Workouts In Pregnancy| గర్భధారణ సమయంలో మహిళలు తమ ఆరోగ్యంపై ప్రత్యేక శ్రద్ధ తీసుకోవాలి. ముఖ్యంగా బిడ్డ ఎదుగుతున్న కొద్దీ శరీరంలో అనేక మార్పులు చోటుచేసుకుంటాయి. ఈ సమయంలో వ్యాయామం చేయడం మంచిదేనా అనే సందేహం చాలామందికి ఉంటుంది. అయితే, వైద్యుల సూచనలతో చేసే తేలికపాటి వ్యాయామాలు తల్లికి, బిడ్డకు ఎన్నో ప్రయోజనాలు అందిస్తాయి. తాజాగా నటి సమంత తన తొమ్మిదో నెల గర్భధారణలోనూ వెయిటెడ్ స్క్వాట్స్ చేస్తూ అందరినీ ఆశ్చర్యపరిచింది.
ప్రెగ్నెన్సీ సమయంలోనూ సమంత తన ఫిట్‌నెస్ ప్రయాణానికి సంబంధించిన వీడియోను సోషల్ మీడియాలో షేర్ చేసింది. గర్భధారణ మొదటి నెల నుంచి తొమ్మిదో నెల వరకు తను చేసిన వ్యాయామాలను ఈ వీడియోలో చూపించింది. తాజా వీడియోలో సమంత చేతిలో డంబెల్ పట్టుకుని వెయిటెడ్ స్క్వాట్స్ చేస్తూ కనిపించింది. ఈ వీడియోకి ‘ది ఫైనల్ ల్యాప్’ అనే క్యాప్షన్ పెట్టింది. అంటే తన గర్భధారణ ప్రయాణం చివరి దశకు చేరుకుందని సూచిక.
గర్భధారణ సమయంలో శరీరంలో వచ్చే మార్పులకు అనుగుణంగా వ్యాయామాలను మార్చుకున్నట్లు గతంలో సమంత తెలిపింది. ఎక్కువగా శ్రమించడం కంటే శరీరం చెప్పే సంకేతాలను అర్థం చేసుకోవడం ముఖ్యమని ఆమె వివరించారు. వైద్యుల సలహాతోనే స్ట్రెంత్ ట్రైనింగ్ కొనసాగించినట్లు వెల్లడించింది.
గర్భధారణ సమయంలో బరువు పెరగడం సహజం. అయితే, అధిక బరువు పెరగడం వల్ల గర్భధారణ మధుమేహం, అధిక రక్తపోటు వచ్చే ప్రమాదం ఉంటుంది. క్రమం తప్పకుండా వ్యాయామం చేయడం ఆరోగ్యకరమైన బరువును నిర్వహించడంలో సహాయపడుతుంది.
బిడ్డ పెరుగుతున్న కొద్దీ తల్లి శరీర బరువు పెరుగుతుంది. దీనివల్ల నడుము, వెన్నుపై ఒత్తిడి ఎక్కువవుతుంది. తేలికపాటి వ్యాయామాలు, స్ట్రెచింగ్ చేయడం వల్ల కండరాలు బలపడతాయి. తద్వారా నొప్పి, అసౌకర్యం తగ్గుతాయి.
గర్భధారణ సమయంలో తల్లి గుండె.. తల్లికి, బిడ్డకు ఆక్సిజన్ అందించడానికి ఎక్కువగా పనిచేస్తుంది. వ్యాయామం మితంగా చేస్తుంటే రక్త ప్రసరణ మెరుగుపడుతుంది. గుండె ఆరోగ్యాన్ని కూడా కాపాడుతుంది.
వ్యాయామం చేయడం వల్ల కండరాలు రక్తంలోని గ్లూకోజ్‌ సమర్థంగా ఉపయోగించుకుంటాయి. దీనివల్ల రక్తంలో షుగర్ లెవెల్స్ నియంత్రణకు సహాయపడుతుంది. గర్భధారణ మధుమేహం వచ్చే ప్రమాదం కూడా తగ్గవచ్చు.
గర్భధారణ సమయంలో హార్మోన్ల మార్పులతో మానసిక ఒత్తిడి, ఆందోళన కలగవచ్చు. నడక, స్విమ్మింగ్, ప్రీనేటల్ యోగా వంటి వ్యాయామాలు మనసుకు ప్రశాంతతను అందిస్తాయి. నిద్ర నాణ్యతను మెరుగుపరచడంలో కూడా సహాయపడతాయి.
ప్రసవ సమయంలో శరీరానికి ఎక్కువ శక్తి, ఓర్పు అవసరం. తగిన వ్యాయామాలు కాళ్లు, వెన్ను, పెల్విక్ ఫ్లోర్ కండరాలను బలపరుస్తాయి. ఇవి ప్రసవానికి శరీరాన్ని సిద్ధం చేయడంలో సహాయపడతాయి.
అమెరికన్ కాలేజ్ ఆఫ్ అబ్స్టెట్రిషియన్స్ అండ్ గైనకాలజిస్ట్స్ ప్రకారం.. సాధారణ గర్భధారణ సమయంలో వ్యాయామం ప్రయోజనకరంగా ఉంటుంది. ఇది గర్భధారణ మధుమేహం, ప్రీక్లాంప్సియా ప్రమాదాలను తగ్గించవచ్చు.
Also Read: రూ.5 చిప్స్ ప్యాకెట్‌ కొంటే మోసం.. లేస్ కంపెనీకి రూ.8,000 జరిమానా విధించిన కోర్టు
వైద్యపరమైన సమస్యలు లేని గర్భిణులు వారానికి కనీసం 150 నిమిషాల మితమైన వ్యాయామం చేయవచ్చు.
Also Read: ‘నన్ను చంపాలనుకుంటోంది’.. ఉపవాసం ఉండలేదని భార్యపై పోలీసులకు ఫిర్యాదు చేసిన భర్త
ప్రతి మహిళ గర్భధారణ పరిస్థితి భిన్నంగా ఉంటుంది. అందువల్ల వ్యాయామం ప్రారంభించే ముందు వైద్యులను సంప్రదించాలి. నొప్పి, తల తిరగడం లేదా అసౌకర్యం కలిగితే వెంటనే వ్యాయామం ఆపాలి. ముఖ్యంగా శరీరం ఇచ్చే సంకేతాలను గమనిస్తూ వైద్యుల సూచనలు పాటించాలి.
గమనిక: ఈ కథనంలోని సమాచారం సాధారణ అవగాహన కోసం మాత్రమే. ఇది వైద్యుల సలహాకు ప్రత్యామ్నాయం కాదు. గర్భధారణ సమయంలో వ్యాయామాలు చేసే ముందు తప్పనిసరిగా వైద్యులను సంప్రదించండి.
Share
ఎంత కష్టపడి పనిచేసినా ఆర్థిక ఇబ్బందులు పీడిస్తున్నాయా? దీనికి కారణం వాస్తు దోషమేనా?
చదువు మధ్యలోనే ఆపేసి రోజుకు రూ.100 కూలీ పని చేసిన యువతి.. కట్ చేస్తే రూ.2 లక్ష కోట్ల బిజినెస్కు అధిపతి
