ఆఫీసులో కూర్చొని గంటల తరబడి పనిచేస్తన్నారా? ఆరోగ్యంగా ఉండాలంటే ఈ జాగ్రత్తలు తప్పనిసరి

రోజూ వ్యాయామం చేస్తే ఆరోగ్యంగా ఉంటామని చాలా మంది భావిస్తారు. అయితే వైద్యుల అభిప్రాయం ప్రకారం రోజులో కొంతసేపు వ్యాయామం చేయడం మాత్రమే కాదు, రోజంతా శరీరాన్ని కదిలించడం కూడా అంతే ముఖ్యమైన విషయం. ప్రస్తుతం చాలా మంది ఉద్యోగాలు, పనుల కారణంగా గంటల తరబడి ఒకే చోట కూర్చుంటున్నారు. ఈ అలవాటు దీర్ఘకాలంలో అనేక ఆరోగ్య సమస్యలకు దారితీస్తుందని నిపుణులు హెచ్చరిస్తున్నారు.

ఎక్కువసేపు కూర్చోవడం శరీరానికి హానికరం

మన శరీరం సహజంగా కదలిక కోసం రూపొందించబడింది. కానీ ఒకే చోట గంటల పాటు కూర్చోవడం వల్ల కండరాలు, కీళ్లపై ఒత్తిడి పెరుగుతుంది. దీనివల్ల వెన్నునొప్పి, మెడ నొప్పి, మోకాళ్ల బిగుతు వంటి సమస్యలు రావచ్చు. అలాగే శరీర సౌష్టవం తగ్గి, కండరాల బలం కూడా క్రమంగా తగ్గిపోతుంది. ఆర్థోపెడిక్ నిపుణుడు డాక్టర్ అభిషేక్ వైశ్ ప్రకారం.. చాలామంది ప్రతిరోజూ వ్యాయామం చేసినప్పటికీ కీళ్ల సమస్యలతో వస్తుంటారు. ఇందుకు ప్రధాన కారణం ఎక్కువసేపు కూర్చోవడమే. కాబట్టి శరీరానికి తరచూ కదలిక అవసరం అని ఆయన సూచిస్తున్నారు.

ఎంతసేపుకి ఒకసారి లేవాలి?

ఆరోగ్య నిపుణులు ప్రతి 30 నుంచి 60 నిమిషాలకు ఒకసారి కుర్చీ నుంచి లేవాలని సూచిస్తున్నారు. ఇందుకోసం ప్రత్యేకంగా కఠినమైన వ్యాయామాలు చేయాల్సిన అవసరం లేదు. గదిలో కొద్దిసేపు నడవడం, చేతులు కాళ్లు చాపడం లేదా నీళ్లు తాగడానికి వెళ్లడం వంటి చిన్న కదలికలు కూడా ఉపయోగకరంగా ఉంటాయి. సాధారణంగా ఒక పనిదినంలో కనీసం 8 నుంచి 10 సార్లు అయినా శరీరాన్ని కదిలించాలని సూచిస్తున్నారు. కొందరు రోజుకు 30 నుంచి 50 సార్లు కుర్చీ నుంచి లేచి కూర్చోవడం ద్వారా మరింత ప్రయోజనం పొందవచ్చు.

కీళ్లు, కండరాల ఆరోగ్యానికి మంచిది

తరచూ కదలడం వల్ల రక్త ప్రసరణ మెరుగుపడుతుంది. దీంతో శరీరంలోని అన్ని భాగాలకు ఆక్సిజన్ సరఫరా సక్రమంగా జరుగుతుంది. అలాగే నడుముపై పడే ఒత్తిడి తగ్గి, తుంటి, మోకాళ్ల కీళ్లు చురుకుగా ఉంటాయి. ఇలాంటి చిన్న కదలికలు వెన్నెముకకు మద్దతు ఇచ్చే కోర్ కండరాలను కూడా చురుకుగా ఉంచుతాయి. ఆర్థరైటిస్ లేదా దీర్ఘకాలిక వెన్నునొప్పితో బాధపడేవారికి ఇవి మరింత ఉపశమనం కలిగిస్తాయి.

బరువు తగ్గడానికి సహాయపడుతుంది

లేచి నిలబడటం, కొద్దిసేపు నడవడం వల్ల శరీరం అదనపు కేలరీలను ఖర్చు చేస్తుంది. ఇది బరువు నియంత్రణకు సహాయపడుతుంది. అలాగే రక్తంలో చక్కెర స్థాయిలను సమతుల్యంగా ఉంచడంలో కూడా ఉపయోగపడుతుంది. మధుమేహం, ఊబకాయం, గుండె జబ్బులు వంటి సమస్యల ప్రమాదాన్ని తగ్గించడంలో క్రమంగా కదులుతూ ఉండాలి.

Also Read: అతిగా వ్యాయామం చేస్తే పిల్లలు పుట్టడం కష్టం.. నిజమేనా? నిపుణలు ఏం చెబుతున్నారంటే

వృద్ధులకు ప్రత్యేక ప్రయోజనాలు

వృద్ధులు తరచూ కుర్చీ నుంచి లేచి కూర్చోవడం వల్ల తొడలు, పిరుదులు, కోర్ కండరాలు బలపడతాయి. ఈ కండరాలు నడక, మెట్లు ఎక్కడం, సమతుల్యతను కాపాడుకోవడంలో ముఖ్య పాత్ర పోషిస్తాయి. కండరాల బలం పెరగడం వల్ల పడిపోవడం వంటి ప్రమాదాలు తగ్గుతాయి. దీంతో వారు ఎక్కువకాలం స్వతంత్రంగా జీవించే అవకాశం ఉంటుంది.

30 సెకన్ల చెయిర్ స్టాండ్ టెస్ట్

శరీర బలం ఎంత ఉందో తెలుసుకోవడానికి నిపుణులు 30 సెకన్ల చెయిర్ స్టాండ్ పరీక్షను సూచిస్తున్నారు. కుర్చీలో కూర్చుని చేతుల సహాయం లేకుండా 30 సెకన్లలో ఎన్ని సార్లు లేచి కూర్చోగలరో లెక్కించాలి. మంచి స్కోరు వస్తే కాళ్ల కండరాల బలం, శరీర చురుకుదనం బాగున్నట్లు భావిస్తారు.

చిన్న అలవాట్లు పెద్ద ప్రయోజనాలు ఇస్తాయి

రోజంతా చిన్న చిన్న కదలికలు చేయడం వల్ల ఆరోగ్యం గణనీయంగా మెరుగుపడుతుంది. పనిలో ఉన్నప్పుడు రిమైండర్లు పెట్టుకుని ప్రతి గంటకోసారి లేవడం అలవాటు చేసుకోవాలి. ఈ చిన్న మార్పు శరీరానికి పెద్ద మేలు చేస్తుంది. కాబట్టి రోజూ వ్యాయామంతో పాటు తరచూ కదలడం కూడా ఆరోగ్యకరమైన జీవితానికి అవసరం.