ఇజ్రాయెల్ – లెబనాన్ మధ్య 10 రోజుల సీజ్‌ఫైర్: డొనాల్డ్ ట్రంప్

Israel Lebanon 10 day ceasefire: మధ్యప్రాచ్యంలో శాంతి దిశగా ఒక కీలక ముందడుగు పడింది. ఇజ్రాయెల్.. లెబనాన్ మధ్య 10 రోజుల పాటు తాత్కాలిక కాల్పుల విరమణ (Ceasefire) అమలు కానున్నట్లు అమెరికా అధ్యక్షుడు డొనాల్డ్ ట్రంప్ సంచలన ప్రకటన చేశారు.

వాషింగ్టన్‌లో ఇరు దేశాల ప్రతినిధులు భేటీ కావడాన్ని ట్రంప్ ఒక చారిత్రక విజయంగా అభివర్ణించారు. గత 34 ఏళ్లలో ఇజ్రాయెల్, లెబనాన్ దేశాల నేతలు ఇలా ప్రత్యక్షంగా కలుసుకోవడం ఇదే తొలిసారి అని ఆయన గుర్తు చేశారు. “శాంతిని నెలకొల్పేందుకు ఇరు దేశాల అధినేతలు గొప్ప సాహసం చేశారు. ఈ 10 రోజుల సీజ్‌ఫైర్ ఒక శాశ్వత శాంతి ఒప్పందానికి పునాది కాబోతోంది” అని ట్రంప్ ధీమా వ్యక్తం చేశారు.

తన దౌత్య నీతి ద్వారా ఇప్పటివరకు ప్రపంచవ్యాప్తంగా తొమ్మిది యుద్ధాలను ఆపానని, ఇప్పుడు ఇజ్రాయెల్-లెబనాన్ మధ్య కాల్పుల విరమణ తాను ఆపిన పదో యుద్ధం కాబోతోందని ట్రంప్ తన ‘ట్రూత్ సోషల్’ ఖాతాలో పేర్కొన్నారు. అగ్రరాజ్యాల మధ్య మధ్యవర్తిత్వం వహించడంలో తనకంటూ ఒక ప్రత్యేక శైలి ఉందని ఆయన మరోసారి చాటుకున్నారు.

గత కొన్నాళ్లుగా సరిహద్దుల్లో హెజ్బొల్లా లక్ష్యంగా ఇజ్రాయెల్ దాడులు, ప్రతిగా లెబనాన్ వైపు నుంచి దాడులతో ఈ ప్రాంతం యుద్ధ ప్రాతిపదికన ఉంది. ఈ 10 రోజుల విరామం వల్ల మానవతా దృక్పథంతో సహాయక చర్యలు చేపట్టడానికి, అలాగే ప్రజలు సురక్షిత ప్రాంతాలకు వెళ్లడానికి వీలు కలుగుతుంది. అయితే, ఈ తక్కువ కాల పరిమితి తర్వాత యుద్ధం మళ్ళీ కొనసాగుతుందా లేక దీర్ఘకాలిక ఒప్పందం కుదురుతుందా అన్నది ఉత్కంఠగా మారింది.