Headache: తరచుగా తలనొప్పితో ఇబ్బంది పడుతున్నారా ?

Headache: తలనొప్పి అనేది చాలా సాధారణమైన సమస్య. ఇది అప్పుడప్పుడు వస్తే పెద్దగా ఆందోళన చెందాల్సిన అవసరం లేదు. కానీ తరచుగా లేదా రోజూ తలనొప్పి వస్తుంటే.. దానికి కారణం తెలుసుకోవడం ముఖ్యం. అనేక అంశాలు తరచుగా వచ్చే తలనొప్పికి దారితీస్తాయి. వాటిలో కొన్నింటిని గురించి వివరంగా ఇప్పుడు తెలుసుకుందాం.

1. జీవనశైలి కారకాలు:
నిద్రలేమి లేదా అధిక నిద్ర: సరైన నిద్ర లేకపోవడం లేదా మరీ ఎక్కువ నిద్రపోవడం వల్ల తలనొప్పి వస్తుంది.

ఒత్తిడి, ఆందోళన : మానసిక ఒత్తిడి, ఆందోళన టెన్షన్ తలనొప్పికి ప్రధాన కారణాలు.

డీహైడ్రేషన్ : శరీరానికి తగినంత నీరు అందకపోవడం వల్ల కూడా తలనొప్పి వస్తుంది.

ఆహారపు అలవాట్లు: కొన్ని రకాల ఆహార పదార్థాలు (చాక్లెట్, ప్రాసెస్ చేసిన మాంసాలు, పాత జున్ను, కెఫిన్ అధికంగా ఉండేవి ) కొంతమందిలో తలనొప్పిని ప్రేరేపిస్తాయి. భోజనం సరిగా తీసుకోకపోవడం లేదా ఎక్కువ సమయం ఆకలితో ఉండటం కూడా ఒక కారణం.

కెఫిన్ ఉపసంహరణ రోజూ కెఫిన్ తీసుకునేవారు అకస్మాత్తుగా ఆపేస్తే తలనొప్పి వస్తుంది.

శారీరక శ్రమ లేకపోవడం : వ్యాయామం చేయకపోవడం వల్ల కూడా తలనొప్పి వచ్చే అవకాశం ఉంది.

2. ఆరోగ్య సమస్యలు:
మైగ్రేన్: ఇది తీవ్రమైన, పునరావృతమయ్యే తలనొప్పి. సాధారణంగా తల ఒక వైపు వస్తుంది. వాంతులు, వికారం, వెలుతురు, శబ్దానికి సున్నితత్వం వంటి లక్షణాలు ఉంటాయి.

టెన్షన్ తలనొప్పి : ఇవి సాధారణంగా తల చుట్టూ బిగుతుగా ఉన్నట్లు లేదా ఒత్తిడి ఉన్నట్లు అనిపిస్తాయి. ఒత్తిడి, నిద్రలేమి వంటివి దీనికి కారణం.

క్లస్టర్ తలనొప్పి : ఈ రకమైన తలనొప్పి చాలా తీవ్రమైంది. ఇవి తల ఒక వైపు, కంటి చుట్టూ వస్తాయి. తరచుగా కళ్లు ఎర్రబడటం, ముక్కు కారడం వంటి లక్షణాలు ఇందులో ఉంటాయి.

సైనసైటిస్ : సైనస్ ఇన్ఫెక్షన్ లేదా వాపు వల్ల ముఖం, నుదిటి భాగంలో నొప్పి వస్తుంది.

కంటి సమస్యలు: కంటి చూపు సమస్యలు లేదా కంటికి సంబంధించిన ఒత్తిడి కూడా తలనొప్పికి దారితీస్తుంది. అంతే కాకుండా నరాలను కూడా దెబ్బతీస్తుందిజ

దంత సమస్యలు: దంతాల నొప్పి, దవడ నొప్పి కూడా తలనొప్పికి కారణం కావచ్చు.

మెడ నొప్పి: మెడ కండరాల బిగుతు లేదా మెడకు సంబంధించిన సమస్యలు తలనొప్పిని కలిగిస్తాయి.

రక్తపోటు: అధిక రక్తపోటు తీవ్రమైన తలనొప్పికి దారితీస్తాయి.

నరాల సమస్యలు: అరుదుగా.. బ్రెయిన్ ట్యూమర్, ఎన్యూరిజం వంటి తీవ్రమైన నరాల సంబంధిత సమస్యలు తరచుగా తల నొప్పికి కారణం కావచ్చు. అయితే.. ఇవి చాలా అరుదు.

Also Read: ఈ సింపుల్ టిప్స్ పాటిస్తే.. క్షణాల్లోనే నిద్రపడుతుందట !

3. ఇతర కారణాలు:
మందుల దుష్ప్రభావాలు: కొన్ని మందులు తలనొప్పిని దుష్ప్రభావంగా కలిగిస్తాయి.

ఓవర్‌యూజ్ తలనొప్పి : తరచుగా తలనొప్పి తగ్గడానికి వాడే మందుల వల్ల కూడా తలనొప్పి వస్తుంది.

వాతావరణ మార్పులు : వాతావరణ పీడనం లేదా ఉష్ణోగ్రతలో మార్పులు కొంత మందిలో తలనొప్పిని ప్రేరేపిస్తాయి. అందుకే వాతావరణంలో మార్పులు వచ్చినప్పుడు జాగ్రత్తలు తీసుకోవడం చాలా ముఖ్యం అని నిపుణులు చెబుతుంటారు.