‘గర్ల్‌ఫ్రెండ్‌పై పెట్టుబడి చేస్తే వచ్చేది సున్నా’.. మహిళలను కించపరిచే ప్రకటనపై రాజకీయ దుమారం

Girlfriend Ad Politics Controversy| మెట్రోలో ప్రయాణిస్తున్న వారికి కనిపించిన ఒక చిన్న ప్రకటన ఇప్పుడు పెద్ద రాజకీయ వివాదానికి దారితీసింది. ఫిక్స్ డిపాజిట్లకు ఎక్కువ వడ్డీ ఇస్తామని చెప్పే ప్రయత్నంలో ఉపయోగించిన ఒక వాక్యం తీవ్ర విమర్శలకు కారణమైంది. “గర్ల్‌ఫ్రెండ్ 0 శాతం వడ్డీ ఇస్తుంది” అనే వాక్యం మహిళలను అవమానించేలా ఉందని పలువురు రాజకీయ నాయకులు అభ్యంతరం వ్యక్తం చేశారు. ఈ ప్రకటనను వెంటనే తొలగించాలని, ఇలాంటి ప్రకటనలకు అనుమతి ఎలా ఇచ్చారో పరిశీలించాలని డిమాండ్ చేస్తున్నారు.

చెన్నై మెట్రోలోని ప్రకటనపై తీవ్ర వివాదం

చెన్నై మెట్రో రైలు కోచ్‌లో ఒక కంపెనీ ఈ యాప్ ప్రదర్శించినట్లు సమాచారం. ఈ ప్రకటన ఫిక్స్‌డ్ డిపాజిట్లపై లభించే వడ్డీ రేట్లను ప్రచారం చేయడానికి రూపొందించారు. అయితే ప్రచారంలో గర్ల్‌ఫ్రెండ్‌ను ఆర్థిక వడ్డీతో పోల్చడం వివాదానికి దారితీసింది. ఫిక్స్‌డ్ డిపాజిట్లలో మంచి వడ్డీ వస్తుందని, గర్ల్‌ఫ్రెండ్ మాత్రం “0 శాతం వడ్డీ” ఇస్తుందని ప్రకటన పేర్కొంది. ఈ వాక్యం మహిళలను వస్తువులుగా చూపుతోందని విమర్శకులు ఆరోపించారు. ప్రజలు అధిక సంఖ్యలో ప్రయాణించే మెట్రోలో ఇలాంటి యాడ్స్ ఉండటంపై ప్రశ్నలు తలెత్తాయి.

వెంటనే చర్యలు తీసుకోవాలని కోరిన డీఎంకే ఎంపీ

డీఎంకే మహిళా ఎంపీ థమిళచ్చి తంగపాండియన్ ఈ ప్రకటనపై తీవ్ర అభ్యంతరం వ్యక్తం చేశారు. ఆమె ప్రకటనకు సంబంధించిన ఫొటోను ఎక్స్ వేదికగా షేర్ చేశారు. మహిళల గౌరవాన్ని దెబ్బతీసే ప్రకటనలను బహిరంగ ప్రదేశాల్లో అనుమతించకూడదని ఆమె అన్నారు. ఇలాంటి ప్రకటనకు చెన్నై మెట్రో అధికారులు ఎలా అనుమతి ఇచ్చారని ఆమె ప్రశ్నించారు. ప్రకటనను వెంటనే తొలగించాలని అధికారులను ఆమె కోరారు. భవిష్యత్తులో ఇలాంటి ప్రకటనలు కనిపించకుండా తగిన చర్యలు తీసుకోవాలని కూడా డిమాండ్ చేశారు. ప్రతిరోజూ లక్షలాది మంది చెన్నై మెట్రో సేవలను ఉపయోగిస్తున్నారని ఆమె గుర్తుచేశారు. అందువల్ల బహిరంగ ప్రదేశాల్లో ప్రదర్శించే ప్రకటనలు ప్రజలపై ప్రభావం చూపవచ్చని ఆమె అభిప్రాయపడ్డారు.

