Acid rain in Tehran: ఇరాన్ రాజధాని టెహ్రాన్లోని చమురు నిల్వ కేంద్రాలే లక్ష్యంగా ఇజ్రాయెల్ జరిపిన భారీ వైమానిక దాడులు ఇప్పుడు పర్యావరణ విపత్తుకు దారితీశాయి. దాడుల కారణంగా చమురు కేంద్రాల నుండి వెలువడిన భారీ పొగ, రసాయన వాయువుల వల్ల టెహ్రాన్ నగరంలో యాసిడ్ వర్షం కురుస్తోంది. ఈ పరిణామంపై ఇరాన్ ప్రభుత్వం అంతర్జాతీయ సమాజాన్ని ఉద్దేశించి భావోద్వేగపూరిత ప్రకటన విడుదల చేసింది. “హిరోషిమా వంటి దారుణాలు మరోసారి జరగవని ప్రపంచం మనకు హామీ ఇచ్చింది కదా? మరి ఇప్పుడు జరుగుతున్నదేంటి?” అని ఇరాన్ ప్రశ్నించింది.
1945లో అమెరికా జపాన్లోని హిరోషిమాపై అణుబాంబు వేసినప్పుడు, పేలుడు ధూళి, రేడియోధార్మికత మేఘాలతో కలిసి అత్యంత ప్రమాదకరమైన ‘నలుపు వర్షం’ (Black Rain) కురిసింది. ఆ వర్షం వల్ల అప్పట్లో వేలాది మంది అమాయకులు నెమ్మదిగా ప్రాణాలు కోల్పోయారు. ఇప్పుడు టెహ్రాన్ పరిస్థితి కూడా అలాగే ఉందని ఇరాన్ ఆరోపిస్తోంది. చమురు శుద్ధి కర్మాగారాల విధ్వంసం వల్ల గాలిలో కలిసిన విషపూరిత రసాయనాలు వర్షం రూపంలో కురుస్తూ ప్రజల ఆరోగ్యంపై, భవిష్యత్తు తరాలపై ఊహించని దుష్ప్రభావాలు చూపుతాయని ఇరాన్ హెచ్చరించింది.
చమురు క్షేత్రాల దహనం వల్ల వెలువడే సల్ఫర్ డయాక్సైడ్, నైట్రోజన్ ఆక్సైడ్లు వాతావరణంలోని తేమతో కలిసి సల్ఫ్యూరిక్, నైట్రిక్ యాసిడ్లుగా మారుతాయి. ఈ వర్షం వల్ల తాగునీటి వనరులు కలుషితమవుతాయి. ప్రజల్లో తీవ్రమైన చర్మ సమస్యలు, ఊపిరితిత్తుల వ్యాధులు వచ్చే ప్రమాదం ఉంది. పంట పొలాలు నాశనమై దీర్ఘకాలిక ఆహార కొరత ఏర్పడవచ్చు.
ఇరాన్ చేసిన ఈ వ్యాఖ్యలపై ఇజ్రాయెల్ లేదా అమెరికా ఇంకా అధికారికంగా స్పందించలేదు. అయితే, కేవలం సైనిక లక్ష్యాలనే తాము దెబ్బతీశామని ఇజ్రాయెల్ గతంలోనే స్పష్టం చేసింది. పర్యావరణాన్ని యుద్ధంలో ఆయుధంగా వాడుకోవడం అంతర్జాతీయ నిబంధనలకు విరుద్ధమని ఐక్యరాజ్యసమితి పర్యావరణ విభాగం ఆందోళన వ్యక్తం చేస్తోంది. యుద్ధం కేవలం క్షిపణులకు మాత్రమే పరిమితం కాకుండా, గాలిని, నీటిని కూడా విషపూరితం చేస్తుండటం ఇప్పుడు ప్రపంచ దేశాలను కలవరపెడుతోంది.
Read Also: ఇరాన్తో యుద్ధం.. ఇజ్రాయెల్ – అమెరికా మధ్య చీలికలు.. కోపంతో ఊగిపోయిన ట్రంప్!
Share
Child Welfare Dept: సొంత జిల్లాలో ఉద్యోగం చేసే ఛాన్స్.. మంచి వేతనం, పూర్తి వివరాలివే
LPG Cylinder Booking: ఎల్పీజీ గ్యాస్ పై కేంద్రం కీలక నిర్ణయం.. బుకింగ్ గడువు 25 రోజులకు పెంపు
