Fake Police Notice: షీ టీమ్స్ పోలీసులకే షాకిచ్చింది ఓ యువతి. తన మాజీ ప్రియునికి షీ టీమ్స్ పేరిట నోటీస్ పంపించింది. అనుమానం వచ్చిన బాధితుడు ఈ విషయాన్ని షీ టీమ్స్ దృష్టికి తీసుకెళ్లగా.. వారు సైఫాబాద్ పోలీసులకు ఫిర్యాదు చేశారు.
హైదరాబాద్ కు చెందిన ఓ యువకునికి గతంలో ఓ యువతితో కొంతకాలంపాటు ప్రేమ వ్యవహారం నడిచింది. అయితే వ్యక్తిగత కారణాలతో కొన్నిరోజుల క్రితం ఇద్దరు విడిపోయారు. కాగా మాజీ ప్రియునిపై కక్ష పెంచుకున్న సదరు యువతి.. ఎలాగైనా పగ తీర్చుకోవాలని నిర్ణయించుకుంది. ఈ క్రమంలో షీ టీమ్స్ అధికారులు జారీ చేసినట్టుగా ఓ నకిలీ నోటీసును మాజీ ప్రియునికి పంపించింది. దీనిపై అనుమానం రావటంతో బాధితుడు వెంటనే షీ టీమ్స్ పోలీసుల వద్దకు వెళ్లాడు. తనకు వచ్చిన నోటీసును చూపించాడు.
Also Read: సాగర్ జలాల దోపిడీపై మౌనమెందుకు? నిఘా వ్యవస్థ ఏం చేస్తోంది? కాంగ్రెస్పై కవిత ఫైర్!
ఆ ఫేక్ నోటీసును చూసి షీ టీమ్స్ పోలీసులు షాక్ అయ్యారు. పోలీసుల పేరును, అధికారిక వ్యవస్థలను దుర్వినియోగం చేస్తూ వ్యక్తిగత కక్షల కోసం వాడుకోవడాన్ని తీవ్రమైన నేరంగా పరిగణించి సైఫాబాద్ పోలీసులకు ఫిర్యాదు చేశారు. ఈ మేరకు కేసు నమోదు చేసిన సైఫాబాద్ పోలీసులు విచారణ చేస్తున్నారు. నోటీసును ఎలా తయారు చేశారు? దానిని తయారు చేసేందుకు సహకరించిన యువతి స్నేహితుడి పాత్రపై ఆరా తీస్తున్నారు. పోలీసుల పేరుతో నకిలీ పత్రాలు సృష్టిస్తే కఠిన చర్యలు తప్పవని ఈ సందర్భంగా అధికారులు హెచ్చరించారు.
Also Read: కర్ణాటకలో చెట్టును ఢీకొన్న కారు.. ఇద్దరు యువతుల మృతి, నలుగురికి తీవ్ర గాయాలు