గూగుల్ క్రోమ్ యూజర్లకు అలర్ట్.. ఈ ఒక్క సెట్టింగ్ ఆన్ చేయకపోతే మీ పాస్‌వర్డ్స్, పర్సనల్ డేటా గోవిందా!

Google Chrome Security: చాలామంది ఆన్‌లైన్‌లో బ్యాంకింగ్, షాపింగ్, ఆఫీస్ పనులు చేయడానికి గూగుల్ క్రోమ్‌నే ఎక్కువగా వాడుతుంటారు. అయితే మనం ఉపయోగించే బ్రౌజర్‌లోనే కొన్ని సెక్యూరిటీ సెట్టింగ్స్ ఉన్నాయనే విషయం చాలామందికి తెలియదు. వాటిలో ముఖ్యమైనది ‘ఎన్‌హాన్స్‌డ్ సేఫ్ బ్రౌజింగ్’ (Enhanced Safe Browsing). దీన్ని ఆన్ చేసుకుంటే ప్రమాదకర వెబ్‌సైట్లు, అనుమానాస్పద డౌన్‌లోడ్స్, హానికరమైన ఎక్స్‌టెన్షన్ల గురించి క్రోమ్ మరింత ముందుగానే హెచ్చరించగలదు. ముఖ్యంగా వ్యక్తిగత ఖాతాలు, ఆన్‌లైన్ చెల్లింపులు చేసే వారు ఈ సెట్టింగ్ గురించి తెలుసుకోవడం మంచిది.

ఎన్‌హాన్స్‌డ్ ప్రొటెక్షన్ అంటే?

క్రోమ్‌లో సాధారణంగానే సేఫ్ బ్రౌజింగ్ రక్షణ ఉంటుంది. ఇది తెలిసిన ప్రమాదకర వెబ్‌సైట్లు, ఫైళ్లను గుర్తించి హెచ్చరిస్తుంది. ఎన్‌హాన్స్‌డ్ ప్రొటెక్షన్ మాత్రం అదనపు తనిఖీలు చేస్తుంది. కొత్తగా కనిపించే మోసపూరిత సైట్లు, ప్రమాదకర డౌన్‌లోడ్స్, అనుమానాస్పద బ్రౌజర్ ఎక్స్‌టెన్షన్లను గుర్తించడంలో ఇది సహాయపడుతుంది. దీంతో ఆన్‌లైన్‌లో ఏదైనా తెరవడానికి ముందు మరింత జాగ్రత్తగా ఉండొచ్చు.

సెట్టింగ్‌ను ఎలా ఆన్ చేయాలి?

ముందుగా క్రోమ్ ఓపెన్ చేసి కుడివైపు పైన కనిపించే మూడు చుక్కలపై క్లిక్ చేయండి. తర్వాత సెట్టింగ్స్‌లోకి వెళ్లి Privacy and Security ఎంపికను తెరవండి. అక్కడ ‘Safe Browsingపై క్లిక్ చేసి Enhanced Protectionను ఎంచుకోండి. ఫోన్‌లో కూడా ఇదే విధంగా సెట్టింగ్స్‌లో ఈ ఎంపికను వెతికి ఆన్ చేయవచ్చు. అయితే క్రోమ్ వెర్షన్, పరికరాన్ని బట్టి మెనూ పేర్లు లేదా వాటి స్థానం కొద్దిగా మారవచ్చు.

Also Read: వృద్ధులకు భారీ ఊరట.. బ్యాంకుకు వెళ్లకుండానే ‘లైఫ్ సర్టిఫికెట్’ సమర్పించే సూపర్ ఛాన్స్!

దీని వలన ఉపయోగమేంటి?

పిషింగ్ లేదా మాల్‌వేర్ ఉన్నట్టు అనుమానం వచ్చిన వెబ్‌సైట్లను తెరిచేటప్పుడు క్రోమ్ హెచ్చరిక చూపించవచ్చు. ప్రమాదకరంగా ఉండే ఫైళ్ల డౌన్‌లోడ్‌లను అదనంగా తనిఖీ చేస్తుంది. అలాగే హానికరమైన ఎక్స్‌టెన్షన్లను గుర్తించడంలోనూ ఉపయోగపడుతుంది. కొత్త ఆన్‌లైన్ ముప్పులను త్వరగా గుర్తించేందుకు కూడా ఈ ఫీచర్ తోడ్పడుతుంది. అయితే ప్రతి ప్రమాదాన్ని ఇది అడ్డుకుంటుందని అనుకోకూడదు.

గుర్తుంచుకోవాల్సిన విషయాలు:

ఈ రక్షణ కోసం క్రోమ్ కొన్ని అదనపు భద్రతా సమాచారాన్ని గూగుల్‌తో పంచుకుంటుంది. అందులో మీరు సందర్శించే వెబ్‌సైట్లు లేదా డౌన్‌లోడ్లకు సంబంధించిన వివరాలు ఉండొచ్చు. కాబట్టి.. ఆన్ చేసే ముందు గూగుల్ ప్రైవసీ వివరాలు చదవాలి. ఆల్వేస్ యూజ్ సెక్యూర్ కనెక్షన్స్, థర్డ్ పార్టీ కుకీల సెట్టింగ్స్‌ను కూడా పరిశీలించండి. సేఫ్టీ చెక్‌తో పాస్‌వర్డ్‌లు, అప్‌డేట్లు, ఎక్స్‌టెన్షన్లను గమనించాలి. అనుమానాస్పద లింకులు తెరవకపోవడం, తెలియని ఫైళ్లు డౌన్‌లోడ్ చేయకపోవడం కూడా అంతే ముఖ్యం. ఈ చిన్న జాగ్రత్తలు మీ ఆన్‌లైన్ ఖాతాలను మరింత సురక్షితంగా ఉంచడంలో సహాయపడతాయి.

Also Read: మీ ఐఫోన్‌లో కూడా Decline బటన్ కనిపించడం లేదా? అసలు కారణం ఇదే!