Bus Accident: ప్రైవేటు ట్రావెల్స్‌ బస్సు బోల్తా.. స్పాట్‌లో 36 మంది

Bus Accident: రాష్ట్రంలో వరుస రోడ్డు ప్రమాదాలు ప్రజలను భయాందోళనకు గురిచేస్తున్నాయి. తాజాగా కోహిర్ మండలం చింతల్ ఘాట్ సమీపంలో జాతీయ రహదారి–65 (NH-65)పై.. ప్రైవేటు ట్రావెల్స్ బస్సు అదుపుతప్పి బోల్తా పడింది. ఈ ప్రమాదంలో ఒకరు అక్కడికక్కడే మృతి చెందగా, మరో ఇద్దరి పరిస్థితి విషమంగా ఉన్నట్లు సమాచారం. ప్రమాద సమయంలో బస్సులో సుమారు 36 మంది ప్రయాణికులు ఉన్నట్లు తెలుస్తోంది.

కర్ణాటక రాష్ట్రం నుంచి హైదరాబాద్ వైపు ప్రయాణిస్తున్న ప్రైవేటు ట్రావెల్స్ బస్సు ఈ ప్రమాదానికి గురైంది. ముందుగా వెళ్తున్న మరో బస్సును తప్పించబోయే క్రమంలో డ్రైవర్ స్టీరింగ్‌పై నియంత్రణ కోల్పోయినట్లు ప్రాథమికంగా పోలీసులు అంచనా వేస్తున్నారు.

ప్రమాదం జరిగిన వెంటనే సంఘటనా స్థలంలో తీవ్ర గందరగోళం నెలకొంది. బస్సు బోల్తా పడటంతో పలువురు ప్రయాణికులు లోపల చిక్కుకుపోయారు. సమాచారం తెలుసుకున్న పోలీసులు సంఘటనా స్థలానికి చేరుకుని సహాయక చర్యలు చేపట్టారు. క్షతగాత్రులను సమీప ఆసుపత్రికి తరలించారు.

ఈ ప్రమాదంలో మృతి చెందిన వ్యక్తి వివరాలు ఇంకా పూర్తిగా తెలియరాలేదు. మృతదేహాన్ని పోలీసులు పోస్టుమార్టం నిమిత్తం తరలించారు. ప్రమాద సమయంలో బస్సులో మొత్తం 36 మంది వరకు ప్రయాణికులు ఉన్నట్లు మరో సమాచారం.

ప్రమాద సమయంలో జాతీయ రహదారి–65పై కొంతసేపు ట్రాఫిక్‌కు అంతరాయం ఏర్పడింది. పోలీసులు ట్రాఫిక్‌ను మళ్లించి పరిస్థితిని అదుపులోకి తీసుకువచ్చారు. క్రేన్ సహాయంతో బోల్తా పడిన బస్సును తొలగించిన అనంతరం రాకపోకలు సాధారణ స్థితికి చేరుకున్నాయి.

Also Read: ఇంజనీరింగ్ స్టూడెంట్ సూసైడ్.. అమ్మ-నాన్న నన్ను క్షమించండి అంటూ లేఖ

పోలీసులు ఈ ఘటనపై కేసు నమోదు చేసి దర్యాప్తు ప్రారంభించారు. బస్సు డ్రైవర్ నిర్లక్ష్యమా లేక సాంకేతిక లోపాలు వంటి అన్ని కోణాల్లో విచారణ చేపట్టినట్లు తెలిపారు. ప్రమాదానికి గల పూర్తి కారణాలు దర్యాప్తు అనంతరం వెల్లడిస్తామని అధికారులు పేర్కొన్నారు.