Best Tourist Places : జాలీగా వెళ్లి చూసి రాదగిన దేశాలివే…!

Best Tourist Places : అనుకున్నదే తడవుగా టూర్‌‌కి వెళ్లగలిగిన దేశాలూ కొన్ని ఉన్నాయని చాలామందికి తెలియదు. కేవలం పర్యాటకం మీదనే ఆధారపడే ఈ దేశాలకు యాత్రికులు ఎప్పుడుకావాలంటే అప్పుడు బయలుదేరొచ్చు. వీసా గట్రా అంటూ పెద్ద ప్రశ్నలుండవు. హాయిగా కోరినన్ని రోజులుండే వెసులుబాటూ ఉంది గనుక నచ్చినంతకాలం ఉండిపోవచ్చు. ఆ దేశాలు, అక్కడి ముచ్చట్లు ఇవే..

ఎల్ సల్వడార్ : ఎత్తైన ప్రదేశాల్లో ఇండ్లు, అడుగడుగునా జలపాతాలు, పచ్చని పొలాలుండే ఈ దేశంలో వీసా లేకుండా 90 రోజులు ఉండవచ్చు.

సెయింట్ లూసియా : అగ్నిపర్వత బీచ్‌లు, కలప శిల్పాలు, ప్రశాంత వాతావరణానికి పేరైన ఈ దేశంలో దిగగానే 42 రోజుల వీసా ఇస్తారు. కోరితే మళ్లీ పొడిగిస్తారు.

మడగాస్కర్ : ఒక భారీ ద్వీపం ఇది. ఇక్కడ అనేక జంతు జాతులు ఉన్నాయి. వెళ్లగానే 3 నెలల గడువుతో వీసా ఇస్తారు.

సమో : పగడపు దీవుల మడుగులు, అగ్ని పర్వత శిఖలు, లావా క్షేత్రాల దేశమిది. వీసా లేకుండా 30 రోజులు ఉండవచ్చు.

శ్రీలంక : ఈ బుల్లిదేశం పచ్చని ప్రకృతికి పెట్టింది పేరు. సముద్ర తీర ప్రాంతాలు, దట్టమైన అడవులంటే ఇష్టపడేవారు చూసితీరాల్సిన దేశం. ఎలక్ట్రానిక్ ట్రావెల్ ఆథరైజేషన్ అనే పద్ధతిలో ఈ దేశంలోకి అనుమతిస్తారు. గడువు 30 రోజులు ఉంటుంది.

టాంజానియా : అన్ని రకాల జంతు జాతులున్న అరుదైన దేశం. సఫారీలపై ప్రయాణిస్తూ వన్యప్రాణులను దగ్గగరగా చూడొచ్చు. ఇక్కడ దిగగానే గడువులేని వీసా ఇచ్చేస్తారు.

కంబోడియా : పురాతన బౌద్ధ ఆలయాలు, కోటలు, రాజప్రాసాదాలున్న అరుదైన దేశం. ఇక్కడికి వెళ్లిన తర్వాత 30 రోజుల గడువుతో వీసా ఇస్తారు.

నేపాల్ : ఈ హిమాలయ దేశం ప్రకృతి అందాలకు నెలవు. టిబెటన్ ఆరామాలు, ప్రాచీన ఆలయాలున్న ఈ దేశానికి వెళ్లాలనుకునే భారతీయులు జస్ట్.. ఇక్కడి ఓటరు కార్డు చూపిస్తే చాలు. మన రూపాయి కూడా అక్కడ చెల్లుతుంది.

భూటాన్ : కడిగిన ముత్యంలాంటి ఈ దేశం సంప్రదాయాలకు పెద్దపీట వేస్తుంది. కాలుష్యం అంటే ఏమిటో తెలియని ఈ దేశ ప్రజల కట్టు, బొట్టు అన్నీ ప్రత్యేకమే. ఇక్కడకు వెళ్లాలంటే వీసా అక్కర్లేదు. గడువు కూడా లేదు. నియమాలే కాస్త కఠినంగా ఉంటాయి.

మాల్దీవులు : మత్స్య పరిశ్రమ, సముద్ర ఉత్పత్తులపై ఆధారపడిన దక్షిణ హిందూమహాసముద్ర దేశం ఇది. నేరుగా వెళ్లాక.. 90 రోజుల గడువున్న వీసా ఇస్తారు.