కొత్త డేటింగ్ ట్రెండ్.. ప్రేమలో అనుబంధం తగ్గితే బ్రేకప్ చేయకుండా మంకీ బ్రాంచింగ్

Monkey Branch Dating| ప్రేమలో ఉన్నప్పుడు భాగస్వామితో అనుబంధం తగ్గిందని అనిపిస్తోందా? కొత్తగా పరిచయమైన వ్యక్తితో మాట్లాడటం, చాటింగ్ చేయడం ఎక్కువైందా? పాత రిలేషన్‌షిప్‌ ముగించకుండా మరో వ్యక్తితో ప్రేమ బంధాన్ని ఏర్పరచుకుంటున్నారా? ఇలాంటి పరిస్థితి ఎదుర్కొంటున్న యువత మంకీ బ్రాంచింగ్ పట్ల ఆసక్తి చూపిస్తోంది.

ప్రస్తుతం డేటింగ్ ప్రపంచంలో ‘మంకీ బ్రాంచింగ్’ అనే పదం చర్చనీయాంశంగా మారింది. అసలు మంకీ బ్రాంచింగ్ అంటే ఏమిటి? ఇలా ఎందుకు చేస్తారు? మీ భాగస్వామి ఈ ప్రవర్తనకు పాల్పడుతున్నారని ఎలా గుర్తించాలి?

మంకీ బ్రాంచింగ్ అంటే ఏమిటో తెలుసా?

ప్రస్తుతం ఉన్న ప్రేమ సంబంధాన్ని ముగించకుండానే మరో వ్యక్తితో ప్రేమ బంధాన్ని ఏర్పరచుకోవడాన్ని మంకీ బ్రాంచింగ్ అంటారు. అంటే పాత రిలేషన్‌షిప్ కొనసాగిస్తూనే కొత్త భాగస్వామిని వెతుక్కుంటారు. మరో వ్యక్తితో తరచుగా చాటింగ్ చేయడం, వ్యక్తిగత విషయాలు పంచుకోవడం, రాత్రిపూట ఎక్కువసేపు మాట్లాడటం వంటివి చేస్తుంటారు. కొన్నిసార్లు తమ ప్రవర్తనను కేవలం స్నేహంగా కూడా చెబుతారు. క్రమంగా కొత్త వ్యక్తిపై ఎమోషనల్‌గా ఆధారపడతారు. కొత్త బంధంపై నమ్మకం వచ్చాకే పాత సంబంధానికి బ్రేకప్ చెబుతారు. అందుకే దీన్ని ఒక కొమ్మ నుంచి మరో కొమ్మకు మారడంతో పోలుస్తున్నారు.

మంకీ బ్రాంచింగ్ చేసేందుకు కారణాలు

ప్రతి ఒక్కరూ ఒకే కారణంతో ఇలా ప్రవర్తించరు. కొందరిలో ఉండే మానసిక సమస్యలు, అభద్రతా భావాలు ఇందుకు కారణం కావచ్చు.

ఒంటరిగా ఉండాలనే భయం: ఒంటరితనాన్ని తట్టుకోలేనివారు పాత బంధాన్ని వదిలేలోపే కొత్త భాగస్వామిని వెతుక్కుంటారు.

ఎమోషనల్‌గా ఆధారపడటం: ప్రేమ సంబంధం లేకుండా ఉండలేమనే భావనతో మరో వ్యక్తిని తమకు దగ్గర చేసుకుంటారు.

గుర్తింపు కోరుకోవడం: ఇతరుల నుంచి నిరంతరం ప్రేమ, శ్రద్ధ, ప్రశంసలు పొందాలని కోరుకుంటారు.

బ్రేకప్‌కు భయపడటం: ప్రస్తుత భాగస్వామితో సమస్యల గురించి మాట్లాడకుండా కొత్త బంధం వైపు వెళ్లిపోతారు.

సోషల్ మీడియా ప్రభావం: డేటింగ్ యాప్స్, సోషల్ మీడియా ద్వారా కొత్త వ్యక్తులతో పరిచయాలు పెంచుకుంటారు.

అయితే వేరొకరిపై ఆకర్షణ కలగడం మాత్రమే మంకీ బ్రాంచింగ్ కాదు. ఉద్దేశాలు, రహస్యంగా వ్యవహరించడం, సంబంధంలోని హద్దులు కూడా ముఖ్యమే.

మీ భాగస్వామి మంకీ బ్రాంచింగ్ చేస్తున్నారని ఎలా గుర్తించాలి?

మీ భాగస్వామి ప్రవర్తనలో కొన్ని మార్పులు కనిపిస్తే వాటిని గమనించాలి. ముఖ్యంగా ఈ లక్షణాలు కనిపించవచ్చు. మీతో మాట్లాడటం, సమయం గడపడం తగ్గించవచ్చు. ఫోన్‌ను దాచడం, మెసేజ్‌ల విషయంలో గోప్యత పాటించడం పెరగవచ్చు. కొత్త వ్యక్తితో ఎక్కువ సమయం గడపవచ్చు.

మీతో వ్యక్తిగత విషయాలు పంచుకోవడం తగ్గించడంం

మీ బంధం భవిష్యత్తు గురించి మాట్లాడేందుకు ఆసక్తి చూపకపోవచ్చు. అయితే ఈ లక్షణాలు కనిపించినంత మాత్రాన మంకీ బ్రాంచింగ్ చేస్తున్నారని నిర్ధారించలేం. పరిస్థితులను అర్థం చేసుకుని మాట్లాడటం ముఖ్యం.

Also Read: చాణక్యనీతి.. అమ్మాయిలు ఈ 5 విషయాలు ఇతరులకు చెప్పకూడదు

మంకీ బ్రాంచింగ్ అంటే ఎమోషనల్ చీటింగ్ చేయడమేనా?

మంకీ బ్రాంచింగ్ అనేది వైద్యపరమైన లేదా మానసిక రుగ్మత కాదు. అయితే భాగస్వామికి తెలియకుండా మరో వ్యక్తితో బంధాన్ని పెంచుకుంటే అది ఎమోషనల్ చీటింగ్ కావచ్చు. ఇలాంటి ప్రవర్తన నమ్మకాన్ని దెబ్బతీసి, భాగస్వామికి మానసిక బాధ కలిగిస్తుంది.

Also Read: ఉద్యోగం చేసే భార్యభర్తల మధ్య ఒత్తిడి, గొడవలు.. దాంపత్య జీవితం కాపాడుకోవడానికి ఇలా చేయడం తప్పనిసరి

ఇలాంటి పరిస్థితులను ఎలా నివారించాలి?

ప్రేమ సంబంధంలో సమస్యలు ఎదురైతే భాగస్వామితో నిజాయతీగా మాట్లాడాలి. ఇష్టం లేకపోతే స్పష్టంగా విడిపోవాలి. ఒంటరిగా ఉండలేమనే భయంతో మరో వ్యక్తిని ప్రత్యామ్నాయంగా ఉంచకూడదు. కొన్నిసార్లు కొత్త బంధం కోసం తొందరపడకుండా ఒంటరిగా ఉండటమే ఆరోగ్యకరమైన నిర్ణయం కావచ్చు.