సండే రోజు ‘బోన్ మారో మసాలా’ ఇలా చేశారంటే.. ఇంట్లో వాళ్లందరూ లొట్టలేసుకుంటూ తింటారు!

Mutton Bone Marrow Masala: మటన్‌తో రకరకాల వంటకాలు చేసుకుని తిన్నా.. బోన్ మారో మసాలా రుచి మాత్రం ప్రత్యేకమే. ఎముకల్లోని మజ్జిగల మృదువైన రుచి, ఘాటైన మసాలాలు, ఉల్లిపాయలు, టమోటాల కలయికతో ఈ వంటకం ఎంతో రుచిగా ఉంటుంది. ముఖ్యంగా వేడివేడి అన్నంలోకి లేదా చపాతీ, రోటీల్లోకి ఈ మసాలా కూరను తింటే అద్భుతంగా ఉంటుంది. రెస్టారెంట్ స్టైల్‌లో ఉండే ఈ వంటకాన్ని ఇంట్లోనే సులభంగా తయారు చేసుకోవచ్చు. మసాలాలు బాగా పట్టి, బోన్ మారో నుంచి వచ్చే రుచితో కూర చిక్కగా తయారైతే తిన్నవాళ్లు మరో ముద్ద అడగకుండా ఉండలేరు. మరి ఇంకెందుకు ఆలస్యం.. నోరూరించే మటన్ బోన్ మారో మసాలాను ఎలా తయారు చేసుకోవాలో చూసేద్దాం రండి..

కావాల్సిన పదార్థాలు:

మటన్ బోన్ మారో ముక్కలు – 500 గ్రాములు, ఉల్లిపాయలు – 3, టమోటాలు – 2, పచ్చిమిర్చి – 3, అల్లం వెల్లుల్లి పేస్ట్ – 2 టీస్పూన్లు, కారం – 2 టీస్పూన్లు, ధనియాల పొడి – 2 టీస్పూన్లు, జీలకర్ర పొడి – అర టీస్పూన్, పసుపు – పావు టీస్పూన్, గరం మసాలా – 1 టీస్పూన్, మిరియాల పొడి – అర టీస్పూన్, జీలకర్ర – అర టీస్పూన్, దాల్చిన చెక్క – చిన్న ముక్క, లవంగాలు – 3, యాలకులు – 2, కరివేపాకు – 2 రెమ్మలు, నూనె – 4 టేబుల్ స్పూన్లు, ఉప్పు – తగినంత, కొత్తిమీర – కొద్దిగా, నీళ్లు – తగినన్ని.

Also Read: స్వీట్ షాప్ టేస్ట్ గ్యారెంటీ.. ఇంట్లోనే ఈజీగా చేసుకోదగ్గ నెల్లూరు మలైకాజా రెసిపీ!

తయారీ విధానం ఇలా:

మటన్ బోన్ మారో ముక్కలను శుభ్రంగా కడిగి పక్కన పెట్టుకోవాలి. కుక్కర్‌లో నూనె వేసి వేడయ్యాక జీలకర్ర, దాల్చిన చెక్క, లవంగాలు, యాలకులు వేసి వేయించాలి. తర్వాత సన్నగా తరిగిన ఉల్లిపాయలు, పచ్చిమిర్చి, కరివేపాకు వేసి ఉల్లిపాయలు బంగారు రంగులోకి వచ్చే వరకు వేయించాలి.

ఇప్పుడు అల్లం వెల్లుల్లి పేస్ట్ వేసి పచ్చివాసన పోయే వరకు కలపాలి. తర్వాత టమోటా ముక్కలు, పసుపు, కారం, ధనియాల పొడి, జీలకర్ర పొడి, ఉప్పు వేసి టమోటాలు మెత్తబడే వరకు ఉడికించాలి.

తర్వాత మటన్ బోన్ మారో ముక్కలను వేసి మసాలా పట్టేలా ఐదు నిమిషాల పాటు వేయించాలి. తగినన్ని నీళ్లు పోసి కుక్కర్ మూత పెట్టాలి. మటన్ ముక్కలు మెత్తగా ఉడికే వరకు ప్రెషర్ కుక్ చేయాలి. సమయం ముక్కల పరిమాణం, మాంసం రకాన్ని బట్టి మారుతుంది.

ప్రెషర్ పూర్తిగా తగ్గిన తర్వాత మూత తీసి గరం మసాలా, మిరియాల పొడి వేసి కలపాలి. కూరలో నీళ్లు ఎక్కువగా ఉంటే మూత లేకుండా కొద్దిసేపు మరిగించి చిక్కగా చేసుకోవాలి. చివరగా కొత్తిమీర చల్లి దించేయాలి. ఘాటైన మసాలా రుచితో నోరూరించే మటన్ బోన్ మారో మసాలా రెడి అయినట్టే. వేడివేడి అన్నం, జీరా రైస్ లేదా రోటీలతో కలిపి వడ్డిస్తే ఎంతో రుచిగా ఉంటుంది.

Also Read: ఈవెనింగ్ స్నాక్ కోసం ఈ చికెన్ పెరి పెరి పాపర్స్ ట్రై చేయండి.. ఇంటిల్లిపాదీ శభాష్ అంటారు!