Also Read: డిగ్రీ లేదు.. పెట్టుబడి లేదు.. రూ.కోట్ల వ్యాపారం చేస్తున్న 65 ఏళ్ల మహిళ

తీవ్రంగా విమర్శించిన ఏఐఏడీఎంకే

ఏఐఏడీఎంకే అధికార ప్రతినిధి కోవై సత్యన్ కూడా ఈ ప్రకటనను తీవ్రంగా విమర్శించారు. ప్రకటనలోని వాక్యం తనను ఆశ్చర్యానికి గురిచేసిందని ఆయన అన్నారు. ప్రజల దృష్టిని ఆకర్షించడానికి మహిళలను అవమానించడం సరైన పద్ధతి కాదని ఆయన పేర్కొన్నారు. వ్యక్తి స్వేచ్ఛ పేరుతో లింగం ఆధారంగా ఎవరినైనా కించపరచడం అంగీకారయోగ్యం కాదని ఆయన అన్నారు.
ప్రకటనలకు ప్రజల దృష్టిని ఆకర్షించే స్వేచ్ఛ ఉన్నప్పటికీ నైతికబాధ్యత కూడా ఉండాలని ఆయన సూచించారు. కేవలం ప్రచారం కోసం అవమానకరమైన లేదా వివాదాస్పద వాక్యాలను ఉపయోగించకూడదని ఆయన అభిప్రాయపడ్డారు.

ఈ ప్రకటన చేసింది ఎవరు?

ఈ ప్రకటనను THECOS అనే సహకార రుణ సంఘం విడుదల చేసినట్లు సమాచారం. ఈ సంస్థను తిరువల్లువర్ ట్రాన్స్‌పోర్ట్ కార్పొరేషన్ ఎంప్లాయీస్ కో-ఆపరేటివ్ క్రెడిట్ సొసైటీ లిమిటెడ్ అని కూడా పిలుస్తారు. తమిళనాడు వ్యాప్తంగా రవాణా ఉద్యోగుల ఆర్థిక అవసరాలను తీర్చేందుకు పనిచేస్తున్నామని సంస్థ పేర్కొంటోంది. ఈ ప్రకటన ప్రధానంగా ఫిక్స్‌డ్ డిపాజిట్లు, వాటిపై వడ్డీ రేట్లను ప్రచారం చేయడానికి ఉద్దేశించింది. అయితే వివాదాస్పద వాక్యం కారణంగా.. కంపెనీ అందించే ఆర్థిక సేవల కంటే ప్రకటనలోని పదాలపైనే ప్రజల దృష్టి పడింది.

Also Read: జిమ్‌లో వర్కౌట్ చేస్తున్నారా? కండరాలు నిజంగా పెరుగుతున్నట్లు సూచించే 5 సంకేతాలివే

బహిరంగ ప్రదేశాల్లో ప్రకటనలపై ఇప్పుడు మరింత చర్చ

ఈ వివాదం బహిరంగ ప్రదేశాల్లో బాధ్యతాయుతమైన ప్రకటనల అవసరాన్ని మరోసారి చర్చకు తెచ్చింది. మెట్రో వంటి ప్రజా రవాణా వ్యవస్థలను వివిధ వయస్సుల, వర్గాల ప్రజలు ఉపయోగిస్తారు.
అందువల్ల ప్రకటనలు ఎవరినైనా అవమానించే లేదా మూసధోరణులను ప్రోత్సహించేలా ఉండకూడదని విమర్శకులు చెబుతున్నారు. క్రియేటివిటీని ఉపయోగించి కూడా సంస్థలు ప్రజల దృష్టిని ఆకర్షించవచ్చని వారు అభిప్రాయపడుతున్నారు.

ఈ ఘటన మెట్రోలో ప్రకటనలకు అనుమతి ఇచ్చే విధానంపై కూడా ప్రశ్నలు లేవనెత్తింది. భవిష్యత్తులో ఇలాంటి వివాదాలను నివారించేందుకు ప్రకటనల పరిశీలనపై అధికారులు మరింత జాగ్రత్త వహించాల్సి ఉంటుంది.

Join WhatsApp Channel

Share

• 
• 
• 
• 
• 
•