CM Revanth Reddy: తెలంగాణ రైజింగ్ గ్లోబల్ సమ్మిట్.. పాస్‌లు ఉంటేనే ఎంట్రీ, సీఎం రేవంత్ రెడ్డి కీలక ఆదేశాలు

CM Revanth Reddy: తెలంగాణ ముఖ్యమంత్రి రేవంత్ రెడ్డి ఈరోజు భారత్ ఫ్యూచర్ సిటీలో బిజీగా పర్యటించారు. అక్కడ నిర్మాణంలో ఉన్న భారత్ స్కిల్స్ యూనివర్సిటీ పనులను పరిశీలించారు. అనంతరం డిసెంబర్ 8, 9 తేదీలలో జరగనున్న తెలంగాణ రైజింగ్ గ్లోబల్ సమ్మిట్ ఏర్పాట్లను క్షుణ్ణంగా పర్యవేక్షించారు. ఈ సమ్మిట్‌కు రాష్ట్ర ప్రభుత్వం భారీ ఏర్పాట్లు చేస్తోంది.

సమ్మిట్ ఏర్పాట్లను పరిశీలించిన ముఖ్యమంత్రి రేవంత్ రెడ్డి అధికారులకు కీలక ఆదేశాలు జారీ చేశారు. ఏర్పాట్లు అంతర్జాతీయ స్థాయిలో ఉండాలని స్పష్టం చేశారు. ఈ సమ్మిట్‌కు ప్రపంచవ్యాప్తంగా వివిధ దేశాల నుండి ప్రతినిధులు హాజరవుతారని తెలిపారు. వివిధ దేశాల అంబాసిడర్లు కూడా ఇందులో పాల్గొనే అవకాశం ఉందన్న విషయాన్ని గుర్తుచేశారు. హాజరయ్యే ప్రతినిధులకు ఎలాంటి ఇబ్బందులు కలగకుండా చూడాల్సిన బాధ్యత అధికారులపై ఉందని సీఎం నొక్కి చెప్పారు.

భద్రత విషయంలో ముఖ్యమంత్రి అత్యంత కఠినంగా వ్యవహరించారు. పాస్ లు లేకుండా ఎవరికీ ప్రవేశం ఉండకూడదని ఆదేశించారు. సమ్మిట్‌తో సంబంధం లేని వ్యక్తులకు ఎట్టి పరిస్థితుల్లోనూ ఎంట్రీ ఇవ్వడానికి వీలు లేదని స్పష్టం చేశారు. వివిధ శాఖల అధికారులు సైతం తమ విభాగాల వారీగా పకడ్బందీగా నియంత్రిత ఎంట్రీ ద్వారా మాత్రమే లోపలికి రావాలని తెలిపారు. తాను స్వయంగా ఈ ఏర్పాట్లను ఎప్పటికప్పుడు పరిశీలిస్తానని చెప్పారు.

సమ్మిట్ విజయవంతం కోసం పోలీస్ సిబ్బంది కట్టుదిట్టమైన చర్యలు తీసుకోవాలని సీఎం రేవంత్ రెడ్డి సూచించారు. పార్కింగ్ సమస్యలు తలెత్తకుండా తగిన చర్యలు తీసుకోవాలని ఆదేశించారు. బందోబస్తు విధులకు వచ్చే పోలీస్ సిబ్బందికి ఎలాంటి ఇబ్బందులు కలగకుండా తగిన సౌకర్యాలు కల్పించాలని కోరారు. సమ్మిట్‌కు హాజరయ్యే మీడియా ప్రతినిధులకు సైతం అవసరమైన అన్ని ఏర్పాట్లు చేయాలని అధికారులను ఆదేశించారు. తెలంగాణ రైజింగ్ గ్లోబల్ సమ్మిట్ నిర్వహణను ప్రభుత్వం అత్యంత ప్రతిష్టాత్మకంగా తీసుకుంది.

ALSO READ: Mahesh Kumar Goud: డీఎస్ నా రాజకీయ గురువు.. మహేష్ కుమార్ గౌడ్ కీలక వ్యాఖ్యలు