Madras Style Sambar Recipe: మునక్కాయ సాంబార్ రుచిగా రావాలంటే ఇలా చేసి చూడండి.. తిన్నవారంతా ఫిదా అవ్వాల్సిందే!

Madras Style Sambar Recipe: సౌత ఇండియాలో సాంబార్ రకాలు ఎన్ని ఉన్నా, మద్రాస్ స్టైల్ మునక్కాయ సాంబార్‌కు ఉండే క్రేజ్ వేరు. మునక్కాయల నుంచి వచ్చే ప్రత్యేకమైన వాసన, చిక్కటి కందిపప్పు, ఘాటైన సాంబార్ పొడి కలగలిసి ఈ వంటకానికి ప్రాణం పోస్తాయి. ముఖ్యంగా తమిళనాడులో చేసే సాంబార్‌లో కొన్ని ప్రత్యేకమైన చిట్కాలు పాటిస్తారు. అందుకే ఆ రుచి అంత అద్భుతంగా ఉంటుంది. వేడి వేడి అన్నంలోకి నెయ్యి వేసుకుని ఈ సాంబార్ తింటే.. అమృతంలా అనిపిస్తుంది. ఆ రుచిని మీ వంటగదిలోకి ఎలా తీసుకురావాలో ఇప్పుడు తెలుసుకుందాం.

మద్రాస్ స్టైల్ మునక్కాయ సాంబార్ తయారీ విధానం:
కావాల్సిన పదార్థాలు:

మునక్కాయలు: 5 లేదా 6

కందిపప్పు: 1 కప్పు

చింతపండు: పెద్ద నిమ్మకాయ సైజు

చిన్న ఉల్లిపాయలు – 10

టమాటో – 2

పచ్చిమిర్చి – 2

మసాలాలు: సాంబార్ పొడి – 2 చెంచాలు, పసుపు – 1/2 చెంచా, ఇంగువ – చిటికెడు, ఉప్పు – రుచికి సరిపడా.

పోపు కోసం: నూనె లేదా నెయ్యి, ఆవాలు, జీలకర్ర, ఎండుమిర్చి, కరివేపాకు, మెంతి గింజలు.

తయారీ :

1. ముందుగా కందిపప్పును శుభ్రంగా కడిగి, కొంచెం పసుపు, చుక్క నూనె వేసి కుక్కర్‌లో మెత్తగా ఉడికించుకోవాలి. పప్పు ఉడికిన తర్వాత పప్పు గుత్తితో మెత్తగా మెదిపి పక్కన పెట్టుకోవాలి.

2. ఒక లోతైన గిన్నెలో కొద్దిగా నూనె వేసి చిన్న ఉల్లిపాయలు, పచ్చిమిర్చి వేసి వేయించాలి. ఆ తర్వాత టమాటో ముక్కలు, మునక్కాయ ముక్కలు వేసి రెండు నిమిషాలు మగ్గనివ్వాలి. ఇప్పుడు తగినన్ని నీళ్లు పోసి, కొంచెం ఉప్పు వేసి మునక్కాయలను 70% వరకు ఉడికించాలి.

3. మునక్కాయలు సగం ఉడికాక, అందులో తీసి పెట్టుకున్న చింతపండు రసం పోయాలి. ఇందులోనే సాంబార్ పొడి, పసుపు, మరికొంత ఉప్పు వేసి పచ్చివాసన పోయే వరకు బాగా మరగనివ్వాలి. మద్రాస్ స్టైల్ సాంబార్‌లో చింతపండు పులుపు, సాంబార్ పొడి ఘాటు సమంగా ఉండాలి.

Also Read: నోరూరించే పంజాబీ స్టైల్ మటన్ కర్రీ.. ఇంట్లోనే సింపుల్‌గా రెడీ చేయండిలా!

4. పులుసు బాగా మరిగి మునక్కాయలు పూర్తిగా ఉడికిన తర్వాత, ముందుగా మెదిపి పెట్టుకున్న కందిపప్పును ఇందులో కలపాలి. సాంబార్ మరీ చిక్కగా ఉంటే కొన్ని వేడి నీళ్లు పోసి ఐదు నిమిషాల పాటు తక్కువ మంటపై మరిగించాలి. ఈ సమయంలోనే చిటికెడు బెల్లం ముక్క వేస్తే రుచి మరింత పెరుగుతుంది.

5. మరో చిన్న బాణలిలో నెయ్యి లేదా నూనె వేడి చేయాలి. ఆవాలు, జీలకర్ర, ఎండుమిర్చి, కరివేపాకు వేయాలి. ముఖ్యంగా నాలుగైదు మెంతి గింజలు, చిటికెడు ఇంగువ వేసి వేయించి, ఆ పోపును మరుగుతున్న సాంబార్‌లో కలపాలి. పోపు వేసిన వెంటనే మూత పెడితే ఆ వాసన బయటకు పోకుండా సాంబార్‌కు బాగా పడుతుంది. చివరగా సన్నగా తరిగిన కొత్తిమీర చల్లుకుంటే మద్రాస్ స్టైల్ మునక్కాయ సాంబార్ రెడీ.