Meesaya Murukku 2 OTT: మ్యూజిక్ బ్యాక్‌డ్రాప్‌లో వచ్చే సినిమాలకు యూత్‌లో ఉండే క్రేజ్ వేరు. అందులోనూ గల్లీ స్థాయి నుంచి మొదలైన ఒక సంగీత ప్రయాణం ప్రపంచ వేదిక వరకు చేరితే ఆ కథలో ఎమోషన్, ఎంటర్‌టైన్‌మెంట్ రెండూ ఉంటాయి. అలాంటి మూడు తరాల సంగీత ప్రయాణాన్ని తెరపైకి తీసుకొచ్చిన తమిళ చిత్రం ‘మీసయ మురుక్కు 2’ (Meesaya Murukku 2). హిప్ హాప్ తమిళా ఆది హీరోగా నటించడమే కాకుండా దర్శకత్వం కూడా వహించిన ఈ సినిమా, 2017లో వచ్చిన ‘మీసయ మురుక్కు’కు కొనసాగింపుగా కాకుండా, అదే నేపథ్యంతో మరో కొత్త కథను చెబుతుంది. సెప్టెంబర్ 25న థియేటర్లలో విడుదలైన ఈ మ్యూజికల్ కామెడీ డ్రామా ఇప్పుడు నవంబర్ 6 నుంచి ఓటీటీలో స్ట్రీమింగ్ అవుతోంది. మరి ఈ మ్యూజికల్ డ్రామా ఏ ఓటీటీలో స్ట్రీమింగ్ అవుతోంది ? తెలుగులో ఉందా ? దీని కథ ఏమిటి ? అనే వివరాల్లోకి వెళ్తే..
చెన్నైలోని మైలాపూర్‌లో 1979లో ఈ కథ మొదలవుతుంది. అక్కడ దాస్ అనే గానా గాయకుడు తన సంగీతానికి ఒక ప్రత్యేక గుర్తింపు తీసుకురావాలని కలలు కంటుంటాడు. అయితే అతని ప్రతిభకు తగిన గుర్తింపు దక్కకుండా కొన్ని సామాజిక అడ్డంకులు ఎదురవుతాయి. తన సంగీతాన్ని పెద్ద స్థాయికి తీసుకెళ్లాలన్న ఆశ నెరవేరకుండానే అతని ప్రయాణం కొనసాగుతుంది. ఆ తర్వాతి తరంలో అతని కుమారుడు శివ కూడా సంగీతంపై ఆసక్తితో ముందుకు సాగుతాడు. కానీ అతనికీ జీవితంలో ఎన్నో సవాళ్లు ఎదురవుతాయి. ఇలా ఒక తరం నెరవేర్చుకోలేని కలలు మరో తరానికి వారసత్వంగా మారుతుంటాయి.
ప్రస్తుత కాలానికి వచ్చేసరికి జీవా అనే యువకుడు తన స్నేహితుడు హర్షత్‌తో కలిసి సంగీత ప్రపంచంలో పేరు తెచ్చుకోవాలని ప్రయత్నిస్తుంటాడు. ముఖ్యంగా గానా సంగీతాన్ని కేవలం తన ప్రాంతానికే పరిమితం చేయకుండా, ప్రపంచ స్థాయికి తీసుకెళ్లాలన్నది అతని కోరిక. అయితే ఈ ప్రయాణంలో అతనికి కుటుంబ నేపథ్యం, గత తరాల ఆశలు ఒకవైపు ఉంటే.. తన వ్యక్తిగత లోపాలు, ప్రేమలో ఎదురయ్యే నిరాశలు మరోవైపు అడ్డుపడతాయి. ఒక సందర్భంలో ప్రేమలో తిరస్కరణ ఎదురవడంతో పాటు గొడవలో చిక్కుకున్న జీవా తన జీవితాన్ని మరోసారి ఆలోచించుకోవాల్సి వస్తుంది.
అప్పుడే తాత దాస్ సంగీత ప్రయాణం, తండ్రి శివ చేసిన త్యాగాలు అతనికి అర్థమవుతాయి. గతంలో వాళ్లు ఎదుర్కొన్న కష్టాలను తెలుసుకున్న తర్వాత తన కలను నెరవేర్చుకోవాలనే పట్టుదల జీవాలో పెరుగుతుంది. గల్లీ స్థాయిలో వినిపించే గానా సంగీతానికి దేశవ్యాప్తంగా, అంతర్జాతీయంగా గుర్తింపు తీసుకురావడానికి అతను ఎలాంటి ప్రయత్నాలు చేశాడు? మూడు తరాలుగా కొనసాగుతున్న సంగీత కలను ఈ మనవడు ఎలా ముందుకు తీసుకెళ్లాడు? అనేదే ఈ సినిమా ప్రధాన కథాంశం.
ఈ సినిమాలో హిప్ హాప్ తమిళా ఆది, కేతిక శర్మ, చైత్ర జె. ఆచార్, రమ్య రంగనాథన్, హర్షత్ ఖాన్, నాజర్, కరుణాస్, యోగిబాబు తదితరులు కీలక పాత్రలు పోషించారు. కథ, స్క్రీన్‌ప్లే, దర్శకత్వంతో పాటు సంగీత బాధ్యతలను కూడా హిప్ హాప్ తమిళా ఆదినే నిర్వహించారు. 2026 సెప్టెంబర్ 25న థియేటర్లలో విడుదలైన ఈ సినిమా 2026 నవంబర్ 6 నుంచి SonyLIVలో స్ట్రీమింగ్ అవుతోంది. తమిళంతో పాటు తెలుగు, కన్నడ, మలయాళం, హిందీ భాషల్లోనూ అందుబాటులో ఉంది. మొత్తానికి సంగీతం, ప్రేమ, స్నేహం, కుటుంబ భావోద్వేగాలు కలిసిన ఒక యూత్‌ఫుల్ మ్యూజికల్ ఎంటర్‌టైనర్ చూడాలనుకునేవారు ‘మీసయ మురుక్కు 2’ను SonyLIVలో చూడొచ్చు.
Share
హోమ్ థియేటర్ కొనాలనుకుంటున్నారా? దీని కంటే బెస్ట్ ఉండదేమో!
బ‌క్కోడిపై CSK ఫ్యాన్స్ తిరుగుబాటు? తోపు ప్లేయ‌ర్ల‌ను SRHలోకి పంపిస్తున్నాడ‌ని ఫైర్‌
