BSNL SIM: బీఎస్‌ఎన్‌ఎల్ సిమ్ సేవలు అర్ధరాత్రి నుంచి షట్‌డౌన్.. సర్వీస్ సెంటర్లలో ఉద్రిక్తత

BSNL SIM: భారత టెలికాం రంగంలో ప్రభుత్వ ఆధ్వర్యంలోని ప్రధాన సంస్థల్లో బీఎస్‌ఎన్‌ఎల్ ఒకటి. దేశవ్యాప్తంగా కోట్లాది మంది వినియోగదారులకు మొబైల్ నెట్‌వర్క్, బ్రాడ్‌బ్యాండ్, ఫైబర్, ల్యాండ్‌లైన్ వంటి సేవలు అందిస్తూ ఎన్నో దశాబ్దాలుగా ప్రజల నమ్మకాన్ని సంపాదించింది. ముఖ్యంగా ప్రైవేట్ నెట్‌వర్క్‌లు చేరని దూర ప్రాంతాల్లో కూడా సిగ్నల్ అందించే శక్తి బీఎస్‌ఎన్‌ఎల్ వద్ద ఉంది. అత్యవసర పరిస్థితుల్లో ప్రభుత్వ కమ్యూనికేషన్ వ్యవస్థకు వెన్నెముకలా నిలిచే బాధ్యత ఈ సంస్థదే. ఒకప్పుడు టెలికాం రంగంలో అగ్రస్థానంలో ఉన్న బీఎస్‌ఎన్‌ఎల్, ప్రైవేట్ సంస్థల పోటీ మధ్య కష్టాలను ఎదుర్కొన్నప్పటికీ గ్రామీణ ప్రాంతాల్లో ఇంకా కోట్ల మంది కోసం ప్రధాన ఆధారంగా నిలిచింది. ప్రజలు నమ్మకంతో ఉపయోగించే ఈ సంస్థ ఇప్పుడు సిమ్ సేవల నిలిపివేత సమస్యతో భారీ కష్టాలను ఎదుర్కొంటోంది.

ఎప్పుడు.. ఎక్కడ నుంచి సేవలు నిలిచిపోయాయి

బీఎస్‌ఎన్‌ఎల్‌ సిమ్‌ సేవలు పూర్తిగా నిలిచిపోయిన పరిస్థితి కేరళలోని పతనంతిట్ట జిల్లా నుంచి మొదలై దేశవ్యాప్తంగా పెద్ద సమస్యగా మారింది. డిసెంబర్ 01 నుంచి మొత్తం మార్గాలు మూసుకుపోయాయి. కొత్త సిమ్ కార్డులు ఇవ్వడం ఆగిపోయింది. అంటే మొబైల్‌ పోయిన వారు లేదా సిమ్ పని చేయనివారు పూర్తిగా ఇబ్బందులు పడుతున్నారు. నాలుగు రోజులుగా బీఎస్‌ఎన్‌ఎల్ ఎక్స్‌చేంజ్, సర్వీస్ సెంటర్లలో కస్టమర్ల క్యూలు కడుతున్నారు. వేల సంఖ్యలో ఫిర్యాదులు అందుతున్నాయి, స్టాఫ్ సభ్యులు కస్టమర్ల కోపాన్ని తగ్గించేందుకు ప్రయత్నం చేస్తున్నా ఫలితం లేకుండా పోతుంది. కానీ పరిస్థితి ఒక్క మాటలో చెప్పాలంటే పూర్తిగా ఔట్ ఆఫ్ కంట్రోల్.

సంచార్ ఆధార్‌కు 4 నెలలుగా బిల్లులు చెల్లించలేదా..

ఇదంతా ఎలా, ఎందుకు జరిగిందంటే… బీఎస్‌ఎన్‌ఎల్ ఉద్యోగులు సిమ్ ఇష్యూ చేసే సమయంలో ఉపయోగించే యాప్ పేరు సంచార్ ఆధార్. ఈ యాప్ ద్వారానే కస్టమర్ వివరాలు తీసుకుని సిమ్ జనరేట్ చేస్తారు. ఈ యాప్‌ను సుమారు 6సంవత్సరాల క్రితం ఇంటెన్స్ అనే ప్రైవేట్ కంపెనీ తయారు చేసింది. ప్రతి సంవత్సరం కాంట్రాక్ట్‌ రీన్యూ అయ్యేది, నెలకు ఫీజు చెల్లించేది బీఎస్‌ఎన్‌ఎల్. కానీ గత 4 నెలలుగా బిల్లు చెల్లించలేదని సమాచారం. ఇంకా బకాయిలు లక్షల్లో ఉన్నట్టుగా తెలుస్తోంది. నవంబర్ 30 రాత్రి కాంట్రాక్ట్ ముగియగానే అర్ధరాత్రి నుంచి యాప్ సర్వీసులు పూర్తిగా షట్‌డౌన్. ఫలితంగా డిసెంబర్ 1 ఉదయం నుంచి ఒక్క సిమ్ కూడా ఇష్యూ చేయలేని పరిస్థితి.

బీఎస్‌ఎన్‌ఎల్ కొత్త కస్టమర్లకు డోర్ క్లోజ్

దీంతో కస్టమర్లకే కాదు, ఉద్యోగులకూ షాక్. యాప్ పని చేయడం లేదని చెప్పడం తప్ప మరేమీ చేయలేని పరిస్థితి. బీఎస్‌ఎన్‌ఎల్ ఉద్యోగులు ఇప్పుడీ సమస్య కేవలం కేరళలో కాకుండా దేశవ్యాప్తంగా ఉందని చెబుతున్నారు. అంటే మొత్తం బీఎస్‌ఎన్‌ఎల్ కొత్త కస్టమర్లకు డోర్ క్లోజ్ అయింది. డేటా పోయినవారు డూప్లికేట్ కోరినా కూడా ఇవ్వలేని పరిస్థితి. కేవలం సిగ్నల్ పోయినా కష్టమే, కానీ సిమ్ సేవలే నిలిచిపోవడం అంటే సమస్య యొక్క తీవ్రత మరింత పెరిగినట్టే.

