెడ్డి రీజియన్ ఇన్‌చార్జ్‌ బాధ్యతలను సీనియర్ మంత్రులు దామోదర రాజనర్సింహ, దుద్దిళ్ల శ్రీధర్ బాబు, పొన్నం ప్రభాకర్‌కు అప్పగించారు. నల్గొండ-ఖమ్మం-వరంగల్ గ్రాడ్యుయేట్ స్థానం బాధ్యతలను ఏకంగా డిప్యూటీ సీఎం భట్టి విక్రమార్క, మంత్రి ఉత్తమ్ కుమార్ రెడ్డి భుజస్కంధాలపై ఉంచింది అధిష్టానం. క్షేత్రస్థాయి నుంచి వ్యూహాత్మకంగా వెళ్లాలనే కాంగ్రెస్ ఆలోచనకు ఈ నియామకాలే నిదర్శనం.

Also Read: తెలంగాణకు వాయుగుండం ఎఫెక్ట్.. ఈ జిల్లాలకు రెడ్ అలర్ట్ జారీ!

రాబోయే రోజుల్లో..

అటు బీజేపీ కూడా ఈ పోరులో వెనక్కి తగ్గడం లేదు. పట్టభద్రులు, ఉద్యోగులు, నిరుద్యోగులు ఎక్కువగా ఉన్న ఈ రెండు నియోజకవర్గాల్లో తమ బలాన్ని చాటుకోవాలని కమలం పార్టీ పట్టుదలతో ఉంది. ఇటు బీఆర్ఎస్ కూడా ఇప్పటినుంచే గ్రాడ్యుయేట్ ఓటర్లను ఆకట్టుకునేందుకు ప్లాన్లు వేస్తోంది. ఆరు నెలల ముందే పార్టీల్లో మొదలైన ఈ కోలాహలం రాబోయే రోజుల్లో రాజకీయాన్ని మరింత వేడెక్కించనుంది. నిరుద్యోగ భృతి, ఉద్యోగ నియామకాలు, విద్యా రంగ సమస్యలే ప్రధాన ఎజెండాగా సాగబోయే ఈ సమరంలో పట్టభద్రులు ఎవరి వైపు నిలుస్తారు? కాంగ్రెస్ మార్క్ వ్యూహాలు ఫలిస్తాయా?