మండిపోతున్న చికెన్ ధరలు.. సామాన్యుడికి భారంగా మారిన ‘ముక్క’!

Chicken Prices: వేసవి భానుడు కేవలం మనుషులనే కాదు, పౌల్ట్రీ రంగాన్ని కూడా ఉక్కిరిబిక్కిరి చేస్తున్నాడు. తెలంగాణ వ్యాప్తంగా గత పది రోజులుగా కోడి మాంసం ధరలు ఆకాశాన్ని తాకుతున్నాయి. వారం రోజుల క్రితం వరకు కిలో రూ. 240 పలుకుతున్న స్కిన్‌లెస్ చికెన్ ధర, ప్రస్తుతం హైదరాబాద్‌లోని పలు ప్రాంతాల్లో రూ. 350 నుంచి రూ. 380 వరకు చేరుకుంది. ధరల పెరుగుదల చూస్తుంటే త్వరలోనే కిలో చికెన్ రూ. 400 మార్కును దాటేలా కనిపిస్తోంది. ఈ ఆకస్మిక పెరుగుదల మధ్యతరగతి కుటుంబాల బడ్జెట్‌ను తలకిందులు చేస్తోంది.

ఉత్పత్తిపై ఎండల ఎఫెక్ట్.. పడిపోయిన సరఫరా!
ఈ ధరల పెరుగుదలకు ప్రధాన కారణం రాష్ట్రంలో నెలకొన్న తీవ్రమైన వడగాల్పులేనని పౌల్ట్రీ యజమానులు చెబుతున్నారు. ఎండ తీవ్రతకు కోళ్లు మేత సరిగ్గా తీసుకోకపోవడం, పెరుగుదల మందగించడం వంటి సమస్యలు తలెత్తుతున్నాయి. మరికొన్ని చోట్ల వడదెబ్బకు కోళ్లు భారీగా మృత్యువాత పడటంతో ఉత్పత్తి గణనీయంగా తగ్గింది. డిమాండ్‌కు తగ్గట్టుగా సరఫరా లేకపోవడంతో మార్కెట్‌లో ధరలు అమాంతం పెరిగిపోయాయి. సజీవ కోడి (లైవ్ బర్డ్) ధర కూడా ఫారాల్లోనే రూ. 170 నుంచి రూ. 180 వరకు పలుకుతోంది.

కోడితో పాటే గుడ్డు కూడా.. రవాణా భారంతో రెట్టింపు కష్టాలు!
కేవలం మాంసమే కాకుండా, గుడ్ల ధరలు కూడా వినియోగదారులకు చుక్కలు చూపుతున్నాయి. ప్రస్తుతం డజను గుడ్ల ధర రూ. 75 వరకు ఉండటంతో పేదవాడి ప్రొటీన్ ఆహారం దూరమవుతోంది. దీనికి తోడు పెరిగిన రవాణా ఖర్చులు, మేత ధరలు పౌల్ట్రీ రంగాన్ని మరింత సంక్షోభంలోకి నెట్టాయి. నిర్వహణ వ్యయం పెరగడంతో విక్రయదారులు కూడా ధరలు పెంచక తప్పని పరిస్థితి ఏర్పడిందని వాపోతున్నారు. హోటళ్లు, రెస్టారెంట్లలో కూడా చికెన్ వంటకాల ధరలు పెరిగే అవకాశం ఉండటంతో సామాన్యులు ఆందోళన చెందుతున్నారు.

ధరలు తగ్గేది ఎప్పుడు?
సాధారణంగా మే నెల చివర వరకు ఎండల తీవ్రత ఇలాగే ఉండే అవకాశం ఉండటంతో, జూన్ నెలలో వర్షాలు పడి వాతావరణం చల్లబడే వరకు ధరలు దిగివచ్చే సూచనలు కనిపించడం లేదు. మున్ముందు చికెన్ ధర రూ. 400 దాటినా ఆశ్చర్యపోనక్కర్లేదని మార్కెట్ నిపుణులు విశ్లేషిస్తున్నారు. అప్పటివరకు మాంసాహార ప్రియులు తమ జేబులకు చిల్లు పడకుండా జాగ్రత్త పడాల్సిందే.

Also Read: సిటీలో నేపాలీ గ్యాంగ్ బీభత్సం.. దంపతులకు మత్తు ఇచ్చి 60 తులాల బంగారం చోరీ!

Share

• 
• 
• 
• 
• 
•