Air Cooler Tips: జూన్ నెల మూడోవారంలోకి అడుగుపెట్టినప్పటికీ తెలుగు రాష్ట్రాల్లో ఎండలు.. వేసవిని తలపిస్తున్నాయి. దీంతో చాలా ఇళ్లల్లో ఎయిర్ కూలర్లు ఇప్పటికీ నాన్ స్టాప్ గా పనిచేస్తున్నాయి. అయితే చాలా మంది కూలర్ ఆన్ చేసినప్పటికీ గదిలో ఉక్కపోతగా ఉందనో లేదా కాసేపటికే జిగటగా మారిపోతుందనో అంటుంటారు. దీనికి ప్రధాన కారణం గదిలో పెరిగిపోయే తేమ శాతం. ఈ సమస్యకు ‘ఎగ్జాస్ట్ ఫ్యాన్’ (Exhaust Fan)తో చెక్ పెట్టొచ్చని నిపుణులు అంటున్నారు. అదెలాగో ఇప్పుడు చూద్దాం.
సాధారణంగా కూలర్లు నీటిని ఆవిరి చేయడం ద్వారా చల్లటి గాలిని ఇస్తాయి. అయితే గది తలుపులు, కిటికీలు పూర్తిగా మూసేస్తే.. ఆ నీటి ఆవిరి గదిలోనే పేరుకుపోయి తేమ (Humidity) విపరీతంగా పెరిగిపోతుంది. దీనివల్ల చల్లదనం తగ్గడమే కాకుండా ఒళ్లంతా చెమటలు పట్టి ఉక్కపోతగా అనిపిస్తుంది. ఇక్కడే ఎగ్జాస్ట్ ఫ్యాన్ ఎంతో ఉపయోగకరంగా మారనుంది. గదిలో పేరుకుపోయిన ఈ వేడి, తేమతో కూడిన గాలిని ఎగ్జాస్ట్ ఫ్యాన్ బయటకు నెట్టేస్తుంది. ఫలితంగా కూలర్ ఇచ్చే తాజా చల్లటి గాలి గది అంతా వేగంగా విస్తరించి ఆహ్లాదకరమైన అనుభూతిని పంచుతుంది.
కూలర్ సమర్థవంతంగా పనిచేయాలంటే గదిలో ‘క్రాస్ వెంటిలేషన్’ తప్పనిసరి. ఒకవైపు నుంచి వచ్చే గాలి మరోవైపు నుంచి బయటకు వెళ్లడం కూలర్ కు చాలా అవసరం. కాబట్టి కూలర్కు ఎదురుగా ఉండే గోడకు లేదా కిటికీకి ఎగ్జాస్ట్ ఫ్యాన్ అమర్చడం వల్ల గదిలో గాలి ప్రసరణ నిరంతరాయంగా జరుగుతుంది. ఇది గదిలోని వేడి గాలిని త్వరగా బయటకు పంపి.. కూలర్ పనిభారాన్ని అమాంతం తగ్గిస్తుంది. అంతేకాకుండా ఏసీ లాంటి చల్లదనాన్ని ఇస్తూ గదిని ఐస్ లా మార్చేస్తుంది.
Also Read: భూ కబ్జా ఆరోపణలు.. కోర్టులో పవన్కు బిగ్ రిలీఫ్.. సంచలన ఉత్తర్వులు జారీ
గది త్వరగా చల్లబడటం వల్ల కూలర్ను ఎక్కువ సమయం హై-స్పీడ్లో పెట్టాల్సిన అవసరం ఉండదని నిపుణులు అంటున్నారు. దీనివల్ల కరెంట్ బిల్లు కూడా ఆదా అవుతుందని పేర్కొంటున్నారు. అంతేకాకుండా గదిలో తేమ ఎక్కువగా ఉంటే బ్యాక్టీరియా, బూజు పెరిగే అవకాశం ఉంటుందని.. ఎగ్జాస్ట్ ఫ్యాన్ వాడటం వల్ల గది పొడిగా మారి శ్వాసకోస సమస్యలు ఉన్నవారికి ఎంతో ఉపశమనం లభిస్తుందని వివరిస్తున్నారు. కాబట్టి, ఈసారి కూలర్ ఆన్ చేసినప్పుడు.. గదిలోని ఎగ్జాస్ట్ ఫ్యాన్ను కూడా కాసేపు రన్ చేస్తే బెస్ట్ అని నిపుణులు స్పష్టం చేస్తున్నారు.
Also Read: అద్దె ఇంట్లో ఏసీలు, గీజర్లు పెట్టొచ్చా? యజమాని అనుమతి లేకుండా.. చేయగలిగే మార్పులివే!
Share
నజ్రియా కొంపముంచిన సెన్సేషనల్ పోస్ట్.. ఆ ఒక్క మాటతో బుక్కయిపోయిందా?
కిషన్రెడ్డి మహారాష్ట్ర టూర్.. రేవంత్కు భయపడ్డారా? తుమ్మిడిహట్టిపై తాడోపేడో తేల్చేందుకా?
