Kerala Fish Curry: కేరళ స్టైల్లో చేపల ఇగురు వండారంటే ఎవరికైనా నచ్చాల్సిందే, రెసిపీ ఇదిగో

చేపలు కూర, పులుసు, వేపుడు పేరు చెబితేనే నోరూరిపోతుంది. ఎప్పుడూ ఒకే స్టైల్ లో కాకుండా కేరళ పద్ధతిలో వండి అదిరిపోయే రుచి వస్తుంది. కొబ్బరి పాలు, చింతపండు, మసాలాల కలయికతో ఈ కర్రీకి ప్రత్యేకమైన టేస్ట్ వస్తుంది. ఇప్పుడు ఈ కర్రీని ఇంట్లో సులభంగా ఎలా తయారు చేసుకోవాలో పూర్తి రెసిపీ తెలుసుకోండి.

కేరళ స్టైల్లో చేపల ఇగురు రెసిపీకి కావాల్సిన పదార్థాలు
చేప ముక్కలు – 6 నుంచి 8
చింతపండు – అర కప్పు (నీటిలో నానబెట్టినది)
కొబ్బరి పాలు – 1½ కప్పు
ఉల్లిపాయలు – రెండు
అల్లం – చిన్న ముక్క
వెల్లుల్లి – 5 రెబ్బలు
పచ్చిమిర్చి – 2 నుంచి 3
కరివేపాకు – కొద్దిగా
కారం – 1 టేబుల్ స్పూన్
ధనియాల పొడి – 1 టేబుల్ స్పూన్
పసుపు – అర టీస్పూన్
ఉప్పు – తగినంత
నూనె – రెడు టేబుల్ స్పూన్లు
ఆవాలు – అర టీస్పూన్
మెంతులు – అర టీస్పూన్

Also read: Sleep with Lights on: రాత్రిపూట లైట్ వేసుకుని నిద్రపోతున్నారా? మీకెంత డ్యామెజ్ అవుతుందో తెలుసా?

కేరళ స్టైల్లో చేపల ఇగురు రెసిపీ
1. ముందుగా చేప ముక్కలను శుభ్రంగా కడిగి నీరు పూర్తిగా వంపేయాలి.
2. చింతపండును నీటిలో నానబెట్టి రసం తీసుకోవాలి. అల్లం, వెల్లుల్లి చిన్న ముక్కలుగా తరిగి పెట్టుకోవాలి.
3. ఉల్లిపాయలను కూడా సన్నగా తరిగి పక్కన పెట్టుకోవాలి.
4. స్టవ్ మీద కళాయి పెట్టి అందులో నూనె వేసి వేడి చేయాలి. నూనె వేడయ్యాక ఆవాలు వేసి చిటపటలాడనివ్వాలి.
5. వెంటనే మెంతులు వేసి తక్కువగా వేయించాలి. తరువాత కరివేపాకు వేసి మంచి సువాసన వచ్చే వరకు వేయించాలి.
6. ఇప్పుడు అల్లం, వెల్లుల్లి వేసి స్వల్పంగా వేయించాలి. తరువాత పచ్చిమిర్చి, చిన్న ఉల్లిపాయలు వేసి బంగారు రంగు వచ్చే వరకు వేయించాలి.
7. కారం, ధనియాల పొడి, పసుపు కొద్దిగా నీటితో కలిపి పేస్ట్‌లా చేసుకోవాలి.
8. ఈ మసాలా పేస్ట్‌ను పాన్‌లో వేసి నెమ్మదిగా కలుపుతూ వేయించాలి.
9. ఇప్పుడు పాన్‌లో కొద్దిగా నీరు పోసి మరిగించాలి. తరువాత చింతపండు రసం వేసి కలపాలి.
10. ఈ మిశ్రమం మరిగిన తర్వాత కొబ్బరి పాలు వేసి మంటను తక్కువగా ఉంచాలి.
11. ఇప్పుడు ఈ మిశ్రమంలో చేప ముక్కలను జాగ్రత్తగా వేసుకోవాలి. స్పూన్‌తో ఎక్కువగా కలపకూడదు.
12. 20 నిమిషాల పాటూ కూరను మగ్గించాలి. కూర దగ్గరగా అయ్యాక గ్యాస్ ఆఫ్ చేయాలి.
13. చివరగా కరివేపాకు వేసి మూత పెట్టి 5 నిమిషాలు ఉంచాలి. ఇలా ఉంచితే కర్రీకి మంచి సువాసన వస్తుంది.

Also read: Excessive cold: వేసవిలో కూడా చలి వేస్తుందా? అయితే మీకు ఈ సమస్యలు ఉన్నట్టే

ఈ కూరను వేడి అన్నంతో కలుపుకుని తింటే చాలా రుచిగా ఉంటుంది. దోసె, చపాతీతో కూడా తినొచ్చు. కర్రీ వండాక రెండు మూడు గంటలు వదిలేసి ఆ తరువాత తింటే రుచి మరింత పెరుగుతుంది.