Vasant Panchami: జ్ఞాన సరస్వతి ఆలయానికి పోటెత్తిన భక్తులు.. వసంత పంచమి వేడుకలతో పులకించిన బాసర!

Vasant Panchami: బాసరలో కన్నులపండువగా వసంత పంచమి వేడుకలు.. చదువుల తల్లి కొలువుదీరిన నిర్మల్ జిల్లాలోని బాసర పుణ్యక్షేత్రం వసంత పంచమి సందర్భంగా భక్తుల కోలాహలంతో కిక్కిరిసిపోయింది. మాఘ శుద్ధ పంచమిని పురస్కరించుకుని శుక్రవారం తెల్లవారుజాము నుంచే గోదావరి నది తీరంలోని ఈ క్షేత్రం ఆధ్యాత్మిక శోభను సంతరించుకుంది. తెలుగు రాష్ట్రాలతో పాటు మహారాష్ట్ర, కర్ణాటక వంటి పొరుగు రాష్ట్రాల నుండి సైతం వేలాది మంది భక్తులు తరలిరావడంతో ఆలయ పరిసరాలు ‘సరస్వతీ మాతా కీ జై’ అనే నినాదాలతో మారుమోగిపోతున్నాయి.

వసంత పంచమి మహోత్సవాన్ని పురస్కరించుకుని ఆలయ అర్చకులు అమ్మవారికి ప్రత్యేక పూజా కార్యక్రమాలు నిర్వహించారు. తెల్లవారుజామున 1:30 గంటలకే శ్రీ జ్ఞాన సరస్వతీ దేవి, మహాలక్ష్మి, మహాకాళి అమ్మవార్లకు శాస్త్రోక్తంగా అభిషేకాలు, సుప్రభాత సేవలు, మంగళవాయిద్య సేవలు పూర్తి చేశారు. ఈ పర్వదినం సందర్భంగా అమ్మవారిని వివిధ రకాల పుష్పాలతో సర్వాంగ సుందరంగా అలంకరించారు. జిల్లా కలెక్టర్ అభిలాష అభినవ్ వేకువజామునే ఆలయాన్ని సందర్శించి, అమ్మవారికి ప్రత్యేక పూజలు నిర్వహించి మొక్కులు చెల్లించుకున్నారు.

విద్యకు అధిదేవత అయిన సరస్వతీ దేవి సన్నిధిలో తమ పిల్లలకు అక్షరాభ్యాసం చేయించడం అత్యంత శుభప్రదమని భక్తుల నమ్మకం. ఈ క్రమంలోనే వేలాది మంది తల్లిదండ్రులు తమ చిన్నారులతో కలిసి బాసరకు తరలివచ్చారు. ఆలయ ప్రాంగణంలోని అక్షరాభ్యాస మండపాల్లో అర్చకులు చిన్నారుల చేత ‘ఓం’ కార రూపాన్ని దిద్దిస్తూ విద్యాభ్యాసాన్ని ప్రారంభించారు. ఈ అపురూప ఘట్టాన్ని కళ్లారా చూసేందుకు భక్తులు క్యూలైన్లలో గంటల తరబడి వేచి ఉన్నారు.

భారీగా తరలివచ్చిన భక్తులకు ఎటువంటి ఇబ్బందులు కలగకుండా ఆలయ ఈవో అంజనాదేవి ఆధ్వర్యంలో పకడ్బందీ ఏర్పాట్లు చేశారు. క్యూలైన్లలో వేచి ఉన్న భక్తులకు, ముఖ్యంగా చిన్నారులకు దేవస్థానం తరపున ఉచితంగా పాలు, బిస్కెట్లు పంపిణీ చేస్తున్నారు. ప్రస్తుతం రద్దీ దృష్ట్యా అమ్మవారి సర్వదర్శనానికి సుమారు మూడు గంటల సమయం పడుతోంది. భక్తుల రద్దీని క్రమబద్ధీకరించేందుకు సీఐ కిరణ్, ఎస్సై నవనీత్ రెడ్డి పర్యవేక్షణలో భారీ పోలీసు బందోబస్తును ఏర్పాటు చేశారు.

Also Read: తెలంగాణ మున్సిపల్ ఎన్నికలకు రంగం సిద్ధం.. ఏ క్షణమైనా షెడ్యూల్!

గోదావరి నదిలో పవిత్ర స్నానాలు ఆచరించిన అనంతరం భక్తులు వరుస క్రమంలో అమ్మవారిని దర్శించుకుంటున్నారు. వసంత పంచమి రోజున బాసరలో చేసే దానధర్మాలు, పూజలు విశేష ఫలితాలను ఇస్తాయని పురాణాలు చెబుతున్నాయి. ఆలయ పరిసరాల్లో ట్రాఫిక్ సమస్యలు తలెత్తకుండా పార్కింగ్ ఏర్పాట్లు చేయడంతో పాటు, ఎండ తీవ్రతను దృష్టిలో ఉంచుకుని భక్తుల కోసం నీడ సౌకర్యాలను కూడా అధికారులు కల్పించారు.

Vasantha Panchami 2026 : బాసర సరస్వతి ఆలయానికి పోటెత్తిన భక్తులు – TV9 #VasanthaPanchami #BasaraTemple #SaraswathiPuja #TeluguStates #TV9Telugu #Aksharabhyasam pic.twitter.com/G8Tvcz6awV

— TV9 Telugu (@TV9Telugu) January 23, 2026