Tollywood Summer Movies: టాలీవుడ్‌కు అగ్నిపరీక్ష..సమ్మర్‌లో ఢీకొట్టబోతున్న నలుగురు తెలుగు స్టార్ హీరోల సినిమాలు..!

Tollywood Summer Movies: తెలుగు సినిమా పరిశ్రమ చరిత్రలో సమ్మర్ 2027 ఒక సంచలన కాలంగా మారే అవకాశం కనిపిస్తోంది. సాధారణంగా పెద్ద సినిమాలు సంక్రాంతి సీజన్‌కు వస్తుంటాయి. కానీ ఈసారి మార్చి నుంచి మే వరకు ఉండే వేసవి కాలమే టాలీవుడ్‌కు అసలైన పరీక్షగా మారబోతోంది. ఈ సమయంలో వరుసగా స్టార్ హీరోల భారీ సినిమాలు విడుదల కావడంతో బాక్సాఫీస్ వద్ద తీవ్రమైన పోటీ నెలకొననుంది.

ఈ జాబితాలో అగ్రస్థానంలో నిలిచేది దర్శకధీరుడు ఎస్ ఎస్ రాజమౌళి తెరకెక్కిస్తున్న కొత్త చిత్రం వారణాసి. ఈ సినిమాలో మహేష్ బాబు హీరోగా నటిస్తుండగా, ప్రియాంక చోప్రా హీరోయిన్‌గా కనిపించనున్నారు. రాజమౌళి సినిమాలకు దేశవ్యాప్తంగా మాత్రమే కాకుండా అంతర్జాతీయ స్థాయిలో కూడా భారీ క్రేజ్ ఉంది. అందుకే ఈ సినిమా భారత్‌తో పాటు విదేశాల్లోనూ రికార్డు స్థాయి ఓపెనింగ్స్ సాధిస్తుందని ట్రేడ్ వర్గాలు అంచనా వేస్తున్నాయి. ఈ చిత్రాన్ని 2027 రామ్ నవమి సందర్భంగా విడుదల చేయాలని ప్లాన్ చేస్తున్నట్లు సమాచారం.

ప్రభాస్ తో హిట్ పక్కా..

తర్వాత వరుసలో దర్శకుడు సందీప్ రెడ్డి వంగా తెరకెక్కిస్తున్న స్పిరిట్ ఉంది. ఇందులో ప్రభాస్ హీరోగా నటిస్తున్నారు. ఈ సినిమా మార్చి 5, 2027న విడుదల అవుతుందని ఇప్పటికే అధికారికంగా ప్రకటించారు. ప్రభాస్‌కు ఉన్న పాన్ ఇండియా ఇమేజ్, వంగా స్టైల్ కథనం కలిసి ఈ సినిమాను మాస్, మల్టీప్లెక్స్ ప్రేక్షకులకు పెద్ద ఆకర్షణగా మార్చనున్నాయి.

ఇక మరో భారీ ప్రాజెక్ట్ దర్శకుడు ప్రశాంత్ నీల్ రూపొందిస్తున్న డ్రాగన్ (తాత్కాలిక పేరు). ఈ సినిమాలో జూనియర్ ఎన్టీఆర్ హీరోగా నటిస్తున్నారు. విడుదల తేదీ ఇంకా ఖరారు కాకపోయినా, సమ్మర్ 2027లోనే ఈ సినిమా థియేటర్లకు వచ్చే అవకాశాలు ఎక్కువగా ఉన్నాయని పరిశ్రమ వర్గాలు చెబుతున్నాయి. కేజీఎఫ్, సలార్ విజయాల తర్వాత ప్రశాంత్ నీల్‌పై అంచనాలు మరింత పెరిగాయి.

అల్లు అర్జున్ అట్లీ అప్డేట్..

చివరిగా దర్శకుడు అట్లీ తెరకెక్కిస్తున్న సైన్స్ ఫిక్షన్ చిత్రం కూడా ఈ వేసవి పోటీలో చేరనుంది. ఇందులో అల్లు అర్జున్ హీరోగా నటిస్తున్నారు. అదనంగా, లోకేశ్ కనగరాజ్‌తో అల్లు అర్జున్ మరో సినిమా కూడా 2027లో విడుదల కావచ్చనే ప్రచారం ఉంది. అలా జరిగితే ఒకే ఏడాదిలో అల్లు అర్జున్ రెండు భారీ సినిమాలతో ప్రేక్షకుల ముందుకు రానున్నారు.

ఈ నాలుగు భారీ సినిమాలు ఒకే సమ్మర్‌లో విడుదలైతే, టాలీవుడ్ బాక్సాఫీస్ వద్ద చరిత్రాత్మక రికార్డులు నమోదవడం ఖాయం. స్క్రీన్లు, చర్చలు, వసూళ్లు అన్నింటినీ తెలుగు సినిమాలే శాసించే సమ్మర్‌గా 2027 నిలిచిపోతుంది.

Also Read: Sankranthi Movies At US Box Office: అమెరికా బాక్సాఫీస్‌ దగ్గర సంక్రాంతి సినిమాల పరిస్థితి ఎలా ఉందంటే..