Cyber Simba: వాట్సాప్ గ్రూపుల్లో కేవలం గుడ్ మార్నింగ్ మెసేజ్‌లే కాదు.. సైబర్ అవగాహన పెంచండి: సీపీ సజ్జనార్

Cyber Simba: హైదరాబాద్ నగరాన్ని సైబర్ నేరరహిత నగరంగా మార్చే లక్ష్యంతో పోలీస్ శాఖ ‘సైబర్ సింబా’ (Cyber Simba) పేరుతో ఒక వినూత్న కార్యక్రమానికి శ్రీకారం చుట్టింది. బంజారాహిల్స్‌లోని ఐసీసీసీ (ICCC) వేదికగా జరిగిన ఈ కార్యక్రమంలో పోలీస్ కమిషనర్ సజ్జనార్ పాల్గొని వాలంటీర్లకు దిశానిర్దేశం చేశారు. ‘జాగృత్ హైదరాబాద్ – సురక్షిత్ హైదరాబాద్’ ప్రచారంలో భాగంగా ప్రజల్లో ఆన్‌లైన్ మోసాలపై అవగాహన కల్పించడమే ఈ ప్రాజెక్టు ముఖ్య ఉద్దేశం. ఈ క్రమంలో పోలీసులతో కలిసి పనిచేసేందుకు ముందుకు వచ్చిన స్వచ్ఛంద సేవకులను ‘సైబర్ సింబా’ బృందంగా పిలుస్తారు.

గత నాలుగు నెలల్లో హైదరాబాద్ కమిషనరేట్ పరిధిలో 1,717 మంది వాలంటీర్లుగా నమోదు చేసుకోవడం విశేషం. వీరికి సైబర్ సేఫ్టీ అలాగే ఆన్‌లైన్ మోసాల గుర్తింపుపై పోలీస్ శాఖ ప్రత్యేక శిక్షణ ఇచ్చింది. శిక్షణ పొందిన ఈ వాలంటీర్లు తమ ప్రాంతాల్లో ప్రజలను చైతన్యపరుస్తారు. ముఖ్యంగా గోల్డెన్ అవర్ ప్రాముఖ్యత గురించి వివరిస్తారు. డిజిటల్ అరెస్ట్ పేరుతో జరిగే మోసాలు అలాగే ట్రేడింగ్ ఇన్వెస్ట్మెంట్ నేరాల పట్ల ప్రజలు ఎలా అప్రమత్తంగా ఉండాలో వీరు అవగాహన కల్పిస్తారు. రోజురోజుకూ పెరుగుతున్న సైబర్ నేరాలను అరికట్టడంలో వాలంటీర్ల పాత్ర కీలకమని సీపీ స్పష్టం చేశారు.

సోషల్ మీడియా వినియోగంపై సీపీ సజ్జనార్ ఆసక్తికర వ్యాఖ్యలు చేశారు. వాట్సాప్ గ్రూపుల్లో కేవలం గుడ్ మార్నింగ్ అలాగే గుడ్ నైట్ మెసేజ్‌లకే పరిమితం కాకుండా సైబర్ నేరాల అవగాహన సందేశాలను షేర్ చేయాలని సూచించారు. సమాజానికి దేశానికి మేలు చేసే విధంగా వాలంటీర్లు తమ వంతు బాధ్యతను నిర్వర్తించాలని కోరారు. యువతులు మహిళలను టార్గెట్ చేస్తూ అపరిచితులు చేసే మాయమాటల పట్ల అప్రమత్తంగా ఉండాలని హెచ్చరించారు. సోషల్ మీడియాలో ఎవరిని పడితే వారిని నమ్మి ఆర్థికంగా నష్టపోవద్దని హితవు పలికారు.

కేటుగాళ్లు మాయమాటలు చెప్పి లక్షల కోట్లు దోచుకుంటున్న ఈ కాలంలో ప్రతి ఒక్కరూ సైబర్ యోధులుగా మారాలని పిలుపునిచ్చారు. ట్రేడింగ్ పేరుతో వచ్చే లింకులను క్లిక్ చేయవద్దని అలాగే అధిక లాభాల ఆశ చూపే పెట్టుబడి పథకాలకు దూరంగా ఉండాలని సూచించారు. సైబర్ సింబా కార్యక్రమం దేశవ్యాప్తంగా విస్తరించాల్సిన అవసరం ఉందని ఆయన అభిప్రాయపడ్డారు. మెరుగైన సమాజ నిర్మాణంలో భాగస్వామ్యం అవుతున్న వాలంటీర్లను ఈ సందర్భంగా ఆయన ప్రత్యేకంగా అభినందించారు. అందరూ కలిసి కృషి చేస్తేనే హైదరాబాద్‌ను సైబర్ క్రైమ్ రహిత నగరంగా తీర్చిదిద్దగలమని ఆయన ధీమా వ్యక్తం చేశారు.

Read Also:  దివాలా కంపెనీకి రూ. 2,500 కోట్ల పనులు.. అమిత్ షాకు కేటీఆర్ సంచలన లేఖ

Share

• 
• 
• 
• 
• 
•