Tiktok Tiger Mauls Teenager| సోషల్ మీడియాలో చాలామంది తమ వీడియోలు త్వరగా వైరల్ కావాలనే విచిత్ర దృశ్యాలు చిత్రీకరిస్తుంటారు. ఈ క్రమంలోనే కొద్దిసేపు గుర్తింపు కోసం చేసే ప్రమాదకరమైన స్టంట్లు ఒక్కోసారి ప్రాణాల మీదకు తెస్తుంటాయి. వీడియోలో కొత్తదనం చూపించాలనే ప్రయత్నం ఒక కుటుంబంలో తీరని విషాదాన్ని నింపింది. టిక్‌టాక్ వీడియో షూటింగ్ కోసం బోనులో నుంచి బయటకు తీసుకొచ్చిన పులి ఒక యువకుడిపై దాడి చేసింది. ఈ ఘటన ఇప్పుడు కలకలం రేపుతోంది. ఈ ఘటన పాకిస్థాన్‌లోని లాహోర్ సమీపంలో జరిగింది.
మాంచెస్టర్ ఈవెనింగ్ న్యూస్ కథనం ప్రకారం.. పాకిస్థాన్‌లోని లాహోర్ సమీపంలోని కహ్నా ప్రాంతంలో ఈ ఘటన జరిగింది. అక్కడి ఓ ప్రైవేట్ ఫామ్‌హౌస్‌లో పులుల పెంపక కేంద్రం ఉంది. కంటెంట్ క్రియేటర్ నౌమన్ హసన్ టిక్‌టాక్ వీడియో కోసం పులిపిల్లని తీసుకురావాలని కోరినట్లు సమాచారం.
దీంతో ఫామ్‌హౌస్ సిబ్బంది బోనులో ఉన్న ఆడపులిని బయటకు తీసుకొచ్చారు. అదే సమయంలో అక్కడ పనిచేస్తున్న 19 ఏళ్ల తల్హాపై అది ఒక్కసారిగా దాడి చేసింది. ఈ దాడిలో తీవ్రంగా గాయపడిన తల్హాను వెంటనే సమీపంలోని ఆసుపత్రికి తరలించారు. వైద్యులు చికిత్స అందించినప్పటికీ అతడిని కాపాడలేకపోయారు. తాల్హా మరణంతో ఈ వీడియోపై తీవ్ర చర్చ జరుగుతోంది.
ఈ ఘటనపై కేసు నమోదు చేసిన పోలీసులు టిక్‌టాక్ కంటెంట్ క్రియేటర్ నౌమన్ హసన్, ఫామ్‌హౌస్ యజమాని ఫయ్యాజ్‌ను అరెస్ట్ చేశారు. యువకుడి గాయాలకు మొదట కుక్క దాడే కారణమని హసన్ అబద్దం చెప్పినట్లు సమాచారం. అయితే, విచారణలో ఆడపులి దాడి వల్లే అతడికి ప్రాణాంతక గాయాలైనట్లు వెల్లడైంది.
దీంతో అసలు విషయాన్ని దాచేందుకు ప్రయత్నించారా అనే కోణంలోనూ పోలీసులు దర్యాప్తు చేస్తున్నారు. ఫామ్‌హౌస్‌లో పులిని పెంచేందుకు అవసరమైన అనుమతులు ఉన్నాయా? భద్రతా నిబంధనలు పాటించారా? అనే అంశాలను పరిశీలిస్తున్నారు.
ఈ ఘటనపై లాహోర్ పోలీసులు తీవ్ర ఆగ్రహం వ్యక్తం చేశారు. సోషల్ మీడియాలో ఎక్కువ వ్యూస్, పాపులారిటీ కోసం మనుషుల ప్రాణాలను ప్రమాదంలో పెట్టడం సరికాదని హెచ్చరించారు. నిర్లక్ష్యంగా వ్యవహరించిన వారిపై చర్యలు తీసుకుంటామని తెలిపారు.
Also Read: బ్రేకప్ తర్వాత మళ్లీ డేటింగ్ ఎప్పుడు ప్రారంభించాలి? మళ్లీ ప్రేమలో పడే ముందు ఈ విషయాలు ఆలోచించండి
నౌమన్ హసన్ గతంలోనూ పులులు, చిరుతపులులతో వీడియోలు చేసినట్లు తెలుస్తోంది. అతడి ఇన్‌స్టాగ్రామ్‌లో ఉన్న కొన్ని వీడియోల్లో ప్రమాదకరమైన స్టంట్లు కనిపిస్తున్నాయి. ఓ వీడియోలో గొలుసుతో కట్టేసిన పులిని దగ్గరకు వెళ్లి ముద్దు పెట్టుకునేందుకు ప్రయత్నించాడు. మరో వీడియోలో చిరుతపులిని నిమురుతుండగా అది ఒక్కసారిగా అతడి వైపు దూకి గాయపరిచింది.
Also Read: అరటి వ్యర్థాలతో కోట్ల బిజినెస్.. ఎంబిఏ గ్రాడుయేట్ల ఐడియా అదుర్స్
పులులు, చిరుతలు వంటి క్రూరమృగాలు ఎంత పరిచయం ఉన్నా ఎప్పుడైనా దాడి చేసే ప్రమాదం ఉంటుంది. వాటిని పెంచేందుకు సరైన అనుమతులు, శిక్షణ పొందిన నిపుణులు, భద్రతా ఏర్పాట్లు తప్పనిసరి. సోషల్ మీడియాలో లైక్స్, వ్యూస్ కోసం ఇలాంటి ప్రమాదకరమైన ప్రయోగాలు చేయడం ప్రాణాంతకం కావచ్చు. ఈ ఘటన వన్యప్రాణుల భద్రతతో పాటు సోషల్ మీడియా కంటెంట్ కోసం చేసే ప్రమాదకరమైన స్టంట్లపై మరోసారి ప్రశ్నలు లేవనెత్తుతోంది.
Share
Gundeninda Gudigantalu Balu : బాలు షాకింగ్ నిర్ణయం..? నిర్మాతలకు చుక్కలే...!
