Spicy Paneer Rara: బోర్ కొట్టే పన్నీర్ కూరలకు గుడ్ బై.. ఈ కొత్త రకం పన్నీర్ రారా ట్రై చేయండి!

Spicy Paneer Rara: పన్నీర్ అంటే ఇష్టపడని వారుండరు. కానీ ఎప్పుడూ చేసే పన్నీర్ బటర్ మసాలా లేదా పాలక్ పన్నీర్ కాకుండా కొంచెం వెరైటీగా, స్పైసీగా ఏదైనా తినాలనిపిస్తే ‘పన్నీర్ రారా’ ఉత్తమ ఎంపిక. దీని ప్రత్యేకత ఏమిటంటే.. ఇందులో పన్నీర్ ముక్కలతో పాటు.. తురిమిన పన్నీర్‌ను కూడా వాడుతాము. దీని వల్ల గ్రేవీ చాలా చిక్కగా, ప్రతి ముద్దలోనూ పన్నీర్ రుచి తగులుతూ అద్భుతంగా ఉంటుంది. మసాలాలు దట్టించి చేసే ఈ గ్రేవీ కూరను ఇంట్లోనే సులభంగా ఎలా తయారు చేయాలో చూద్దాం.

హోమ్ మేడ్ స్పైసీ పన్నీర్ రారా.. కావాల్సిన పదార్థాలు:

పన్నీర్: 250 గ్రాములు, 100 గ్రాములు

ఉల్లిపాయలు: 2 పెద్దవి

టమాటోలు: 3

అల్లం వెల్లుల్లి పేస్ట్: 1 టేబుల్ స్పూన్

పచ్చిమిర్చి: 3

పెరుగు: 2 టేబుల్ స్పూన్లు

నూనె లేదా వెన్న: 3 టేబుల్ స్పూన్లు

హోల్ స్పైసెస్: బిర్యానీ ఆకు-1, దాల్చిన చెక్క-1, లవంగాలు-3, ఇలాచీ-2, షాజీరా-1/2 టీస్పూన్

పొడి మసాలాలు: కారం-2 స్పూన్లు, ధనియాల పొడి-1 స్పూన్, జీలకర్ర పొడి-1/2 స్పూన్, గరం మసాలా-1/2 స్పూన్, పసుపు-1/4 స్పూన్

కస్తూరి మేథీ: 1 టీస్పూన్

కొత్తిమీర: కొద్దిగా

తయారీ విధానం:
1. ముందుగా ఒక వెడల్పాటి కడాయి.. లేదా పాన్ తీసుకుని అందులో నూనె , వెన్న వేయాలి. వెన్న కరిగిన తర్వాత షాజీరా.. బిర్యానీ ఆకు, లవంగాలు, ఇలాచీ, చెక్క వేసి మంచి సువాసన వచ్చే వరకు వేయించాలి.

2. ఇప్పుడు అందులో సన్నగా తరిగిన ఉల్లిపాయ ముక్కలు వేసి గోల్డెన్ బ్రౌన్ కలర్ వచ్చే వరకు వేయించాలి. ఉల్లిపాయలు బాగా వేగితేనే గ్రేవీకి మంచి రుచి వస్తుంది. ఆ తర్వాత అల్లం వెల్లుల్లి పేస్ట్ వేసి పచ్చి వాసన పోయే వరకు వేయించాలి.

3. ఇందులో టమాటో ప్యూరీ, పచ్చి మిర్చి వేసి కలపాలి. టమాటో ముక్కలు మెత్తబడి నూనె పైకి తేలే వరకు ఉడికించాలి. ఇప్పుడు పసుపు, కారం, ధనియాల పొడి, జీలకర్ర పొడి, రుచికి తగినంత ఉప్పు వేసి బాగా కలపాలి. మసాలాలు మాడకుండా ఉండటానికి కొద్దిగా నీళ్లు పోయవచ్చు.

Also Read: వెజిటేరియన్ చేపల కూర.. శనగపిండి ముక్కలతో అదిరిపోయే టేస్ట్, ట్రై చేస్తే ఫిదా అవ్వాల్సిందే!

4. మంటను సిమ్‌లో ఉంచి, బాగా చిలికిన పెరుగును గ్రేవీలో కలపాలి. పెరుగు దగ్గరపడిన తర్వాత.. మనం తురిమి పెట్టుకున్న 100 గ్రాముల పన్నీర్‌ను ఇందులో వేయాలి. ఈ తురిమిన పన్నీర్ మసాలాలతో.. కలిసి గ్రేవీకి ఒక విభిన్నమైన టెక్స్చర్‌ను ఇస్తుంది. ఇదే ‘పన్నీర్ రారా’ అసలు రహస్యం.

5. గ్రేవీ చిక్కబడిన తర్వాత.. అందులో పన్నీర్ ముక్కలు వేసి నెమ్మదిగా కలపాలి. అవసరమైతే అర కప్పు వేడి నీళ్లు పోసి 5 నిమిషాల పాటు మూత పెట్టి ఉడికించాలి. చివరగా గరం మసాలా.. నలిపిన కస్తూరి మేథీ, సన్నగా తరిగిన కొత్తిమీర చల్లి స్టవ్ ఆపేయాలి.

ఈ స్పైసీ పన్నీర్ రారాను వేడి వేడి కుల్చా, బటర్ నాన్ లేదా జీరా రైస్‌తో తింటే.. ఆ రుచి అద్భుతంగా ఉంటుంది. రెస్టారెంట్‌కు వెళ్లాల్సిన పని లేకుండా ఇంట్లోనే అతి తక్కువ ఖర్చుతో పక్కా ధాబా రుచిని మీరు ఆస్వాదించవచ్చు.