BMW Fire insurance claim| కారు ప్రయాణంలో టైర్ పంక్చర్ కావడం సాధారణమే. కానీ అదే కారణంగా రాత్రికి రాత్రే రూ.70 లక్షల విలువైన ఓ లగ్జరీ కారు కాలిపోయిందంటే? వినడానికి ఆశ్చర్యంగా ఉంటుంది. ఆ తర్వాత బీమా కంపెనీ కూడా పరిహారం చెల్లించేందుకు నిరాకరించడంతో యజమాని ఏళ్ల తరబడి న్యాయపోరాటం చేయాల్సి వచ్చింది. ఈ కేసు కారు యజమానులకు ఎలాంటి పాఠాలు చెబుతోందో తెలుసుకుందాం.
మహారాష్ట్ర సోలాపూర్‌కు చెందిన పాటిల్ అనే వ్యక్తి ప్రయాణిస్తున్న BMW కారు హైవేపై అర్ధరాత్రి సమయంలో పంక్చర్ అయింది. ఆ సమయంలో సమీపంలో మెకానిక్ లేదా టైర్ రిపేర్ సదుపాయం అందుబాటులో లేదు. దీంతో ఆయన డ్రైవర్‌తో కలిసి కారును రోడ్డు పక్కన సురక్షితంగా పార్క్ చేశారు. కిటికీలు మూసి, కారు లాక్ చేసి మరో వాహనంలో సోలాపూర్‌కు వెళ్లారు. మరుసటి రోజు ఉదయం తిరిగి వచ్చి చూడగా కారు పూర్తిగా కాలిపోయింది. ఈ ఘటన గురించి పోలీసులకు, అగ్నిమాపక సిబ్బందికి తెలిపారు. కారుకు రూ.70 లక్షల ఇన్సూరెన్స్ వ్యాల్యూ ఉంది. ఇందుకోసం పాటిల్ రూ.1,65,996 పాలసీ ప్రీమియం చెల్లించారు.
కారు పూర్తిగా దెబ్బతినడంతో అధీకృత డీలర్ రిపేర్ అంచనా ఇవ్వలేమని తెలిపాడు. బీమా కంపెనీ తొలుత దీన్ని టోటల్ లాస్ క్లెయిమ్‌గా నమోదు చేసింది. అయితే తర్వాత పూర్తి బీమా మొత్తాన్ని చెల్లించేందుకు నిరాకరించింది. పాలసీలోని కండిషన్ నంబర్ 4ను పాటించలేదని కంపెనీ ఆరోపించింది. కారు పంక్చర్ అయినప్పుడు దాన్ని రోడ్డు పక్కన వదిలేయకుండా యజమాని దగ్గరే ఉండాలని లేదా సురక్షితమైన ప్రాంతానికి తరలించాలని వాదించింది. పోలీసులకు, బీమా కంపెనీకి వెంటనే రాతపూర్వకంగా సమాచారం ఇవ్వలేదని కూడా అభ్యంతరం తెలిపింది. దీంతో కారు ఓనర్ వినియోగదారుల కమీషన్‌లో ఫిర్యాదు చేశాడు.
కారు పాడైనప్పుడు దాన్ని ఎట్టి పరిస్థితుల్లోనూ ఒంటరిగా వదిలేయకూడదని పాలసీలో పేర్కొనలేదని వినియోగదారుల కమిషన్ స్పష్టం చేసింది. మరింత నష్టం జరగకుండా తగిన జాగ్రత్తలు తీసుకోవాలన్నదే నిబంధన ఉద్దేశమని పేర్కొంది. పాటిల్ కారు కిటికీలు మూసి, తాళం వేసి వెళ్లారని కమిషన్ గుర్తించింది. అర్ధరాత్రి మెకానిక్ అందుబాటులో లేకపోవడం అనుకోని పరిస్థితిగా పరిగణించింది. కారు అక్కడ నిలిపివేయడమే మంటలకు కారణమని నిరూపించే ఆధారాలను బీమా కంపెనీ సమర్పించలేకపోయింది. అలాగే క్లెయిమ్ సమయంలో కంపెనీ ఏకపక్షంగా కారు విలువను తగ్గించడాన్ని కూడా కమిషన్ అంగీకరించలేదు.
Also Read: ఉద్యోగులకు కొత్త కంపెనీ బంపర్ ఆఫర్.. ఏ టైమ్‌లోనైనా పనిచేయండి, ఇష్టమొచ్చినప్పుడు సెలవులు
కేసు విచారణ చేసిన కమీషన్ రూ.70 లక్షల పూర్తి కారు విలువను చెల్లించాలని బీమా కంపెనీకి ఆదేశించింది. 2012 నవంబర్ 23 నుంచి అసలు చెల్లింపు జరిగే వరకు ఏడాదికి 7 శాతం వడ్డీ ఇవ్వాలని పేర్కొంది. మానసిక వేదన, వేధింపులకు రూ.50 వేలు, కేసు ఖర్చుల కోసం మరో రూ.25 వేలు చెల్లించాలని ఆదేశించింది. న్యాయవాది రాహుల్ జజూ అంచనా ప్రకారం.. సాధారణ వడ్డీ సుమారు రూ.68 లక్షలు కావచ్చు. దీంతో మొత్తం చెల్లింపు దాదాపు రూ.1.4 కోట్లకు ఉంటుంది.
Also Read: మా దేశానికి రండి మా పౌరులను ప్రేమించండి.. లవ్ చేయాలనుకునేవారికి ఉచిత ఫారిన్ ట్రిప్..
వాహనాన్ని సురక్షిత ప్రదేశంలో నిలిపి, తాళం వేయాలి.
పోలీసులకు, అగ్నిమాపక సిబ్బందికి, బీమా కంపెనీకి వెంటనే సమాచారం ఇవ్వాలి.
ఘటనకు సంబంధించిన ఫొటోలు, వీడియోలు భద్రపరచాలి.
పోలీసుల నివేదికలు, సాక్షుల వివరాలు సేకరించాలి.
బీమా పత్రాలు, ప్రీమియం రసీదులు భద్రపరచాలి.
బీమా సర్వే పూర్తయ్యే వరకు దెబ్బతిన్న కారు తరలించకూడదు.
బీమా కంపెనీ క్లెయిమ్‌ను తిరస్కరిస్తే సర్వేయర్ నివేదిక.. తిరస్కరణకు గల కారణాలను కోరాలి. అవసరమైతే సంబంధిత వినియోగదారుల కమిషన్‌ను ఆశ్రయించవచ్చు.
Share
చీరాలలో కాంగ్రెస్ సంచలనం.. కూటమికి వైఎస్ షర్మిలా రెడ్డి స్ట్రాంగ్ కౌంటర్!
ఒకే పల్లవికి మూడు నాలుగు వెర్షన్లు.. వేటూరి టాలెంట్ ఇదే!
