భారీగా పెరిగిన చక్కెర ధరలు.. షుగర్ లేకుండా రాఖీ స్పెషల్ కలాకండ్ ఇలా చేసేయండి

Sugarless Kalakand Sweet| రక్షాబంధన్ పండుగ అంటే స్వీట్లు ఉండాల్సిందే. ఈ సందర్భంగా ఇంట్లో తయారుచేసిన స్వీట్లను కుటుంబ సభ్యులతో పంచుకోవడం ఆనందాన్ని పెంచుతుంది. అయితే ఈసారి సాధారణ కలాకండ్‌కు బదులుగా ఆరోగ్యకరమైన ప్రత్యామ్నాయాన్ని ప్రయత్నించండి. ఈ కలాకండ్‌లో రోజూవాడే రిఫైన్డ్ షుగర్‌ ఉపయోగించాల్సిన అవసరం లేదు. పైగా ఇందులో ప్రొటీన్ బలం కోసం లో ఫ్యాట్ పనీర్ ఉపయోగించవచ్చు.

ఈ రెసిపీలో సాధారణ చక్కెరకు బదులుగా ఒక ప్రత్యేక స్వీటెనర్‌ ఉపయోగించాలి. ఇది కలాకండ్‌కు తీయని రుచి అందించడంలో సహాయపడుతుంది. పాలు, పనీర్ కలయికతో కలాకండ్ క్రీమీగా, రుచికరంగా తయారవుతుంది. ఇలాచీ పౌడర్ (యాలకల పొడి), కుంకుమపువ్వు దీనికి ప్రత్యేకమైన సువాసనను అందిస్తాయి.

చక్కెర లేని కలాకండ్‌ ఎందుకు ప్రయత్నించాలి?

సాంప్రదాయ స్వీట్లలో సాధారణంగా ఎక్కువ మొత్తంలో చక్కెర ఉంటుంది. చక్కెర వినియోగాన్ని తగ్గించాలనుకునే వారికి ఈ రెసిపీ ఒక ప్రత్యామ్నాయంగా ఉంటుంది. లో ఫ్యాట్ పనీర్ కలాకండ్‌కు ప్రోటీన్‌ను అందిస్తుంది. ఇది కలాకండ్‌కు ప్రత్యేకమైన మెత్తని మరియు కొద్దిగా గరుకైన ఆకృతిని ఇస్తుంది. పాలు దీనికి క్రీమీ రుచి, మృదువైన టెక్స్చర్‌ను అందిస్తాయి. ఇలాచీ (యాలకులు), కుంకుమపువ్వు సంప్రదాయ భారతీయ స్వీట్ రుచిని మరింత పెంచుతాయి. పైన పిస్తా, బాదం ముక్కలను కూడా డెకరేషన్ కోసం చల్లితే మరింత ఆకర్షణీయంగా ఉంటుంది.

కలాకండ్ తయారీకి కావాల్సిన పదార్థాలు

ఈ రెసిపీ కోసం అర లీటర్ (500 మిల్లీలీటర్ల) పాలు
అలాగే 200 గ్రాముల లో ఫ్యాట్ పనీర్
రుచికోసం ఒక టీస్పూన్ యాలకుల పొడి (ఇలాచీ పౌడర్)
పది నుంచి పదిహేను కుంకుమపువ్వు రేకులు
సాధారణ చక్కెరకు బదులుగా పావు కప్పు మాంక్ ఫ్రూట్ స్వీటెనర్
అలంకరణ కోసం పిస్తా, బాదం ముక్కలను సిద్ధంగా ఉంచుకోవచ్చు.

మాంక్ ఫ్రూట్ స్వీటెనర్

చక్కెర కంటే ఎన్నో తీయని రుచి కలది మాంక్ ఫ్రూట్ స్వీటెనర్. కాబట్టి మోతాదు విషయంలో జాగ్రత్తగా ఉండాలి. ఇది ఆరోగ్యకరమైన స్వీట్‌నర్. డయాబెటీస్ బాధితులు కూడా దీన్ని తినవచ్చు.

ముందుగా పాలను చిక్కగా చేసుకోవాలి

ఒక మందపాటి అడుగు ఉన్న పాత్రలో పాలను పోసి వేడి చేయాలి. పాలు మరిగే సమయంలో వాటిని మధ్యమధ్యలో కలుపుతూ ఉండాలి. పాలు క్రమంగా తగ్గి చిక్కగా మారే వరకు మరిగించాలి.
పాలు పాత్ర నుంచి పొంగిపోకుండా జాగ్రత్త తీసుకోవాలి.

పనీర్‌ సిద్ధం చేసుకోవాలి

లో ఫ్యాట్ పనీర్ మిక్సీలో వేసి మెత్తగా గ్రైండ్ చేయాలి. పనీర్ పూర్తిగా మెత్తగా లేకపోయినా చిన్న ముక్కలు ఉండవచ్చు. ఈ చిన్న ముక్కలు కలాకండ్‌కు మంచి టెక్స్చర్‌ను అందిస్తాయి.

పాలు, పనీర్‌ రెండింటినీ కలపాలి

గ్రైండ్ చేసిన పనీర్‌ను చిక్కగా మారిన పాలలో కలపాలి. ఈ మిశ్రమాన్ని నిరంతరం కలుపుతూ చిక్కగా అయ్యే వరకు ఉడికించాలి. తర్వాత యాలకుల పొడి, కుంకుమపువ్వు, మాంక్ ఫ్రూట్ స్వీటెనర్ కలపాలి. అన్ని పదార్థాలు సమానంగా కలిసే వరకు బాగా కలుపుతూ ఉండాలి. మిశ్రమం ముద్దలా మారే వరకు కొన్ని నిమిషాలు ఉడికించాలి.

Also Read: నోటి దుర్వాసన పోగొట్టాలన్నా బలమైన చిగుళ్లు కావాలన్నా ఈ ఒక్కటి ఉపయోగిస్తే చాలు

కలాకండ్‌ ఆకారంలోకి తీసుకురావాలి

మిశ్రమాన్ని మరో 5 నుంచి 10 నిమిషాలు ఉడికించాలి. తర్వాత సరైన చిక్కదనం వచ్చినప్పుడు స్టవ్ నుంచి దించాలి. ఈ మిశ్రమాన్ని ఒక లోతైన ప్లేట్ లేదా పళ్లెంలో సమానంగా పరచాలి.
కొద్దిగా చల్లారిన తర్వాత కత్తితో చతురస్రాలు లేదా డైమండ్ షేప్‌తో కట్ చేసుకోవాలి. పైన తరిగిన పిస్తా, బాదం ముక్కలను చల్లండి.

సర్వ్ చేసే ముందు ఫ్రిజ్‌లో ఉంచండి

తయారుచేసిన కలాకండ్‌ను సెట్ కావడానికి కాసేపు ఫ్రిజ్‌లో ఉంచాలి. చల్లబడిన తర్వాత కలాకండ్ గట్టిగా మారి సులభంగా ముక్కలు చేయవచ్చు. మీకు మెత్తగా కావాలంటే సర్వ్ చేయడానికి ఫ్రిజ్‌లో పెట్టాల్సిన అవసరం లేదు. ఈ రుచికరమైన కలాకండ్‌ను చల్లగా లేదా కొద్దిగా వెచ్చగా ఉన్నప్పుడే ఆస్వాదించండి.

ఈ సింపుల్ రెసిపీతో రక్షాబంధన్ వేడుకలను మరింత ప్రత్యేకంగా మార్చుకోండి.