Online Loan Apps: లోన్ యాప్స్ ఉచ్చులో మరో ప్రాణం.. సూరంపాలెంలో విద్యార్థి బషీర్ ఆత్మహత్య

Online Loan Apps: ఆన్‌లైన్ బెట్టింగ్, లోన్ యాప్‌ల ఉచ్చులో పడి మరో విద్యార్థి బలి. ఒడిశా రాష్ట్రానికి చెందిన మహ్మద్ బషీర్ (22) మెరుగైన భవిష్యత్తు కోసం సూరంపాలెం లోని ఒక విశ్వవిద్యాలయంలో ఎంబీఏ (MBA) మొదటి సంవత్సరం చేరుకున్నాడు. అయితే, చదువుపై ఏకాగ్రత వహించాల్సిన వయసులో, సరదాగా మొదలైన ఆన్‌లైన్ గేమ్స్ అతడిని వ్యసనం వైపు మళ్లించాయి. ఈ ఆటల్లో నష్టపోయిన డబ్బును తిరిగి సంపాదించాలనే ఆశతో పలు ఆన్‌లైన్ లోన్ యాప్‌ల ద్వారా అప్పులు చేశాడు. చివరకు ఆ అప్పులు పెరిగిపోయి, వాటిని తీర్చలేని స్థితిలో తీరని మానసిక ఒత్తిడికి గురయ్యాడు.

అమ్మా నన్ను క్షమించు.. కన్నీరు పెట్టించే లేఖ
గురువారం సాయంత్రం హాస్టల్ గదిలో ఫ్యాన్‌కు ఉరేసుకుని ఆత్మహత్య చేసుకునే ముందు బషీర్ తన తల్లికి రాసిన లేఖ ప్రతి ఒక్కరినీ కలిచివేస్తోంది. “అమ్మా సారీ.. నీకు మంచి కొడుకుగా ఉండలేకపోయాను. నా కోసం నువ్వు ఎంత కష్టపడ్డావో నాకు తెలుసు, కానీ నేను నీకు భారాన్ని మిగిల్చాను” అంటూ ఆవేదన వ్యక్తం చేశాడు. తన జీవితంలో ఏదీ సరిగ్గా జరగడం లేదని, అప్పుల నుంచి బయటపడే మార్గం కనిపించక ఈ కఠిన నిర్ణయం తీసుకుంటున్నానని పేర్కొన్నాడు. చిన్నప్పటి నుంచి అనకాపల్లి జిల్లా వడ్డాది మాడుగులలో అమ్మమ్మ వద్ద పెరిగిన బషీర్, ఇలా అర్ధాంతరంగా తనువు చాలించడంతో ఆ కుటుంబం దిక్కుతోచని స్థితిలో పడిపోయింది.

లోన్ యాప్‌ల వేధింపులు.. యువత పరిస్థితి..
ఈ ఘటనపై సమాచారం అందుకున్న గండేపల్లి పోలీసులు కేసు నమోదు చేసి దర్యాప్తు చేపట్టారు. ప్రాథమిక విచారణ ప్రకారం, ఆన్‌లైన్ గేమ్స్ వల్ల కలిగిన ఆర్థిక నష్టమే బషీర్ ఆత్మహత్యకు ప్రధాన కారణమని తేలింది. ముఖ్యంగా ఈ మధ్యకాలంలో విద్యార్థులే లక్ష్యంగా సాగుతున్న లోన్ యాప్‌ల వేధింపులు, అధిక వడ్డీలు యువతను బలవన్మరణాలకు ప్రేరేపిస్తున్నాయి. సులభంగా డబ్బు వస్తుందన్న ఆశతో మొదలై, చివరకు అది ప్రాణాలు తీసే స్థాయికి చేరుతుండటం ఆందోళన కలిగిస్తోంది.

Also Read: తెలుగు రాష్ట్రాల్లో ఘోర రోడ్డు ప్రమాదాలు.. స్పాట్‌లో నలుగురు మృతి, ఇద్దరికి గాయాలు

ప్రాణం కన్నా అప్పు పెద్దది కాదు
ఒక విద్యావంతుడైన యువకుడు ఇలా ప్రాణాలు తీసుకోవడం కేవలం ఒక కుటుంబానికి మాత్రమే కాదు, దేశానికి కూడా నష్టమే. ఆన్‌లైన్ గేమ్స్, బెట్టింగ్ యాప్‌ల పట్ల యువత అప్రమత్తంగా ఉండాలి. తల్లిదండ్రులు కూడా తమ పిల్లల ప్రవర్తనలో మార్పులను గమనిస్తూ ఉండాలి. ఆర్థిక ఇబ్బందులు ఎదురైనప్పుడు ప్రాణాలు తీసుకోవడం పరిష్కారం కాదని, ధైర్యంగా సమస్యను ఎదుర్కోవాలని నిపుణులు సూచిస్తున్నారు. బషీర్ మృతితో అతని తల్లి పర్వీన్ బేగమ్, తండ్రి షమీర్ ఖాన్, ఇద్దరు తమ్ముళ్లు తీవ్ర విషాదంలో మునిగిపోయారు.