Vladimir Putin: పుతిన్ నివాసమే లక్ష్యంగా డ్రోన్ల దాడి.. రష్యా సంచలన వీడియో విడుదల

ఉక్రెయిన్ సరిహద్దుల్లో ఉద్రిక్తతలు మరోసారి పీక్ లెవల్ కు చేరుకున్నాయి. రష్యా అధ్యక్షుడు వ్లాదిమిర్ పుతిన్ వ్యక్తిగత నివాసమే లక్ష్యంగా ఉక్రెయిన్ భారీ స్థాయిలో డ్రోన్ దాడులకు పాల్పడిందని ఆ దేశ ప్రభుత్వం సంచలన ప్రకటన చేసింది. నోవ్‌గొరొడ్ ప్రాంతంలోని పుతిన్ నివాసంపై ఏకకాలంలో 91 డ్రోన్లతో ఉక్రెయిన్ దాడికి ప్రయత్నించిందని రష్యా రక్షణ శాఖ వెల్లడించింది. అయితే, రష్యా ఎయిర్ డిఫెన్స్ వ్యవస్థలు ఈ డ్రోన్లన్నింటినీ గాలిలోనే కూల్చివేసి.. భారీ ప్రమాదాన్ని తప్పించాయని తమ దేశ అధికారులు పేర్కొన్నారు.

రష్యా ఈ ఘటనను తీవ్రంగా పరిగణిస్తోంది. దీనిని కేవలం సైనిక దాడిగానే కాకుండా.. దేశాధినేత ప్రాణాలకు ముప్పు తలపెట్టే ఉగ్రవాద చర్యగా అభివర్ణించింది. ఈ పరిణామం నేపథ్యంలో అంతర్జాతీయంగా జరుగుతున్న శాంతి చర్చల ప్రక్రియకు విఘాతం కలిగే అవకాశం ఉందని రష్యా హెచ్చరించింది. తాము శాంతి చర్చలపై తమ వైఖరిని పునఃసమీక్షిస్తామని.. అవసరమైతే తగిన రీతిలో ప్రతీకారం తీర్చుకుంటామని రష్యా విదేశాంగ శాఖ స్పష్టం చేసింది. ఈ పరిణామం యుద్ధం మరో ప్రమాదకర మలుపు తిరుగుతుందన్న ఆందోళనలను పెంచుతోంది.

మరోవైపు.. రష్యా చేస్తున్న ఈ ఆరోపణలను ఉక్రెయిన్ అధ్యక్షుడు జెలెన్‌స్కీ తీవ్రంగా ఖండించారు. ఇవన్నీ రష్యా సృష్టించిన కట్టు కథలని ఆయన కొట్టిపారేశారు. అంతర్జాతీయ సమాజం దృష్టి మళ్లించడానికి.. రాబోయే రోజుల్లో ఉక్రెయిన్‌పై మరిన్ని క్రూరమైన దాడులు చేసేందుకు రష్యా ఈ డ్రామా ఆడుతోందని జెలెన్‌స్కీ విమర్శించారు. తాము కేవలం తమ భూభాగాన్ని రక్షించుకోవడానికే పోరాడుతున్నామని.. ఇటువంటి ఉగ్రవాద చర్యలకు పాల్పడాల్సిన అవసరం తమకు లేదని ఆయన స్పష్టం చేశారు.

ప్రస్తుతం ఈ ఘటనకు సంబంధించిన కొన్ని వీడియోలు సోషల్ మీడియాలో వైరల్ అవుతున్నాయి. రష్యా గగనతలంలో డ్రోన్లను కూల్చివేస్తున్న దృశ్యాలు అందులో కనిపిస్తున్నాయి. అయితే, ఈ వీడియోల ప్రామాణికతపై భిన్నాభిప్రాయాలు వ్యక్తమవుతున్నాయి. రష్యా, ఉక్రెయిన్ దేశాల మధ్య మాటల యుద్ధం ముదురుతుండటంతో ప్రపంచ దేశాలు ఆందోళన వ్యక్తం చేస్తున్నాయి. ఈ ఉద్రిక్తతలు అణ్వాయుధ యుద్ధానికి దారితీయకుండా చూడాలని ఐక్యరాజ్యసమితి మరియు ఇతర దేశాలు కోరుతున్నాయి.

ALSO READ: Vemulawada: కంటి మీదు కునుకు లేకుండా చేస్తున్న చిరుత.. భయం గుప్పిట్లో వేములవాడ ప్రజలు, ముఖ్యంగా ఈ గ్రామాల్లో..?

పుతిన్ నివాసంపై దాడి.. వీడియో విడుదల చేసిన రష్యా

రష్యా అధ్యక్షుడు పుతిన్ నివాసమే లక్ష్యంగా ఉక్రెయిన్ 91 డ్రోన్లతో దాడికి యత్నించిందని రష్యా సంచలన ఆరోపణ చేసింది. నోవ్‌గొరొడ్‌లోని పుతిన్ వ్యక్తిగత నివాసంపై జరిగిన ఈ దాడిని రష్యా సైన్యం విజయవంతంగా అడ్డుకుంది. దీనిని "ఉగ్రవాద చర్య"గా… pic.twitter.com/HYaPpS2Lsa

— ChotaNews App (@ChotaNewsApp) December 31, 2025