రూటు మార్చిన బీఆర్ఎస్.. జెన్-జి లక్ష్యంగా పాలిటిక్స్.. కేటీఆర్ వ్యూహం ఇదేనా?

KTR Strategy: తెలుగు రాజకీయాల్లో ఎప్పటికప్పుడు సమీకరణాలు మారుతుంటాయి. ఇప్పటివరకు ప్రధానంగా రైతాంగ సమస్యలు, సాగునీరు, ఉచిత విద్యుత్, ధాన్యం కొనుగోళ్లపైనే ప్రధానంగా దృష్టి పెట్టిన భారత్ రాష్ట్ర సమితి (BRS), ఇప్పుడు తన పొలిటికల్ రోడ్‌మ్యాప్‌ను మార్చుకుంటున్నట్లు కనిపిస్తోంది. పార్టీ వర్కింగ్ ప్రెసిడెంట్ కేటీఆర్ నాయకత్వంలో యువత, నిరుద్యోగులే లక్ష్యంగా ఒక కొత్త రాజకీయ వ్యూహానికి బీఆర్ఎస్ తెరతీసింది.

సరూర్ నగర్ సభ.. మారిన బీఆర్ఎస్ రూట్
గతంలో రైతుల కోసం అనేక పోరాటాలు చేసిన బీఆర్ఎస్, ఇటీవల హైదరాబాద్‌లోని సరూర్ నగర్‌లో నిర్వహించిన యువ సంగ్రామ సదస్సుతో తన రాబోయే కార్యాచరణను స్పష్టం చేసింది. ఈ సభకు ఊహించని స్థాయిలో యువకులు, నిరుద్యోగులు హాజరుకావడం గమనార్హం. ప్రభుత్వ హామీలు, ఉద్యోగ నోటిఫికేషన్లు, జాబ్ క్యాలెండర్ అమలుపై అక్కడికి వచ్చిన నిరుద్యోగులు పెద్ద ఎత్తున తమ నిరసనను వ్యక్తం చేశారు. ఈ ప్రజాస్పందనతో బీఆర్ఎస్ పార్టీ యువత సమస్యలనే రాబోయే రోజుల్లో ప్రధాన రాజకీయ అస్త్రంగా మార్చుకోవాలని భావిస్తోంది.

Gen-Z హెచ్చరిక
ఇటీవల నేపాల్‌లో కాక్రోచ్ మూవ్‌మెంట్ పేరుతో యువత చేపట్టిన ఉద్యమం తీవ్ర సంచలనం సృష్టించింది. సరిగ్గా ఈ పరిణామాన్ని కేటీఆర్ తమ పార్టీ వ్యూహానికి జోడించారు. దాదాపు 10 నెలల క్రితం తాను చేసిన ఒక ట్వీట్‌ను రీట్వీట్ చేస్తూ యువత, ముఖ్యంగా ‘Gen-Z’ ఆకాంక్షలను ప్రభుత్వాలు నిర్లక్ష్యం చేస్తే, ఫలితాలు ఎలా ఉంటాయో ప్రపంచవ్యాప్తంగా జరుగుతున్న ఘటనలే నిదర్శనం అని పునరుద్ఘాటించారు. పాలకులు నిరుద్యోగ సమస్యాన్ని నిర్లక్ష్యం చేస్తే ఎదురయ్యే ప్రజా తిరుగుబాటును ఆయన ముందే ఊహించారనే చర్చకు ఇది బాటలు వేసింది.

రైతుల నుంచి యువత వైపు పొలిటికల్ షిఫ్ట్
కేవలం గ్రామీణ ప్రాంతాలు, రైతులకే పరిమితం కాకుండా, పట్టణ వ్యాప్తంగా విస్తరించి ఉన్న విద్యార్థులు, గ్రాడ్యుయేట్లు, ఉద్యోగార్థులను తమ వైపు తిప్పుకోవడమే ఈ కొత్త వ్యూహం వెనుక ఉన్న ప్రధాన ఉద్దేశం. ప్రస్తుతం రాష్ట్రంలో నిరుద్యోగం, గ్రూప్ ఎగ్జామ్స్, నోటిఫికేషన్ల లీకేజీలు లేదా ఆలస్యం వంటి అంశాలు తీవ్ర సున్నితమైనవిగా మారాయి. ఈ పాయింట్‌ను క్యాచ్ చేస్తూ, నిరుద్యోగ పోరాటాలకు నాయకత్వం వహించడం ద్వారా యువతలో బీఆర్ఎస్ పట్ల సానుకూలతను పెంచుకోవచ్చని భావిస్తున్నారు.

యువతే భవిష్యత్తు గేమ్‌చేంజర్?
ఏ రాజకీయ పార్టీకైనా యువ ఓటు బ్యాంక్ అత్యంత క్రియాశీలకమైనది. సోషల్ మీడియాలో యాక్టివ్‌గా ఉండే Gen-Z తరాన్ని ఆకట్టుకుంటే, అది క్షేత్రస్థాయిలో పెను మార్పులకు కారణమవుతుంది. బీఆర్ఎస్ రాబోయే రోజుల్లో ప్రతి జిల్లా పరిధిలో నిరుద్యోగ నిరసనలు, యువజన సదస్సులు నిర్వహించేలా ప్రణాళిక సిద్ధం చేస్తోంది. రైతాంగ పోరాటాల అనుభవానికి, ఇప్పుడు యువత ఆక్రోశాన్ని జత చేసి ప్రభుత్వంపై విపరీతమైన ఒత్తిడి పెంచడమే లక్ష్యంగా రాజకీయ చదరంగం నడుస్తోంది.

రాబోయే రాజకీయాల్లో కొత్త అధ్యాయం
మొత్తానికి, కేటీఆర్ మార్చిన ఈ స్ట్రాటజీ తెలంగాణ రాజకీయాల్లో సరికొత్త అధ్యాయానికి శ్రీకారం చుట్టింది. కేవలం అధికార పక్షాన్ని ప్రశ్నించడమే కాకుండా, యువత సమస్యలకు పరిష్కారం చూపే దిశగా తామున్నామని నమ్మించడమే బీఆర్ఎస్ ముందున్న సవాలు. ఈ ‘Gen-Z’ వ్యూహం రాబోయే రోజుల్లో ఏ స్థాయిలో సక్సెస్ అవుతుందో, తెలంగాణ రాజకీయాల్లో ఎలాంటి సంచలనాలకు దారితీస్తుందో వేచి చూడాల్సిందే.

Also Read: ఉత్తరాదిని ముంచెత్తుతున్న వానలు.. నదుల ఉగ్రరూపం, చార్‌ధామ్ యాత్ర వాయిదా!