Kadapa Court Verdict: రైలులో ఎనిమిదేళ్ల బాలికపై అత్యాచారం.. కడప పోక్సో కోర్టు సంచలన తీర్పు

Kadapa Court Verdict: ఇటీవలి కాలంలో దేశవ్యాప్తంగా చిన్నారులపై అఘాయిత్యాలు పెరిగిపోతున్నాయి. ఇలాంటి పరిస్థితుల్లో బాధితులకు న్యాయం చేకూర్చే దిశగా న్యాయస్థానాలు కఠినంగా వ్యవహరిస్తున్నాయి. ఈ క్రమంలో కడప కోర్టు తాజాగా ఓ సంచలనమైన తీర్పు వెలువరించింది. బాలికపై అత్యాచారానికి పాల్పడ్డ రాంప్రసాద్ రెడ్డికి జీవిత ఖైదుతో పాటు రూ.10,000 జరిమానా విధిస్తూ న్యాయస్థానం తీర్పు చెప్పింది. ఈ కేసు 2019 సంవత్సరానికి చెందింది. అప్పట్లో ట్రైన్‌లో ప్రయాణిస్తున్న ఓ కుటుంబానికి చెందిన బాలికపై నిందితుడు అత్యాచారం చేసిన ఘటన రాష్ట్రవ్యాప్తంగా సంచలనం సృష్టించింది. సుదీర్ఘ విచారణ అనంతరం నిందితుడిని దోషిగా నిర్ధారించిన కోర్టు కఠినమైన శిక్ష విధించింది.

2019 జనవరి 19న బాలిక తన కుటుంబ సభ్యులతో కలిసి రైలు ప్రయాణంలో ఉండగా, జనరల్ కోచ్ నుంచి ఏసీ కోచ్‌లోకి అక్రమంగా ప్రవేశించిన రాంప్రసాద్ రెడ్డి ఆ అమాయక బాలికపై అత్యాచారానికి పాల్పడ్డాడు. ఈ ఘటన వెలుగులోకి రావడంతో అప్పట్లో తీవ్ర ఉద్రిక్త పరిస్థితులు నెలకొన్నాయి. బాలిక కుటుంబ సభ్యులు, ప్రయాణికులు ఆగ్రహం వ్యక్తం చేశారు. పోలీసులు వెంటనే కేసు నమోదు చేసి నిందితుడిని అరెస్టు చేసి దర్యాప్తు చేపట్టారు. విశేషంగా ఈ కేసులో ట్రైన్‌లో విధులు నిర్వహిస్తున్న టీసీలు, భద్రతా సిబ్బంది నిర్లక్ష్యం కూడా బయటపడింది. జనరల్ కంపార్ట్‌మెంట్ నుంచి ఏసీ కోచ్‌లోకి అనుమానాస్పదంగా వచ్చిన వ్యక్తిని గుర్తించడంలో వారు విఫలమయ్యారని అప్పట్లో ఆరోపణలు వెల్లువెత్తాయి.

సుదీర్ఘ విచారణలో భాగంగా పలు కీలక సాక్ష్యాలు, వైద్య నివేదికలు, బాలిక వాంగ్మూలం కోర్టులో నమోదు అయ్యాయి. నిందితుడిపై ఉన్న అభియోగాలు నిరూపితమవ్వడంతో కోర్టు అతడిని దోషిగా తేల్చింది. బాలిక మానసికంగా, శారీరకంగా తీవ్రంగా దెబ్బతిన్న దృష్ట్యా నిందితుడికి జీవిత ఖైదు శిక్ష విధించడం సముచితమని న్యాయస్థానం అభిప్రాయపడింది. అంతేకాకుండా ఈ ఘటన జరగడానికి బాధ్యులైన విభాగాల నిర్లక్ష్యాన్ని కూడా కోర్టు తీవ్రంగా తప్పుబట్టింది.

బాధితురాలికి న్యాయం అందించడమే కాకుండా, ఆమె భవిష్యత్ జీవన భద్రతను దృష్టిలో ఉంచుకుని కోర్టు నష్టపరిహారం కూడా విధించింది. బాధితురాలికి రూ.10 లక్షల 50 వేల రూపాయలు నష్టపరిహారంగా చెల్లించాలని భారతీయ రైల్వే శాఖను ఆదేశించింది. విధుల్లో నిర్లక్ష్యంగా వ్యవహరించిన టీసీలు, భద్రతా సిబ్బందిపై శాఖాపరమైన చర్యలు తీసుకోవాలని కూడా రైల్వే అధికారులకు సూచనలు చేసింది. ఈ తీర్పుతో బాధిత కుటుంబానికి కొంత ఊరట లభించినప్పటికీ, జరిగిన అన్యాయం మాత్రం ఎన్నటికీ పూడ్చలేనిదేనని వారు తెలిపారు.

ఈ కేసు మరోసారి రైళ్లలో మహిళలు, చిన్నారుల భద్రతపై తీవ్రమైన ప్రశ్నలు లేవనెత్తింది. భద్రతా వ్యవస్థలో ఉన్న లోపాలు, సిబ్బంది నిర్లక్ష్యం ఎంతటి ఘోరాలకు దారి తీస్తుందో ఈ ఘటన స్పష్టంగా చూపిస్తోంది. రైళ్లలో పర్యవేక్షణ బలోపేతం చేయడం, ప్రతి కోచ్‌లో భద్రతా సిబ్బంది నిరంతరం తనిఖీలు నిర్వహించడం, అనుమానాస్పద వ్యక్తులపై వెంటనే చర్యలు తీసుకోవడం అత్యంత అవసరమని నిపుణులు సూచిస్తున్నారు.