చిట్టీల పేర భారీ మోసం.. కోటీ 50లక్షలు వసూలు చేసి పరారైన దంపతులు!

Chit Fraud: స్వేచ్ఛ బ్యూరో: కాలనీ సంక్షేమ సంఘం అధ్యక్షుడు కదా అని నమ్మి చిట్టీలు వేస్తే కోటీ యాభై లక్షల రూపాయలు వసూలు చేసి కుటుంబంతో సహా పరారయ్యాడు ఆ వ్యక్తి. ఈ సంఘటన మీర్​ పేట పోలీస్​ స్టేషన్​ పరిధిలో జరిగింది. వివరాలు ఇలా ఉన్నాయి. మీర్​ పేట శివనారాయణపురం ప్రాంతంలోని వైష్ణవి కాలనీ వాస్తవ్యులైన సౌజన్య, సురేశ్​ కుమార్​ భార్యాభర్తలు. సురేశ్​ కుమార్​ కాలనీ సంక్షేమ సంఘం అధ్యక్షునిగా ఉన్నాడు. ఇదిలా ఉండగా భార్యాభర్తలు కలిసి పదేళ్లుగా చిట్టీల వ్యాపారం చేస్తున్నారు. లక్ష నుంచి 10లక్షల చిట్టీలను నిర్వహిస్తున్నారు.

వ్యాపారం ప్రారంభించిన తరువాత కొంతకాలం సురేశ్ కుమార్​ దంపతులు చిట్టీలు పాడుకున్న వారికి సకాలంలో డబ్బు ఇవ్వటంతో స్థానికులకు వీరిపై నమ్మకం కుదిరింది. ఈ క్రమంలో పలువురు 2.50 లక్షల నుంచి 10లక్షల చిట్టీల్లో సభ్యులుగా చేరి డబ్బు కడుతూ వచ్చారు. అయితే, కొన్ని నెలలుగా చిట్టీల గడువు ముగిసినా సురేశ్​ కుమార్​ సభ్యులకు డబ్బు ఇవ్వకుండా అపుడిస్తా.. ఇపుడిస్తా అని కాలం దాటేస్తూ వస్తున్నాడు. గట్టిగా అడిగిన వారికి చెక్కులు, ప్రామిసరీ నోట్లు ఇచ్చాడు. ఇలా దాదాపు కోటీ యాభై లక్షలు బాకీ పడ్డ సురేశ్​ తాజాగా కుటుంబ సభ్యులతో కలిసి పరారయ్యాడు. దాంతో బాధితులు పోలీసులకు ఫిర్యాదు చేశారు. ఈ మేరకు కేసులు నమోదు చేసిన పోలీసులు నిందితుల కోసం గాలిస్తున్నారు.