iPhone Scam: ఖరీదైన ఐఫోన్ పోగొట్టుకున్న బాధలో ఉన్నవారికి.. ‘మీ ఫోన్ దొరికింది’ అని ఒక మెసేజ్ వస్తే ఆ ఆనందం మాటల్లో చెప్పలేం. సరిగ్గా ఇదే ఎమోషన్ను సైబర్ నేరగాళ్లు తమకు అనుకూలంగా మార్చుకుంటున్నారు. పోయిన ఫోన్ తిరిగి వస్తుందన్న ఆశతో మీరు చేసే ఒక చిన్న పొరపాటు, మీ బ్యాంక్ అకౌంట్ను పూర్తిగా ఖాళీ చేసే ప్రమాదం ఉంది. ఈ కొత్త రకం మోసం గురించి కేంద్ర హోం మంత్రిత్వ శాఖ, ఇండియన్ సైబర్ క్రైమ్ కోఆర్డినేషన్ సెంటర్ (I4C) తాజాగా కీలక హెచ్చరికలు జారీ చేశాయి.
ఫోన్ పోగానే చాలామంది కంగారులో సోషల్ మీడియా గ్రూపుల్లో తమ ఆల్టర్నేట్ మొబైల్ నంబర్ ఇచ్చి సాయం కోరుతుంటారు. సైబర్ కేటుగాళ్లు ఇలాంటి పోస్టులపైనే ఒక కన్నేసి ఉంచుతారు. అంతేకాకుండా.. ఐఫోన్లోని Find My ఫీచర్లో Lost Mode ఆన్ చేసినప్పుడు స్క్రీన్ మీద కనిపించే కాంటాక్ట్ నంబర్ను, పాత డేటా లీకుల ద్వారా సేకరించిన మీ ఈ-మెయిల్ ఐడీలను వీరు వాడుకుని వల విసురుతారు.
ఫోన్ పోయిన కొద్దిసేపటికే బాధితులకు Apple Support పేరుతో ఒక SMS లేదా ఈ-మెయిల్ వస్తుంది. మీ ఫోన్ లొకేషన్ ట్రాక్ అయిందని, భద్రతా కారణాల వల్ల లాక్ చేశామని అందులో ఉంటుంది. లొకేషన్ చూడటానికి కింద ఒక లింక్ ఇస్తారు. అది అచ్చం యాపిల్ వెబ్సైట్ లాగే ఉండటంతో బాధితులు నమ్మి, తమ యాపిల్ ఐడీ, పాస్వర్డ్, ఓటీపీ వివరాలను ఎంటర్ చేస్తారు.
మీ వివరాలు సేకరించాక, ఆ ఫోన్ను మీ యాపిల్ అకౌంట్ నుంచి రిమూవ్ చేయమని ఆ ఫేక్ సైట్లో సూచిస్తారు. అలా చేస్తే ఫోన్కు ఉన్న యాక్టివేషన్ లాక్ తొలగిపోయి, దొంగలు ఆ ఫోన్ను సులభంగా అమ్ముకునే అవకాశం కలుగుతుంది. దాంతో పాటు మీ పర్సనల్ డేటా, బ్యాంకింగ్ యాప్స్ యాక్సెస్ కూడా వారి చేతుల్లోకి వెళ్లిపోతుంది.
యాపిల్ సంస్థ ఎప్పుడూ ఫోన్ లొకేషన్ కోసం ఎస్ఎంఎస్ లేదా లింకులను పంపదని గుర్తుంచుకోండి. అలాంటి మెసేజ్లు వస్తే అస్సలు క్లిక్ చేయకండి. మీ ఫోన్ స్టేటస్ తెలుసుకోవడానికి కేవలం అధికారిక iCloud వెబ్సైట్ లేదా మరో యాపిల్ డివైజ్లోని ఫైండ్ మై యాప్ మాత్రమే వాడండి. ఎవరు అడిగినా మీ అకౌంట్ నుంచి ఫోన్ను రిమూవ్ చేయకండి, ఓటీపీలను ఎవరితోనూ పంచుకోకండి.
Also Read: క్రియేటర్లు, స్టూడెంట్లకు జియో బంపర్ గిఫ్ట్.. రూ.349 రీఛార్జ్తో ఏడాది పాటు ఫ్రీ సబ్స్క్రిప్షన్!