మేడ్చల్‌లో భారీ చోరీ.. నిద్రిస్తుండగానే 13 తులాల బంగారం, 4 లక్షల నగదు మాయం!

Medchal Robbery: కష్టపడకుండా అడ్డదారిలో డబ్బు సంపాదించాలనే దురాశతో దొంగలు రెచ్చిపోతున్నారు. తాళం వేసిన ఇళ్లే కాదు, మనుషులు ఇంట్లో ఉన్నా సరే బరితెగించి దొంగతనాలకు పాల్పడుతున్నారు. తాజాగా మేడ్చల్ పోలీస్ స్టేషన్ పరిధిలోని రాఘవేంద్ర నగర్ కాలనీలో జరిగిన ఒక ఘటన స్థానికంగా తీవ్ర కలకలం రేపింది.

రాఘవేంద్ర నగర్ కాలనీలోని ఒక ఇంట్లో కుటుంబ సభ్యులందరూ రాత్రి సమయంలో గాఢ నిద్రలో ఉన్నారు. ఇదే అదునుగా భావించిన దొంగలు అత్యంత చాకచక్యంగా ఇంట్లోకి చొరబడ్డారు. ఇంట్లో వారు నిద్రిస్తున్నారనే భయం కూడా లేకుండా బీభత్సం సృష్టించారు. బీరువాలో భద్రపరిచిన 13 తులాల బంగారు ఆభరణాలతో పాటు 4 లక్షల రూపాయల నగదును అపహరించుకుపోయారు.

ఉదయం నిద్రలేచిన బాధితులు, జరిగిన దారుణాన్ని చూసి షాక్‌కు గురయ్యారు. వెంటనే మేడ్చల్ పోలీసులకు సమాచారం అందించగా, క్లూస్ టీమ్‌తో కలిసి పోలీసులు ఘటనా స్థలానికి చేరుకున్నారు. వేలిముద్రలు, సీసీటీవీ ఫుటేజీ ఆధారంగా నిందితులను పట్టుకునేందుకు దర్యాప్తు ముమ్మరం చేశారు.

రోజురోజుకీ పెరుగుతున్న ఈ దొంగతనాల పట్ల స్థానికులు భయాందోళన వ్యక్తం చేస్తున్నారు. పోలీసులు గస్తీ పెంచాలని కోరుతున్నారు. ప్రజలు కూడా తమ ఇళ్లకు పటిష్టమైన భద్రత కల్పించుకోవాలని, అనుమానిత వ్యక్తులు కనిపిస్తే వెంటనే పోలీసులకు సమాచారం అందించాలని అధికారులు సూచిస్తున్నారు.

Also Read: వీళ్ళా మన నాయకులు? చిత్తూరు వైసీపీలో అసలేం జరుగుతోంది?

https://twitter.com/bigtvtelugu/status/2041751298274722160