Truck vs Scorpio Collision: మృత్యువులా దూసుకొచ్చిన లారీ.. స్కార్పియో నుజ్జునుజ్జు.. నలుగురు మృతి!

Truck vs Scorpio Collision: ఛత్తీస్‌గఢ్‌లో అత్యంత భయంకరమైన రోడ్డు ప్రమాదం చోటుచేసుకుంది. వేగంగా వచ్చిన ఒక లారీ నియంత్రణ కోల్పోయి డివైడర్‌ను దాటుకుంటూ అవతలి వైపు ఉన్న రోడ్డుపైకి దూసుకువచ్చింది. అదే సమయంలో వేగంగా వెళ్తున్న ఒక స్కార్పియో కారును ఈ లారీ నేరుగా ఢీకొట్టింది. లారీ కింద పడి స్కార్పియో కారు పూర్తిగా నుజ్జునుజ్జు అయింది. ఈ ఘటనలో కారులో ప్రయాణిస్తున్న నలుగురు వ్యక్తులు అక్కడికక్కడే ప్రాణాలు కోల్పోయారు. ప్రమాదానికి సంబంధించిన దృశ్యాలు సమీపంలోని సీసీటీవీ కెమెరాల్లో రికార్డు కాగా, ప్రస్తుతం అవి సోషల్ మీడియాలో వైరల్‌గా మారాయి.

ఈ ఘోర ప్రమాదానికి గల కారణాలపై నెటిజన్లు తీవ్ర స్థాయిలో మండిపడుతున్నారు. హైవే పక్కన నిబంధనలకు విరుద్ధంగా లారీలను పార్కింగ్ చేయడమే ఈ ప్రాణ నష్టానికి ప్రధాన కారణమని వారు విమర్శిస్తున్నారు. ప్రత్యక్ష సాక్షులు.. వీడియో ఆధారాల ప్రకారం.. రోడ్డుపై ఆగి ఉన్న లారీలను గమనించిన ఒక లారీ డ్రైవర్ వాటిని తప్పించే క్రమంలో ఒక్కసారిగా స్టీరింగ్‌ను కుడివైపు తిప్పాడు. దీనివల్ల ఆ లారీ వెనుకనే వేగంగా వస్తున్న మరో లారీ డ్రైవర్ అప్రమత్తం కాలేకపోయాడు. వెనుక ఉన్న లారీ ఒక్కసారిగా అదుపుతప్పి డివైడర్‌ను ఎక్కి అవతలి వైపు రోడ్డుపైకి దూసుకెళ్లి ఎదురుగా వస్తున్న స్కార్పియోను బలంగా ఢీకొట్టింది. ప్రమాదం జరిగిన వెంటనే స్థానికులు ఘటనా స్థలానికి చేరుకుని కారులో ఇరుక్కుపోయిన వారిని బయటకు తీసే ప్రయత్నం చేశారు. అయితే కారు పూర్తిగా నలిగిపోవడంతో ఎవరినీ కాపాడలేకపోయారు. సమాచారం అందుకున్న పోలీసులు అక్కడికి చేరుకుని మృతదేహాలను పోస్టుమార్టం నిమిత్తం ఆసుపత్రికి తరలించారు.

ఘోర ప్రమాదం.. నలుగురు మృతి

ఛత్తీస్‌గఢ్‌లో ఇవాళ జరిగిన ప్రమాదం విజువల్స్ SMలో వైరల్‌గా మారాయి. ఓ లారీ డివైడర్ దాటుకొని వచ్చి మరోవైపు వేగంగా వెళ్తున్న స్కార్పియోను ఢీకొట్టింది. ఈ ప్రమాదంలో కారు నుజ్జునుజ్జు కాగా నలుగురు వ్యక్తులు చనిపోయారు. రోడ్డుపై లారీలు ఆపడమే ఘటనకు కారణమని… pic.twitter.com/hMEMDMljVE

— ChotaNews App (@ChotaNewsApp) February 27, 2026