The Gospel of Christmas OTT: పండుగ వాతావరణం మొదలైందంటే చాలు మనసును హత్తుకునే ఫ్యామిలీ ఎమోషన్స్, ఆధ్యాత్మిక విలువలు ఉన్న సినిమాలను చూడటానికి ఓటీటీ ఆడియన్స్ ఆసక్తి చూపిస్తుంటారు. హాలీవుడ్‌లో ఫ్యామిలీ సెంటిమెంట్స్, హ్యూమర్‌ను అద్భుతంగా బ్లెండ్ చేసి సినిమాలు తీయడంలో ప్రముఖ దర్శకుడు టైలర్ పెర్రీ దిట్ట. ఆయన మార్క్ మేకింగ్‌లో క్రిస్మస్ పండుగ స్పెషల్‌గా వచ్చిన ఫీల్-గుడ్ మ్యూజికల్ డ్రామా చిత్రం ‘ది గాస్పెల్ ఆఫ్ క్రిస్మస్’ (The Gospel of Christmas). Netflix (నెట్‌ఫ్లిక్స్) లో ఈ సినిమా ప్రస్తుతం స్ట్రీమింగ్ అవుతూ ఫ్యామిలీ ఆడియన్స్‌ను విపరీతంగా ఆకట్టుకుంటోంది.
ఐజాక్ ఒకప్పుడు మంచి పేరున్న R&B సింగర్. కానీ ఆ జీవితాన్ని వదిలేసి పాస్టర్‌గా మారతాడు. అతడి తండ్రి మరణించిన తర్వాత, కుటుంబానికి చెందిన పాత చర్చిని తిరిగి నిలబెట్టాల్సిన బాధ్యత ఐజాక్‌పై పడుతుంది. దీంతో భార్య రెబెక్కా, ఇద్దరు కుమారులు జాకబ్, ఎసావులతో కలిసి న్యూయార్క్‌లోని ఓ సమస్యాత్మక ప్రాంతానికి వెళ్తాడు. అక్కడికి వెళ్లాక అసలు కష్టాలు మొదలవుతాయి. చర్చికి సభ్యులు తగ్గిపోవడంతో పాటు, దాని నిర్వహణకు డబ్బులు లేక అప్పులు పేరుకుపోతుంటాయి. మరోవైపు ఆ చర్చిని ఎలాగైనా సొంతం చేసుకోవాలని ఓ వ్యాపారవేత్త కుట్రలు చేస్తుంటాడు.
ఇలాంటి పరిస్థితుల్లో ఐజాక్‌కు ఊహించని ఆఫర్ వస్తుంది. అతడి పాత సంగీత జీవితాన్ని మళ్లీ తెరపైకి తీసుకొచ్చేలా భారీ పారితోషికంతో రీయూనియన్ టూర్ చేయాలని ఓ వ్యక్తి ప్రతిపాదిస్తాడు. ఆ టూర్ ద్వారా వచ్చే డబ్బుతో చర్చిని కాపాడుకోవచ్చని ఐజాక్ భావిస్తాడు. కానీ ఆ ఆఫర్ వెనుక ఉన్న అసలు ఉద్దేశం వేరే ఉంటుంది. అతడి విశ్వాసాన్ని దెబ్బతీసి, చర్చిని స్వాధీనం చేసుకోవాలనేది ఆ వ్యక్తి అసలు ప్లాన్. ఒకవైపు భార్య రెబెక్కా ఇచ్చే ధైర్యం, మరోవైపు పాత జీవితంలోని ఆకర్షణలు.. ఈ రెండింటి మధ్య ఐజాక్ ఎలాంటి నిర్ణయం తీసుకుంటాడు? క్రిస్మస్ నాటికి చర్చిని కాపాడుకోగలడా? అన్నదే మిగతా కథ.
ఈ సినిమాలో పాస్టర్ ఐజాక్‌గా డ్యూరెల్ ‘ట్యాంక్’ బాబ్స్, ఆయన భార్య రెబెక్కాగా ఫాంటాసియా బారినో నటించారు. దీనికి టైలర్ పెర్రీ స్వయంగా కథ, స్క్రీన్‌ప్లే అందించడంతో పాటు దర్శకత్వం కూడా వహించారు. ప్రముఖ గోస్పెల్ సంగీత దర్శకుడు కిర్క్ ఫ్రాంక్లిన్ ఈ చిత్రానికి సంగీతాన్ని సమకూర్చారు. సుమారు 1 గంట 45 నిమిషాల నిడివి ఉన్న ఈ సినిమా నవంబర్ 11, 2026 నుంచి నేరుగా Netflixలో స్ట్రీమింగ్ అవుతోంది. ఈ చిత్రం ఇంగ్లీష్‌తో పాటు హిందీ, తమిళం, తెలుగు ఆడియోల్లోనూ అందుబాటులో ఉంది. కాబట్టి తెలుగులోనూ ఈ క్రిస్మస్ ఎమోషనల్ డ్రామాను చూసేయొచ్చు.
Share
పిల్లల ముఖాల్లో నవ్వులు పూయించే హోమ్‌మేడ్ పొటాటో స్మైలీ.. చాలా సులువుగా చేసేయండిలా!
టెన్షన్ ఎక్కువైతే ప్రాణాల మీదకి వస్తుంది!ఒత్తిడి వల్ల దెబ్బతినే అవయవాలు ఇవే!
