Eclipse: గ్రహణం రోజు ఏం చేయాలి ? ఏం చేయకూడదో తెలుసా ?

Eclipse: గ్రహణం అనేది ఒక అద్భుతమైన సంఘటన. చంద్రుడు భూమికి, సూర్యునికి మధ్య వచ్చినప్పుడు సూర్యగ్రహణం, అలాగే భూమి సూర్యునికి, చంద్రునికి మధ్య వచ్చినప్పుడు చంద్రగ్రహణం ఏర్పడతాయి. గ్రహణాన్ని ఆధ్యాత్మికంగా, శాస్త్రీయంగా కూడా ప్రత్యేకంగా పరిగణిస్తారు. గ్రహణ సమయాన్ని సున్నితమైనదిగా భావించి కొన్ని నియమాలను కూడా పాటిస్తారు. గ్రహణం రోజున పాటించాల్సిన ముఖ్యమైన విషయాలను గురించి ఇప్పుడు తెలుసుకుందాం.

గ్రహణం రోజున చేయకూడనివి ?

1. గ్రహణాన్ని నేరుగా చూడకూడదు :

సూర్యగ్రహణాన్ని నేరుగా కంటితో చూడకూడదు. ఎందుకంటే.. సూర్యుని నుంచి వచ్చే అతినీలలోహిత కిరణాలు (UV rays) కంటి రెటీనాను తీవ్రంగా దెబ్బతీస్తాయి. దీని వల్ల శాశ్వత అంధత్వం కూడా రావచ్చు. గ్రహణాన్ని చూడాలనుకుంటే.. ప్రత్యేకమైన సోలార్ ఫిల్టర్డ్ గ్లాసెస్ లేదా టెలిస్కోప్ వంటి పరికరాలను ఉపయోగించాలి. నీటిలో ప్రతిబింబాన్ని చూసే ప్రయత్నం కూడా ప్రమాదకరం.

2. ఆహారం తీసుకోకూడదు:

గ్రహణం ప్రారంభానికి ముందు.. తరువాత ఆహారం తినవచ్చని పెద్దలు చెబుతారు. గ్రహణం సమయంలో.. వాతావరణంలో కొన్ని సూక్ష్మ మార్పులు వస్తాయని, దాని వల్ల ఆహారం కలుషితం కావచ్చని నమ్ముతారు. అందుకే.. గ్రహణం ప్రారంభానికి కొన్ని గంటల ముందు భోజనం చేయడం మంచిది. గ్రహణం ముగిసిన తర్వాతే తిరిగి ఆహారం తీసుకోవాలి. ఇప్పటికే వండిన ఆహార పదార్థాలు పాడవకుండా ఉండటానికి వాటిలో కొన్ని దర్భ గడ్డి లేదా తులసి ఆకులను వేయండి.

3. నిద్రపోకూడదు, విశ్రాంతి తీసుకోకూడదు:

గ్రహణ సమయంలో నిద్రపోవడం లేదా విశ్రాంతి తీసుకోవడం మంచిది కాదని నమ్ముతారు. ముఖ్యంగా గర్భిణీ స్త్రీలు, చిన్నపిల్లలు, వృద్ధులు అప్రమత్తంగా ఉండాలని చెబుతారు.

4. దేవాలయాలను దర్శించకూడదు:

గ్రహణ సమయాలలో దేవాలయాలను మూసివేస్తారు. ఆ సమయంలో దేవుడి విగ్రహాలను తాకడం, పూజలు చేయడం వంటివి చేయరు. గ్రహణం ముగిసిన తర్వాత ఆలయాలను శుభ్రం చేసి, తిరిగి పూజలు ప్రారంభిస్తారు.

గ్రహణం రోజున చేయాల్సినవి..

1. ధ్యానం, జపాలు చేయాలి :

గ్రహణ సమయాన్ని ఆధ్యాత్మిక కార్యకలాపాలకు అనుకూలమైనదిగా భావిస్తారు. ఈ సమయంలో ధ్యానం చేయడం, మంత్రాలు జపించడం, ఆధ్యాత్మిక గ్రంథాలు చదవడం వల్ల శుభ ఫలితాలు లభిస్తాయని నమ్మకం. ఈ సమయాన్ని ఆత్మపరిశీలనకు, మనస్సును ప్రశాంతంగా ఉంచుకోవడానికి ఉపయోగించుకోవచ్చు.

2. స్నానం చేయాలి :

గ్రహణం ముగిసిన తర్వాత తప్పనిసరిగా స్నానం చేయాలి. దీనిని గ్రహణ స్నానం అని పిలుస్తారు. ఈ స్నానం శరీరాన్ని, మనస్సును శుద్ధి చేస్తుందని నమ్ముతారు. వీలైనంత వరకు నదిలో లేదా చెరువులో స్నానం చేయడం మంచిదని చెబుతారు.

Also Read: ఇంటి గోడపై రావి చెట్టు పెరగడం శుభమా ? అశుభమా ?

3. దానధర్మాలు చేయాలి:

గ్రహణం తర్వాత పేదలకు లేదా అవసరమైన వారికి దానం చేయడం పుణ్యప్రదం. ఆహారం, దుస్తులు లేదా డబ్బు వంటివి దానం చేయడం వల్ల మంచి జరుగుతుందని భావిస్తారు.

4. పాత వస్తువులను, దుస్తులను విడిచిపెట్టాలి:

కొన్ని సంప్రదాయాల ప్రకారం.. గ్రహణం రోజున పాత దుస్తులను వదిలివేయడం, కొత్త దుస్తులు ధరించడం చేస్తారు. ఇది ఒక కొత్త ప్రారంభానికి సంకేతంగా భావిస్తారు.

ఈ సంప్రదాయాలన్నీ తరతరాలుగా వస్తున్నాయి. వీటిలో కొన్ని శాస్త్రీయ ఆధారాలను కలిగి ఉంటే, మరికొన్ని ఆధ్యాత్మిక విశ్వాసాలను బట్టి పాటిస్తారు. గ్రహణం అనేది ప్రకృతిలో ఒక భాగం. దీనిని గౌరవిస్తూ.. ఈ నియమాలను పాటించడం వల్ల శారీరకంగా, మానసికంగా ఆరోగ్యంగా ఉండవచ్చని నమ్మకం.