Vivo Pocket: స్మార్ట్‌ఫోన్ కెమెరాలతో ఇప్పటికే ఎన్నో కొత్త ప్రయోగాలు చేసిన వివో.. ఇప్పుడు మరో అడుగు ముందుకేయబోతోంది. ఇప్పటివరకు ఫోన్లలోనే గింబల్ టెక్నాలజీని పరిచయం చేసిన ఈ బ్రాండ్.. ఇప్పుడు ప్రత్యేక గింబల్ కెమెరాల మార్కెట్‌పై ఫోకస్ పెట్టినట్లు కనిపిస్తోంది. దీనికి బలం చేకూరుస్తూ తాజాగా ఓ ఆసక్తికర విషయం బయటకు వచ్చింది. వివో తమ కొత్త కెమెరా ఉత్పత్తుల కోసం Vivo Pocket పేరుతో ట్రేడ్‌మార్క్ దరఖాస్తు చేసింది. దీంతో DJI, Insta360 వంటి బ్రాండ్లకు పోటీగా వివో కూడా ఈ మార్కెట్లోకి రాబోతోందా అనే ఆసక్తి మొదలైంది. ఇంతకీ ఈ వివో పాకెట్ ప్రత్యేకతలు ఏంటి? కంపెనీ ఎలాంటి కెమెరాలను తీసుకురాబోతోందో చూద్దాం.
వివో కొత్త కెమెరా ప్లాన్‌కు సంబంధించి బయటపడిన వివరాలు ఇప్పుడు ఆసక్తిని పెంచుతున్నాయి. HiTech24 గుర్తించిన ట్రేడ్‌మార్క్ దరఖాస్తు అమెరికా పేటెంట్ అండ్ ట్రేడ్‌మార్క్ కార్యాలయం (USPTO)లో నమోదైంది. ఇందులో Vivo Pocket అనే పేరును పేర్కొన్నారు. TMViewలో ఉన్న వివరాల ప్రకారం.. ఈ దరఖాస్తు ప్రస్తుతం Application Filed స్థితిలో ఉంది. దీని స్థితి తేదీ 2026 సెప్టెంబర్ 22గా నమోదైంది. ఈ ట్రేడ్‌మార్క్‌ను వివో మొబైల్ కమ్యూనికేషన్ కంపెనీ లిమిటెడ్ దాఖలు చేసింది. కంపెనీ చిరునామా కూడా చైనాకు చెందినదిగానే ఉంది.
ఈ ట్రేడ్‌మార్క్‌లో కేవలం గింబల్ కెమెరాల పేర్లే లేవు. డిజిటల్ కెమెరాలు, సినిమాటిక్ కెమెరాలు, థర్మల్ ఇమేజింగ్ కెమెరాలు వంటి ఉత్పత్తులను కూడా ఇందులో చేర్చారు. వీటితో పాటు కెమెరా బ్యాగులు, ఆప్టికల్ లెన్స్‌లు, ఫిల్టర్లు, మోనోపాడ్‌లు, గింబల్స్, రిమోట్ కంట్రోల్స్ వంటి యాక్సెసరీల పేర్లు కూడా ఉన్నాయి. దీంతో వివో ఒక కెమెరాను మాత్రమే కాకుండా.. దానికి అవసరమైన ఉపకరణాలతో కలిపి పూర్తి ప్రొడక్ట్ లైనప్‌ను తీసుకురావాలని చూస్తోందా అనే ఆసక్తి మొదలైంది. అయితే, ట్రేడ్‌మార్క్‌లో ఇన్ని ఉత్పత్తుల పేర్లు ఉన్నంత మాత్రాన అవన్నీ మార్కెట్లోకి వస్తాయని చెప్పలేం. దీనిపై కంపెనీ నుంచి ఇంకా అధికారిక ప్రకటన రాలేదు.
Also Read: iPhone Air 2, iPhone 18 డిజైన్ లీక్.. కొత్త ఫోన్లలో ఎలాంటి మార్పులు ఉండనున్నాయంటే?
వివోకు గింబల్ టెక్నాలజీ కొత్తేమీ కాదు. గతంలో తన కొన్ని X సిరీస్ స్మార్ట్‌ఫోన్లలోనే ఈ టెక్నాలజీని ఉపయోగించింది. ముఖ్యంగా ఐదు దిశల్లో కెమెరా కదలికలను నియంత్రిస్తూ వీడియోలు మరింత స్థిరంగా వచ్చేలా చేసింది. అంతేకాదు.. వీడియో తీసేటప్పుడు కెమెరా కదిలినా హారిజన్ లైన్ వంగిపోకుండా ఉంచే ప్రత్యేక మోడ్‌ను కూడా అందించింది. ఇటీవల బ్లూఇమేజ్ ఇమేజింగ్ విభాగం కింద గింబల్ కెమెరాను పోలిన మరో కొత్త ఉత్పత్తి ఆకారాన్ని కూడా ప్రదర్శించింది. ఈ పరిణామాలను చూస్తే ప్రత్యేక గింబల్ కెమెరాల తయారీపై వివో ఆసక్తిగా ఉన్నట్లు తెలుస్తోంది.
ప్రస్తుతం ప్రత్యేక గింబల్ కెమెరాల మార్కెట్‌లో DJI, Insta360 వంటి బ్రాండ్లు ముందున్నాయి. ఇప్పుడు వివో కూడా ఈ రంగంలోకి వస్తే పోటీ మరింత పెరిగే అవకాశం ఉంది. మరోవైపు హానర్ ఇప్పటికే తన Robot Phoneతో కొత్త ప్రయోగం చేసింది. ఇందులో 200 మెగాపిక్సెల్ సెన్సర్‌తో కూడిన మోటరైజ్డ్ గింబల్ కెమెరా ఉంది. చైనాలో 12GB RAM, 512GB స్టోరేజ్ వేరియంట్ ధర సుమారు రూ.1,41,000గా ఉంది.
గింబల్ కెమెరాల ప్రధాన ఉపయోగం వీడియోలు తీసేటప్పుడు వచ్చే వణుకును తగ్గించడం. ముఖ్యంగా ట్రావెల్ వీడియోలు, వ్లాగ్స్ తీసేవారికి ఇవి బాగా ఉపయోగపడతాయి. మరి వివో తీసుకొచ్చే Vivo Pocket కూడా చిన్న సైజులో, సులభంగా ఎక్కడికైనా తీసుకెళ్లేలా ఉంటుందా? కెమెరా క్వాలిటీ, బ్యాటరీ, యాప్ సపోర్ట్, ధర విషయంలో ఎలాంటి ఫీచర్లు ఇస్తుంది? అనేది ఆసక్తికరంగా మారింది. వీటన్నింటిపై స్పష్టత రావాలంటే వివో అధికారిక ప్రకటన వచ్చే వరకు వేచి చూడాల్సిందే.
Also Read: నెల రోజుల ఇంటర్నెట్ ఉచితం.. BSNL ధమాకా ఆఫర్‌లో ఎన్ని బెనిఫిట్స్ ఉన్నాయో తెలుసా?
Share
ఏడాది నిల్వ ఉండే.. పండు మిరపకాయ పచ్చడి పక్కా కొలతలతో!
చనిపోయిన వ్యక్తి మళ్లీ పుట్టాడా? ఈ బాలుడి కథ వింటే షాకవుతారు!
