Ratha Saptami 2026: రథ సప్తమి నాడు జిల్లేడు ఆకుల స్నానం ఎందుకు చేస్తారు ?

Ratha Saptami 2026: రథ సప్తమి నాడు సూర్యుడిని ఆరాధించడం వల్ల ఆరోగ్యం, ఐశ్వర్యం లభిస్తాయని భక్తుల విశ్వాసం. ముఖ్యంగా తెలుగు రాష్ట్రాల్లో ఈ పండగకు ఆధ్యాత్మికంగానే కాకుండా శాస్త్రీయంగానూ ఎంతో ప్రాధాన్యత ఉంది. ఉత్తరాయణ పుణ్యకాలంలో సూర్యుడు తన రథాన్ని ఉత్తర దిశగా మళ్లించే ఈ పవిత్రమైన రోజున, భక్తులు తమ ఇంట్లోనే భక్తి శ్రద్ధలతో పూజించుకునే స్వామి వారికి పూజలు నిర్వహిస్తారు. సామాన్యుల నుంచి పండితుల వరకు అందరూ సులభంగా అనుసరించదగ్గ సంప్రదాయబద్ధమైన రథ సప్తమి పూజా విధానం, విశిష్టత, నియమాలు మీ కోసం..

రథ సప్తమిని “సూర్య జయంతి” అని కూడా పిలుస్తారు. సూర్య కిరణాల శక్తిని మన శరీరానికి, మనసుకి అనుసంధానం చేసుకునే అద్భుతమైన పర్వదినం ఇది. ఇంట్లోనే ఈ పూజను ఎలా నిర్వహించుకోవాలో ఇప్పుడు తెలుసుకుందాం.
1. పవిత్ర స్నానం (జిల్లేడు ఆకుల విశిష్టత):

రథ సప్తమి రోజున సూర్యోదయానికి ముందే స్నానం చేయడం అత్యంత ముఖ్యం.

విధానం: ఏడు జిల్లేడు ఆకులను (తల మీద ఒకటి, రెండు భుజాల మీద, రెండు మోచేతుల మీద, రెండు మోకాళ్ల మీద) ఉంచుకుని స్నానం చేయాలి.

అర్థం: జిల్లేడు ఆకుకు సూర్యుడికి ఉన్నంత శక్తి ఉంటుందని శాస్త్రం చెబుతోంది. దీని వల్ల చర్మ వ్యాధులు తొలగి, మానసిక ప్రశాంతత లభిస్తుంది. స్నానం చేసేటప్పుడు సూర్య దేవుడిని స్మరించుకోవడం మరవకండి.

2. సూర్య భగవానుడికి అర్ఘ్యం:
స్నానానంతరం రాగి పాత్రలో నీరు తీసుకుని, అందులో కుంకుమ, అక్షింతలు, ఎర్రటి పువ్వులు వేసి సూర్యుడికి అభిముఖంగా నిలబడి మూడు సార్లు నీటిని వదలాలి. దీనిని “అర్ఘ్యం వదలడం” అంటారు. ఇది సూర్యుడి పట్ల మన కృతజ్ఞతను తెలియజేస్తుంది.

3. చిక్కుడు కాయల రథం తయారీ:
తెలుగు వారి సంప్రదాయంలో రథ సప్తమికి చిక్కుడు కాయలకు ప్రత్యేక ప్రాముఖ్యత ఉంది.

ఒక పీటపై ఎర్రటి వస్త్రాన్ని పరిచి, దానిపై అష్టదళ పద్మ ముగ్గు వేయాలి.

చిక్కుడు కాయలతో చిన్నపాటి రథాన్ని తయారు చేసి.. అందులో సూర్య దేవుని ప్రతిమను లేదా ఫోటోను ఉంచాలి.

పసుపు వినాయకుడిని చేసి ముందుగా గణపతి పూజ నిర్వహించాలి.

4. పొంగలి నైవేద్యం (క్షీరాన్నం):
ఈ రోజు నైవేద్యం వండటంలో ఒక ప్రత్యేకత ఉంది. వీలైతే ఇంటి ఆవరణలో ఎండ తగిలే చోట, పిడకల మంటపై ఆవు పాలతో పరమాన్నం వండాలి.

పాలు పొంగేటప్పుడు “సూర్య దేవునికి జై” అని పలకడం శుభప్రదం.

ఈ పొంగలిని చిక్కుడు ఆకులలో నైవేద్యంగా సమర్పించడం విశేషం. సూర్యుడికి ఎర్రని మందార పూలు లేదా గన్నేరు పూలతో పూజించడం వల్ల విశేష ఫలితం ఉంటుంది.

Also Read: ఈ ఏడాది రథ సప్తమి ఎప్పుడు ? పూజా విధానం, పూర్తి వివరాలు

5. పారాయణం, మంత్రాలు:
పూజ సమయంలో ఆదిత్య హృదయం చదువుకోవడం వల్ల ఆరోగ్యం, కార్యసిద్ధి లభిస్తాయి. సూర్యాష్టకం లేదా సూర్య అష్టోత్తర శతనామావళిని భక్తితో పఠించాలి. ఏమీ రాని వారు కేవలం “ఓం ఘృణి సూర్యాయ నమః” అనే మంత్రాన్ని 108 సార్లు జపించినా సరిపోతుంది.

6. దానం:
పూజ పూర్తయిన తర్వాత గారెలు, పరమాన్నం ప్రసాదంగా స్వీకరించాలి. ఈ రోజున పేదలకు లేదా బ్రాహ్మణులకు గోధుమలు, బెల్లం లేదా వస్త్ర దానం చేయడం వల్ల జాతకంలోని సూర్య దోషాలు తొలగిపోతాయని పండితులు చెబుతుంటారు.

రథ సప్తమి రోజున వీలైనంత వరకు ఇంటిని మామిడి తోరణాలతో.. రంగు రంగుల ముగ్గులతో అలంకరించుకోవడం వల్ల లక్ష్మీ కటాక్షం కలుగుతుంది. సూర్య కిరణాలు ఇంట్లోకి ప్రసరించేలా తలుపులు తీసి ఉంచండి.