Quality Sleep: మంచి నిద్ర కోసం ఎలాంటి టిప్స్ ఫాలో అవ్వాలంటే ?

Quality Sleep: ప్రతి మనిషి ఆరోగ్యానికి.. చురుకుదనానికి, మానసిక ప్రశాంతతకు నాణ్యమైన నిద్ర చాలా అవసరం. నిద్ర సరిగా లేకపోతే రోజంతా నీరసంగా, చిరాకుగా ఉండటమే కాకుండా.. దీర్ఘకాలంలో అనేక ఆరోగ్య సమస్యలకు దారి తీస్తుంది. అందుకే రాత్రిపూట మన నిద్ర నాణ్యతను మెరుగుపరుచుకోవడానికి కొన్ని అలవాట్లను పాటించడం ముఖ్యం.
నాణ్యమైన నిద్ర కోసం పాటించాల్సిన 5 అలవాట్లు ఏంటో ఇప్పుడు తెలుసుకుందాం.

మంచి నిద్ర కోసం చక్కటి చిట్కాలు !

1. ఖచ్చితమైన  టైం: మీరు పాటించాల్సిన అత్యంత ముఖ్యమైన అలవాటు ఇది. వారాంతాల్లో సహా.. ప్రతిరోజూ ఒకే సమయానికి పడుకోవడానికి, మేల్కొనడానికి ప్రయత్నించండి. మన శరీరానికి ఒక అంతర్గత గడియారం ఉంటుంది. ప్రతి రోజు సరైన సమయం పాటిస్తే అది ఈ గడియారాన్ని నియంత్రిస్తుంది. తద్వారా నిద్రపోవడం, ఉదయం మేల్కొనడం సులభం అవుతుంది.ఇదిలా ఉంటే డైలీ 7-9 గంటల నిద్ర ఉండేలా చూసుకోవాలి. దీనిని రోజూ కచ్చితంగా పాటిస్తే.. మీ శరీరానికి అలవాటయ్యి, సహజంగానే నిద్ర వస్తుంది.

2. స్క్రీన్లకు దూరం: నేటి డిజిటల్ యుగంలో చాలా మంది నిద్రపోయే ముందు మొబైల్ ఫోన్లు, ల్యాప్‌టాప్‌లు లేదా టీవీ చూడటం అలవాటు చేసుకున్నారు. అయితే.. ఈ ఎలక్ట్రానిక్ పరికరాల నుంచి వచ్చే నీలి కాంతి ‘మెలటోనిన్’ అనే నిద్ర హార్మోన్ ఉత్పత్తికి ఆటంకం కలిగిస్తుంది. మెలటోనిన్ మన నిద్ర మేల్కొలుపు చక్రాన్ని నియంత్రిస్తుంది. కాబట్టి.. నిద్రపోయే కనీసం ఒక గంట ముందు నుంచే అన్ని స్క్రీన్‌లను పక్కన పెట్టండి. దీనికి బదులుగా పుస్తకం చదవడం లేదా నిశ్శబ్ద సంగీతం వినడం వంటి విశ్రాంతినిచ్చే పనులపై దృష్టి పెట్టండి.

3. విశ్రాంతినిచ్చే బెడ్‌టైమ్ రొటీన్ : నిద్రపోయే ముందు ప్రశాంతమైన రొటీన్‌ను అలవర్చుకోవడం మనసుకు, శరీరానికి విశ్రాంతి తీసుకోవడానికి సహాయ పడుతుంది. ఈ రొటీన్ 30 నిమిషాల నుంచి గంట వరకు ఉంటుంది. ఉదాహరణకు..

గోరువెచ్చని స్నానం: వెచ్చని నీటి స్నానం శరీర ఉష్ణోగ్రతను తగ్గించి.. నిద్రను ప్రేరేపిస్తుంది.

మెడిటేషన్ లేదా ధ్యానం: కొన్ని నిమిషాల ధ్యానం లేదా లోతైన శ్వాస వ్యాయామాలు చేయడం వల్ల రోజువారీ ఒత్తిడి, అనవసర ఆలోచనలు తగ్గుతాయి. తద్వారా త్వరగా నిద్ర పడుతుంది.

వెచ్చని పాలు లేదా హెర్బల్ టీ: కెఫిన్ లేని చమోమైల్ టీ లేదా పసుపు పాలు తాగడం మంచిది.

4. బెడ్ రూం వాతావరణం: మీ బెడ్ రూంను ప్రశాంతమైన నిద్రకు అనువుగా ఉండాలి. నిద్రకు అనువైన వాతావరణం కోసం..

చీకటి: గదిలో వీలైనంత చీకటి ఉండేలా చూసుకోండి. అవసరమైతే మందపాటి కర్టెన్లు వాడండి. చిన్నపాటి వెలుతురు కూడా నిద్రకు ఆటంకం కలిగిస్తుంది.

చల్లదనం: నిద్రకు కొద్దిగా చల్లని ఉష్ణోగ్రత (సుమారు 18-20°C) ఉత్తమంగా ఉంటుంది.

నిశ్శబ్దం: శబ్దాలు లేకుండా నిశ్శబ్దంగా ఉండేలా చూసుకోండి.

సౌకర్యం: మీ పరుపు, దిండు సౌకర్యవంతంగా ఉన్నాయని నిర్ధారించుకోండి. అలాగే.. మంచాన్ని నిద్రకు మాత్రమే ఉపయోగించాలి. పని చేయడానికి లేదా టీవీ చూడటానికి కాదు.

5. రాత్రి భోజనం, కెఫిన్‌పై వాడకం: నిద్ర నాణ్యతను ప్రభావితం చేసే ముఖ్యమైన అంశం ఆహారం.

తేలికపాటి భోజనం: రాత్రిపూట భారీ భోజనం చేయడం మానుకోండి. నిద్రపోయే కనీసం 2-3 గంటల ముందు భోజనం పూర్తి చేయాలి. ఇది జీర్ణక్రియకు తగినంత సమయం ఇస్తుంది.

కెఫిన్, ఆల్కహాల్ నివారణ: మధ్యాహ్నం తర్వాత లేదా సాయంత్రం వేళల్లో కెఫిన్ (కాఫీ, టీ, కూల్ డ్రింక్స్) తీసుకోవడం పూర్తిగా మానుకోవాలి. ఎందుకంటే కెఫిన్ ప్రభావం ఎక్కువ గంటలు ఉంటుంది. ఆల్కహాల్ వల్ల మొదట్లో నిద్ర వచ్చినట్టు అనిపించినా.. అది నిద్ర నాణ్యతను తగ్గిస్తుంది.

ఈ ఐదు రాత్రిపూట అలవాట్లను మీ లైఫ్ స్టైల్ లో భాగం చేసుకోవడం ద్వారా మీరు నాణ్యమైన, ప్రశాంతమైన నిద్రను సొంతం చేసుకోవచ్చు. మంచి నిద్ర అనేది కేవలం విశ్రాంతి మాత్రమే కాదు.. మీ శారీరక, మానసిక ఆరోగ్యం, ఉత్పాదకతకు పునాది వంటిది. కాబట్టి.. ఈ అలవాట్లను క్రమంగా పాటిస్తూ ఆరోగ్యకరమైన జీవితాన్ని గడపండి.

Share

• 
• 
• 
• 
• 
•