Bhadrachalam: భద్రాచలంలో గ్యాంగ్ వార్.. వామ్మో కొట్టి చంపేశారు..

Bhadrachalam: పవిత్ర పుణ్యక్షేత్రమైన భద్రాచలంలో మరోసారి గ్యాంగ్ వార్ కలకలం సృష్టించింది. కేవలం బైక్ తగిలిందనే చిన్న కారణంతో మొదలైన వివాదం ఒక యువకుడి ప్రాణం తీసే వరకు వెళ్లింది. ఈ ఘటన స్థానికంగా తీవ్ర భయాందోళనలకు గురిచేసింది.

పోలీసుల సమాచారం ప్రకారం.. భద్రాచలం పట్టణంలోని ప్రధాన రహదారిపై కొందరు యువకులు బైక్‌పై వెళ్తుండగా.. ఎదురుగా వస్తున్న మరో బైకర్ వారికి తగిలాడు. ఈ క్రమంలో ఇరువర్గాల మధ్య మాట మాట పెరిగి తీవ్ర వాగ్వాదం చోటుచేసుకుంది. గొడవ పెద్దది కావడంతో ఒక వర్గానికి చెందిన యువకులు వెంటనే ఫోన్ చేసి తమ గ్యాంగ్ సభ్యులను అక్కడికి పిలిపించారు.

ఘటనా స్థలానికి చేరుకున్న గ్యాంగ్ సభ్యులు రెచ్చిపోయారు. కర్రలు, ఇతర మారణాయుధాలతో ఎదుటి వర్గంపై విచక్షణారహితంగా దాడి చేశారు. ఈ భీకర దాడిలో తీవ్రంగా గాయపడిన ఒక యువకుడు అక్కడికక్కడే కుప్పకూలిపోయాడు. వెంటనే అతడిని ఆస్పత్రికి తరలించినప్పటికీ.. అతను మృతి చెందినట్లు వైద్యులు ధృవీకరించారు.

సమాచారం అందుకున్న పోలీసులు వెంటనే ఘటనా స్థలానికి చేరుకుని విచారణ చేపట్టారు. పట్టణంలో ఉద్రిక్తత నెలకొనకుండా భారీగా బందోబస్తు ఏర్పాటు చేశారు. నిందితులను గుర్తించేందుకు సిసిటివి (CCTV) ఫుటేజీని పరిశీలిస్తున్నారు. చిన్నపాటి రోడ్డు ప్రమాద వివాదం ప్రాణం తీసే వరకు వెళ్లడంపై పట్టణ ప్రజలు దిగ్భ్రాంతి వ్యక్తం చేస్తున్నారు.

ALSO READ: Hayathnagar: అంబులెన్స్‌లో కూతురి అంత్యక్రియలకు.. కన్నీరు పెట్టించే వీడియో..