గుడ్ న్యూస్.. 86 లెక్చరర్ పోస్టుల భర్తీకి టీజీపీఎస్సీ నోటిఫికేషన్

TGPSC Lecturer Recruitment 2026: తెలంగాణలో ప్రభుత్వ ఉద్యోగాల జాతర కొనసాగుతోంది. ఇటీవల వరుసగా భారీ నోటిఫికేషన్లు విడుదల చేస్తున్న తెలంగాణ పబ్లిక్ సర్వీస్ కమిషన్ (TGPSC), తాజాగా విద్యాశాఖలో మరో కీలక ప్రకటన చేసింది. రాష్ట్రంలోని విద్యాసంస్థల్లో ఖాళీగా ఉన్న లెక్చరర్ , సీనియర్ లెక్చరర్ పోస్టుల భర్తీకి రిక్రూట్‌మెంట్ నోటిఫికేషన్‌ను జారీ చేసింది. మొత్తం 86 పోస్టులతో వచ్చిన ఈ నోటిఫికేషన్, టీచింగ్ రంగంలో స్థిరపడాలనుకునే నిరుద్యోగులకు ఒక అద్భుతమైన అవకాశం. ఈ ఉద్యోగాలకు సంబంధించిన అర్హతలు, ఎంపిక విధానం, వయోపరిమితి, దరఖాస్తు చేసుకోవడానికి చివరి తేదీ వంటి పూర్తి వివరాలు ఇప్పుడు చూద్దాం.

టీజీపీఎస్సీ లెక్చరర్ నోటిఫికేషన్: ఖాళీల వివరాలు:
తెలంగాణ పబ్లిక్ సర్వీస్ కమిషన్ (TGPSC) విద్యాసంస్థల్లో ఖాళీలను భర్తీ చేసేందుకు వేగంగా అడుగులు వేస్తోంది. దీనిలో భాగంగానే రవాణా, రోడ్ల భవనాల శాఖ నోటిఫికేషన్ల తర్వాత ఇప్పుడు విద్యాశాఖపై ఫోకస్ పెట్టింది. ప్రస్తుతం మొత్తం 86 లెక్చరర్ , సీనియర్ లెక్చరర్ పోస్టుల భర్తీ కోసం అర్హులైన అభ్యర్థుల నుంచి దరఖాస్తులను ఆహ్వానిస్తోంది. రాష్ట్రవ్యాప్తంగా ఉన్న నిరుద్యోగులు ఈ పోస్టులకు ఆన్‌లైన్ ద్వారా మాత్రమే అప్లై చేసుకోవాల్సి ఉంటుంది. ఈ ఉద్యోగాల నియామక ప్రక్రియ అంతా కూడా కమిషన్ నిబంధనల ప్రకారం అత్యంత పారదర్శకంగా జరగనుంది.

కావలసిన అర్హతలు, వయోపరిమితి:

ఈ లెక్చరర్ పోస్టులకు అప్లై చేయాలనుకునే అభ్యర్థులు సంబంధిత సబ్జెక్టులలో పీజీ (Post Graduation) లేదా పీహెచ్‌డీ (PhD) లేదా నెట్/స్లెట్ (NET/SLET) వంటి ప్రభుత్వ గుర్తింపు పొందిన విద్యా అర్హతలను కలిగి ఉండాలి. సీనియర్ లెక్చరర్ పోస్టులకైతే అదనంగా నిర్దేశిత టీచింగ్ అనుభవం కూడా అవసరమవుతుంది.

వయస్సు విషయానికి వస్తే.. అభ్యర్థుల కనీస వయస్సు 18 సంవత్సరాలు నిండి ఉండాలి. ప్రభుత్వం ఇటీవల సాధారణ గరిష్ట వయోపరిమితిని 44 సంవత్సరాల వరకు పెంచడం వల్ల, ఈ నోటిఫికేషన్ ద్వారా మరింత మంది సీనియర్ అభ్యర్థులకు లెక్చరర్ అయ్యే సువర్ణావకాశం లభించనుంది. ఎస్సీ, ఎస్టీ, బీసీ, ఈడబ్ల్యూఎస్ వర్గాలకు నిబంధనల ప్రకారం అదనపు వయో సడలింపులు కూడా వర్తిస్తాయి.

దరఖాస్తు విధానం, చివరి తేదీ:
ఈ పోస్టులకు అప్లికేషన్ ప్రక్రియ పూర్తిగా ఆన్‌లైన్ పద్ధతిలోనే సాగుతుంది. ఆసక్తి ఉన్న అభ్యర్థులు టీజీపీఎస్సీ అధికారిక వెబ్‌సైట్ (https://www.tgpsc.gov.in) సందర్శించి అప్లై చేసుకోవాలి. అయితే, అప్లై చేయడానికి కంటే ముందే అభ్యర్థులు తమ వన్ టైమ్ రిజిస్ట్రేషన్ (OTR) ను లేటెస్ట్ విద్యార్హతల వివరాలతో అప్‌డేట్ చేసుకోవడం తప్పనిసరి.

ఈ లెక్చరర్ ఉద్యోగాలకు ఆన్‌లైన్ ద్వారా అప్లై చేసుకోవడానికి జులై 29 వరకు ఆఖరి గడువుగా నిర్ణయించారు. రాత పరీక్షఆధారంగానే అభ్యర్థుల తుది ఎంపిక ఉంటుంది.