Sravana Masam 2025: శ్రావణ మాసంలో.. తప్పకుండా పాటించాల్సిన నియమాలు ఏంటి ?

Sravana Masam 2025: హిందూ సాంప్రదాయం ప్రకారం శ్రావణ మాసం అత్యంత పవిత్రమైనదిగా, ఆధ్యాత్మిక ప్రాముఖ్యత కలిగినదిగా చెబుతారు. ఇది తెలుగు సంవత్సరంలో ఐదవ నెల కాగా జులై 25నుంచి ప్రారంభం కానుంది. ఈ మాసం శివుడికి, పార్వతీదేవికి, లక్ష్మీదేవికి అత్యంత ప్రీతికరమైనది. ఈ మాసంలో చేసే పూజలు, వ్రతాలు విశేషమైన ఫలితాలను ఇస్తాయని నమ్ముతారు. శ్రావణ మాసంలో పాటించాల్సిన కొన్ని ముఖ్యమైన నియమాలు, ఆచారాలను ప్రతి ఒక్కరూ తప్పకుండా తెలుసుకోవాలి.

1. సాత్విక ఆహారం:
శ్రావణ మాసంలో మాంసాహారం, మద్యం, ధూమపానం పూర్తిగా నిషిద్ధం. ఉల్లి, వెల్లుల్లి వంటి ఆహారాలను కూడా ఈ మాసంలో తినకూడదు. శరీరాన్ని, మనస్సును శుద్ధి చేసుకునేందుకు సాత్విక ఆహారాన్ని మాత్రమే తీసుకోవాలి. పాలు, పండ్లు, కూరగాయలు, ధాన్యాలు వంటివి తీసుకోవడం మంచిది.

2. దైవ భక్తి:
శ్రావణ మాసం అంటేనే దైవ చింతన. ఈ మాసమంతా శివనామ స్మరణతో, భగవన్నామ స్మరణతో గడపాలి. ప్రతిరోజూ ఉదయం, సాయంత్రం దీపారాధన చేయడం, పూజలు చేయడం వల్ల ఇంట్లో లక్ష్మీ కటాక్షం కలుగుతుంది. ముఖ్యంగా శ్రావణ సోమవారాలు శివునికి ప్రీతికరమైనవి. ఈ రోజులలో ఉపవాసం ఉండి శివాలయాలను సందర్శించి అభిషేకాలు, బిల్వార్చనలు చేయడం వల్ల విశేష ఫలితాలు లభిస్తాయి.

3. వ్రతాలు, పూజలు:
శ్రావణ సోమవారాలు: శ్రావణ సోమవారం శివలింగానికి నీరు, పాలు, తేనె, పెరుగు, నెయ్యి, చక్కెర, గంధం, బిల్వ పత్రాలు, శమీ పత్రాలతో అభిషేకం చేయడం వల్ల గ్రహ దోషాలు తొలగిపోతాయి. ఈ సమయంలో ‘ఓం నమః శివాయ’ జపం చేయడం శ్రేష్ఠం.

మంగళ గౌరీ వ్రతం: శ్రావణ మాసంలో వచ్చే ప్రతి మంగళవారం మంగళ గౌరీ వ్రతాన్ని ఆచరిస్తారు. కొత్తగా పెళ్లైన స్త్రీలు తమ సుమంగళి యోగం కలకాలం నిలవాలని ఈ వ్రతాన్ని చేస్తారు.

వరలక్ష్మీ వ్రతం: శ్రావణ పౌర్ణమికి ముందు వచ్చే శుక్రవారం నాడు వరలక్ష్మీ వ్రతాన్ని అత్యంత భక్తి శ్రద్ధలతో ఆచరిస్తారు. అష్టైశ్వర్యాలు, సౌభాగ్యం, సకల శుభాలు కలుగుతాయని నమ్ముతారు.

శ్రావణ శుక్రవారాలు: ప్రతి శుక్రవారం లక్ష్మీదేవికి కుంకుమార్చనలు చేయడం, ఎర్రని పూలు, మల్లె మాలలను సమర్పించడం వల్ల రుణ విముక్తి కలిగి, లక్ష్మీకటాక్షం సిద్ధిస్తుంది.

4. కొన్ని చేయకూడని పనులు:
ఈ మాసంలో శరీరానికి నూనె రాసుకోకూడదు. నూనె దానం చేయడం శుభప్రదంగా చెబుతారు.

క్షవరం (శ్రావణం), గోర్లు కత్తిరించుకోవడం వంటి పనులు ఈ మాసంలో చేయకూడదని అంటారు.

ఇతరులను బాధపెట్టడం, గొడవలకు దిగడం, హింసాత్మకమైన పనులు చేయడం వంటివి పూర్తిగా మానుకోవాలి. అంతే కాకుండా మనస్సును ప్రశాంతంగా ఉంచుకోవాలి.

Also Read: శ్రావణ మాసంలో ఈ పూజలు చేస్తే.. అదృష్టమే అదృష్టం

5. దానధర్మాలు:
ఈ పవిత్ర మాసంలో దానధర్మాలు చేయడం వల్ల పుణ్యం లభిస్తుంది. ముఖ్యంగా నిరుపేదలకు.. అవసరమైన వారికి సహాయం చేయడం వల్ల దైవ అనుగ్రహం కలుగుతుంది.

శ్రావణ మాసం ఆధ్యాత్మిక సాధనకు, మనస్సును ప్రశాంతంగా ఉంచుకోవడానికి, భగవంతుని అనుగ్రహం పొందడానికి ఒక గొప్ప అవకాశం. ఈ నియమాలను పాటించడం ద్వారా శుభాలు, సంతోషం, ఐశ్వర్యం లభిస్తాయి.