‘అగధ’ మూవీ రివ్యూ.. కామాక్షి ఖాతాలో హిట్ పడినట్లేనా..?

Agadha Movie Review : సాధారణ హారర్ సినిమాల్లా కామెడీని నమ్ముకోకుండా, మిస్టరీ–థ్రిల్‌తో ప్రేక్షకులను భయపెట్టే ప్రయత్నమే ‘అగధ’. సీనియర్ దర్శకుడు ఎం.ఎస్. రాజు దర్శకత్వంలో వచ్చిన ఈ చిత్రం దైవిక శక్తి, చీకటి శక్తి మధ్య జరిగే పోరాటాన్ని ఆసక్తికరంగా తెరపైకి తీసుకొచ్చింది.

కథ విషయానికి వస్తే..

మహాదేవి చిన్నతనంలోనే తల్లిదండ్రులను కోల్పోయి బాబాయ్‌ దగ్గర పెరుగుతుంది. అనుకోని పరిస్థితుల్లో ఆమెకు ఓ దైవిక శక్తి పరిచయం కావడంతో పాటు, ఓ సాధువు నుంచి తంత్ర విద్యను నేర్చుకుంటుంది. ఆ శక్తితో ప్రజలను వేధించే అతీంద్రియ సమస్యలను పరిష్కరిస్తూ గుర్తింపు తెచ్చుకుంటుంది. కానీ ఆమె కుటుంబాన్ని ఓ ప్రమాదకరమైన శక్తి వెంటాడటం మొదలవుతుంది. వరుస విషాద ఘటనల వెనుక ఉన్న అసలు రహస్యం ఏంటి? మహాదేవి ఎదుర్కొన్న ఆ శక్తి ఎవరిది? చివరికి మంచి, చెడు మధ్య పోరులో ఎవరు పైచేయి సాధించారనేది సినిమా.

నటీనటుల విషయానికి వస్తే..

కామాక్షి భాస్కర్ల ఈ సినిమాకు ప్రధాన బలం. మహాదేవి పాత్రలో ఆమె చూపించిన భావోద్వేగాలు, భయాన్ని పండించిన విధానం ఆకట్టుకుంటాయి. ఉల్కా గుప్తా తన పాత్రలో భిన్నమైన షేడ్స్ చూపించింది. జోవిక విజయ్ కుమార్ కొన్ని కీలక సన్నివేశాల్లో ప్రేక్షకులకు నిజంగానే ఉత్కంఠ కలిగిస్తుంది. ముఖ్యంగా చర్చి, క్లాస్‌రూమ్ ఎపిసోడ్స్‌లో ఆమె నటన ప్రత్యేకంగా నిలుస్తుంది. శ్రవణ్ రెడ్డి తన పాత్రలో మంచి వేరియేషన్ చూపించగా, భానుచందర్ తదితరులు కూడా తమ పరిధిలో మెప్పించారు.

సినిమా ఎలా ఉందంటే..

ప్రస్తుతం వస్తున్న హారర్ కామెడీలకు భిన్నంగా ‘అగధ’ పూర్తిస్థాయి భయానక వాతావరణాన్ని క్రియేట్ చేయడానికి ప్రయత్నించింది. ప్రారంభంలోనే ప్రేక్షకుడిని కథలోకి తీసుకెళ్లే సంఘటనలు చోటుచేసుకుంటాయి. మహాదేవికి లభించిన దైవిక శక్తి, ఆమె నేర్చుకున్న తంత్ర విద్య, వాటి వెనుక ఉన్న నేపథ్యం ఆసక్తిని పెంచుతాయి. అడవి, గుహ చుట్టూ సాగే సన్నివేశాలు మంచి టెన్షన్‌ను క్రియేట్ చేస్తాయి. ఇంటర్వెల్‌కు ముందు వచ్చే షాకింగ్ ఎపిసోడ్ సినిమాపై అంచనాలను పెంచుతుంది.

సెకండాఫ్‌లో గుహ రహస్యం, అగధ అసలు నేపథ్యం ఒక్కొక్కటిగా బయటపడటంతో కథపై ఆసక్తి కొనసాగుతుంది. ఒక శరీరం నుంచి మరో శరీరానికి ఆత్మ మారే ఎపిసోడ్స్, క్లైమాక్స్‌లో వచ్చే ‘కాలయంత్రం’ ఆలోచన కొత్తగా అనిపిస్తాయి. అయితే ద్వితీయార్ధంలో కథనం కొంత నెమ్మదించడం, వరుసగా వచ్చే ట్విస్టులు ఒక దశలో కాస్త ఎక్కువైనట్టుగా అనిపించడం మైనస్.

టెక్నికల్‌గా..

రాకేశ్ వెంకటాపురం అందించిన నేపథ్య సంగీతం హారర్ సన్నివేశాలకు మంచి ఎఫెక్ట్ ఇచ్చింది. కొన్ని సందర్భాల్లో విజువల్స్ కంటే సౌండ్ డిజైన్‌నే ఎక్కువగా భయపెడుతుంది. నాని చమిడిశెట్టి కెమెరా పనితనం ముఖ్యంగా చీకటి వాతావరణం, గుహ సన్నివేశాల్లో ఆకట్టుకుంటుంది. జునైద్ సిద్ధిఖీ ఎడిటింగ్ ఫస్ట్ హాఫ్‌లో బాగుంది; సెకండాఫ్‌ను మరికొంత కుదించి ఉంటే సినిమా మరింత ప్రభావవంతంగా ఉండేది. నిర్మాణ విలువలు కూడా కథకు తగ్గట్టుగా ఉన్నాయి.

ప్లస్ పాయింట్స్..

* కామాక్షి భాస్కర్ల, జోవిక నటన

* ఆసక్తికరమైన మిస్టిక్ కాన్సెప్ట్

* ఇంటర్వెల్‌లో వచ్చే షాక్

* క్లైమాక్స్‌లో ‘కాలయంత్రం’ ఆలోచన

* బ్యాక్‌గ్రౌండ్ స్కోర్, కెమెరా వర్క్

మైనస్ పాయింట్స్..

* సెకండాఫ్‌లో తగ్గిన వేగం

* కొన్ని చోట్ల ఎక్కువైన ట్విస్టులు

* అక్కడక్కడా అనిపించే సాగదీత

ఫైనల్‌గా..

‘అగధ’ హారర్‌లో కామెడీని కలపకుండా, మిస్టరీ మరియు అతీంద్రియ అంశాలతో ప్రేక్షకులను థ్రిల్ చేయాలనుకున్న సినిమా. కథలో కొత్తదనం కోసం ప్రయత్నం కనిపిస్తుంది. కొంత నెమ్మదిగా సాగే ద్వితీయార్ధాన్ని పక్కన పెడితే, మిస్టిక్ హారర్ సినిమాలను ఇష్టపడేవారికి ఇది ఓసారి ప్రయత్నించదగ్గ మూవీ. పెద్ద అంచనాలు పెట్టుకోకుండా వెళ్తే మంచి థ్రిల్‌ను అందించే అవకాశం ఉంది.