Food Safety Violations: మహారాష్ట్ర ఆహార, ఔషధ పరిపాలన శాఖ (FDA).. క్విక్ కామర్స్ సంస్థకు బిగ్ షాక్ ఇచ్చింది. బ్లింకిట్, జెప్టో సహా ఏకంగా 105 ఆహార వ్యాపార సంస్థల లైసెన్సులను అధికారులు సస్పెండ్ చేశారు. వీటితో పాటు తీవ్ర ఉల్లంఘనలకు పాల్పడిన మరొక ఏడు సంస్థలను వెంటనే తమ కార్యకలాపాలను పూర్తిగా నిలిపివేయాలని ఆదేశించారు.
నవంబర్ 4, 5 తేదీల్లో రాష్ట్రవ్యాప్తంగా నిర్వహించిన ప్రత్యేక తనిఖీల్లో అధికారులు విస్తుపోయే నిజాలను కనుగొన్నారు. నాణ్యతా ప్రమాణాలు పాటించని సుమారు 70కి పైగా సంస్థల నుంచి రూ.1.35 కోట్ల విలువైన 39.5 టన్నుల (39,485.42 కిలోలు) ఆహార పదార్థాలను స్వాధీనం చేసుకున్నారు. సీజ్ చేసిన వాటిలో పండుగ సమయంలో ఎక్కువగా అమ్ముడయ్యే కోవా, మావా, పనీర్, నెయ్యి, వంట నూనెలు, ఫర్సాన్, జీడిపప్పు-బాదం, వివిధ రకాల మిఠాయిలు ఉన్నాయి.
ఈ దాడుల్లో అత్యధికంగా పూణే డివిజన్ నుంచే రూ.49.36 లక్షల విలువైన 14.4 టన్నుల ఆహార పదార్థాలను అధికారులు జప్తు చేశారు. ఆ తర్వాత కొంకణ్ డివిజన్‌లో రూ.32.52 లక్షలు, నాసిక్ డివిజన్‌లో రూ.28.35 లక్షల విలువైన సరుకును స్వాధీనం చేసుకున్నారు.
ఎఫ్‌డీఏ విడుదల చేసిన అధికారిక ప్రకటన ప్రకారం.. నాసిక్ డివిజన్ లో 39 సంస్థలు, ముంబైలలో 28 సంస్థలు (బ్లింకిట్, జెప్టోలతో కలిపి), పూణేలో 20 సంస్థలు, అమరావతిలో 15 సంస్థల లైసెన్స్ ను రద్దు చేశారు. అలాగే ఛత్రపతి శంభాజీనగర్ లో 2 సంస్థలు, థానేలో 1 సంస్థను జప్తు చేసినట్లు నివేదికలో పేర్కొన్నారు. అంతేకాకుండా వ్యాపార లావాదేవీలను తక్షణమే నిలిపివేయాలని ఆదేశించినట్లు అధికారులు తెలియజేశారు.
తనిఖీల సందర్భంగా తయారీ కేంద్రాలు, గోదాముల్లో అత్యంత అపరిశుభ్ర వాతావరణం కనిపించిందని అధికారులు తెలిపారు. ఆహార పదార్థాల నిల్వ, ప్యాకింగ్‌లలో నిర్లక్ష్యం, ఈగలు-కీటకాల నివారణ చర్యలు తీసుకోకపోవడం, సరైన ఉష్ణోగ్రత నియంత్రణ వ్యవస్థలు, చట్టబద్ధమైన రికార్డులు, నాణ్యతా సర్టిఫికెట్లు లేకపోవడం వంటి అనేక లోపాలను అధికారులు గుర్తించారు.
Also Read: దీపావళి విందులో అతిగా తినకుండా జాగ్రత్త.. ఈ 7 టిప్స్ పాటిస్తూ పండుగ ఆస్వాదించండి
ఆహార పదార్థాలతో పాటు నిషేధిత గుట్కా, పాన్ మసాలా ఉత్పత్తులపై కూడా అధికారులు ఉక్కుపాదం మోపారు. మూడు వేర్వేరు ప్రాంతాల నుంచి రూ. 7.96 లక్షల విలువైన నిషేధిత ఉత్పత్తులను జప్తు చేశారు. ఈ వ్యవహారంలో ముగ్గురిపై ఎఫ్‌ఐఆర్ నమోదు చేసి ఇద్దరిని అరెస్టు చేశారు. రవాణాకు ఉపయోగిస్తున్న రూ. 4.70 లక్షల విలువైన రెండు వాహనాలను కూడా సీజ్ చేయడంతో పాటు రెండు దుకాణాలను అధికారులు సీల్ చేశారు.
Share
49 ఏళ్ల సురేఖా వాణి.. యువకుడితో క్లోజ్ వీడియోలు! నిజమెంత?
కోహ్లీ ఉంటే ఆ కిక్కే వేరప్పా...రాహుల్ ను తన కొడుకు ‘అకాయ్’లా రెడీ చేస్తున్నాడు