Also Read: Apple iPhone: ఆపిల్ ఫోల్డ్ డిజైన్‌లో భారీ మార్పు.. ఐఫోన్ ఫోల్డ్ ఇ-సిమ్ ఫ్యూచర్‌కి డోర్ ఓపెన్

ప్రైవేట్ కంపెనీ చేతిలోకి కస్టమర్ల వివరాలు

మరో ఆసక్తికర విషయం ఏమిటంటే… సంచార్ ఆధార్ యాప్ ద్వారా తీసుకున్న కస్టమర్ డేటా మొదట ఇంటెన్స్ కంపెనీ సిస్టమ్‌‌ల్లోకి వెళ్తుంది. ఆ తర్వాత బీఎస్‌ఎన్‌ఎల్ పోర్టల్ సంచార్‌ సాఫ్ట్‌కు ట్రాన్స్‌ఫర్ అవుతుంది. అంటే కస్టమర్ వివరాలపై నియంత్రణ పూర్తిగా ప్రభుత్వ రంగ సంస్థ దగ్గర కాకుండా, ఒక ప్రైవేట్ కంపెనీ చేతిలో కూడా ఉండేలా మారింది. ఇది డేటా సెక్యూరిటీపై పెద్ద ప్రశ్నలను లేవనెత్తుతోంది. ప్రభుత్వ సంస్థ అయిన బీఎస్‌ఎన్‌ఎల్ డేటా ప్రైవేట్ కంపెనీ చేతిలో ఉండటం ఎంత సేఫ్ అన్న సందేహాలు బలంగా వినిపిస్తున్నాయి.

కొత్త యాప్‌ .. కేరళ సర్కిల్‌లో..

ఇక బీఎస్‌ఎన్‌ఎల్ వైపు నుంచి వచ్చిన తాజా సమాచారం ప్రకారం, తమ ఐటీ విభాగం అంతర్గతంగా (Internally) ఒక కొత్త యాప్‌ తయారు చేస్తోంది. త్వరలో దీనిని ప్రారంభిస్తామని చెబుతున్నారు. అభివృద్ధి పనులు కేరళ సర్కిల్‌లో ఫుల్ స్పీడ్‌‌లో జరుగుతున్నాయని అంటున్నారు. కానీ కస్టమర్లు అడుగుతున్న ప్రశ్న స్పష్టంగా ఉంది… యాప్ తిరిగి ఎప్పుడు స్టార్ట్ అవుతుంది? కొత్త సిమ్ ఇవ్వడం మళ్లీ ఎప్పుడు మొదలవుతుంది? ఆ రోజు వరకు వేలాది మంది ఎలా మేనేజ్ అవ్వాలి?

నష్టపోయింది వినియోగదారులేనా..

ప్రైవేట్ కంపెనీలతో ప్రభుత్వ సంస్థలు ఎలా వ్యవహరిస్తున్నాయో ఈ సంఘటన మరోసారి బయటపడింది. బకాయిలు చెల్లించకపోవడం, ప్లానింగ్ లేకపోవడం, డేటాపై నియంత్రణ కోల్పోవడం, చివరకు నష్టపోయేది సాధారణ వినియోగదారులే. బీఎస్‌ఎన్‌ఎల్ తిరిగి నిలబడాలని ఆశిస్తున్న కస్టమర్లకు ఈ పరిణామాలు పెద్ద నిరాశను ఇచ్చాయి. ఇప్పుడు అందరి దృష్టి ఒక్కటే… కొత్త యాప్ ఎప్పుడు వస్తుంది? సేవలు ఎప్పుడు తిరిగి ప్రారంభమవుతాయి?

సేవలు ఎప్పుడు మొదలవుతాయి?

ఈ నాలుగు రోజులుగా సిమ్ సేవలు పూర్తిగా ఆగిపోవడంతో ప్రజలు తీవ్రమైన ఇబ్బందులను ఎదుర్కొంటున్నారు. అవసరమైన సమయంలో సేవలు అందకపోవడం వల్ల వినియోగదారుల ఆవేదన, టెలికాం రంగంలో జరుగుతున్న సమస్యలపై పెద్ద చర్చకు దారితీసింది. ఈ సిమ్ సేవల బ్లాకౌట్ టెలికాం చరిత్రలో ఒక కీలక ఘటనగా నిలిచే అవకాశం ఉంది. పరిస్థితి ఎలా మారుతుందో చూడాలంటే ఇంకా వేచి చూడాల్సిందే, కానీ ఇప్పటి వరకు బీఎస్‌ఎన్‌ఎల్ వినియోగదారులు అనుభవిస్తున్న కష్టాలు మాత్రం తగ్గే సూచనలు కనిపించడం లేదు. సేవలు ఎప్పుడు స్టార్ట్ అవుతాయి, యాప్ తిరిగి పని చేయడానికి ఎంత సమయం పడుతుంది, సంస్థ ఎలా స్పందిస్తుంది అనే ప్రశ్నలపై దేశవ్యాప్తంగా ప్రశ్నగా మారింది.భవిష్యత్తులో ఈ సమస్య ఎలా పరిష్కారమవుతుందో చూడాలి.