భాగ్యనగరంలోని ప్రభుత్వ భూములు, చెరువులు, కుంటలు, పార్కుల పరిరక్షణే ధ్యేయంగా పనిచేస్తున్న హైడ్రా, సామాన్య ప్రజలకు మరింత చేరువయ్యేందుకు మరో వినూత్న నిర్ణయం తీసుకుంది. ఇప్పటికే ప్రతి సోమవారం నిర్వహిస్తున్న ‘ప్రజావాణి’ కార్యక్రమానికి విశేష స్పందన లభిస్తుండటంతో, ఇప్పుడు ఫోన్ కాల్ ద్వారా ఫిర్యాదులను స్వీకరించే ‘ఫోన్-ఇన్’ కార్యక్రమానికి శ్రీకారం చుట్టింది. ఈ మేరకు హైడ్రా కమిషనర్ రంగనాథ్ కీలక ఆదేశాలు జారీ చేశారు.
ఇకపై ప్రతి శనివారం మధ్యాహ్నం 12 గంటల నుండి ఒంటి గంట వరకు ప్రజలు నేరుగా ఫోన్ ద్వారా అధికారులతో మాట్లాడి తమ సమస్యలను విన్నవించుకోవచ్చు. సెలవు దినాల్లో మినహా, ప్రతి శనివారం ఈ కార్యక్రమం నిరంతరాయంగా కొనసాగుతుందని కమిషనర్ స్పష్టం చేశారు. అవుటర్ రింగ్ రోడ్డు (ORR) పరిధిలో ఉన్న నగర ప్రజలు ఎవరైనా 040-29565750, 040-29565759 అనే రెండు నంబర్లకు ఫోన్ చేసి ఫిర్యాదులు చేయవచ్చు.
ప్రధానంగా నగరంలోని చెరువులు, కుంటల ఆక్రమణలు, పార్కుల కబ్జాలు, రహదారుల ఆక్రమణలు మరియు ప్రజా అవసరాల కోసం కేటాయించిన స్థలాల్లో జరుగుతున్న అక్రమ నిర్మాణాలపై ప్రజలు గళమెత్తవచ్చు. అంతేకాకుండా.. చెరువుల్లో యథేచ్ఛగా మట్టి పోయడం (Fencing/Filling) వంటి పర్యావరణ విధ్వంసక చర్యలపై కూడా ఫిర్యాదులు స్వీకరించనున్నారు. ప్రజల నుంచి వచ్చే ప్రతి ఫిర్యాదును నమోదు చేసుకుని, సంబంధిత విభాగాల ద్వారా త్వరితగతిన విచారణ జరిపి చర్యలు చేపడతామని హైడ్రా భరోసా ఇస్తోంది.
మరో కీలక విషయం ఏమిటంటే.. గతంలో ప్రజావాణి ద్వారా లేదా ఇతర మార్గాల్లో ఫిర్యాదు చేసినా, వాటిపై ఇప్పటికీ పరిష్కారం లభించని పక్షంలో.. బాధితులు ఈ ఫోన్-ఇన్ కార్యక్రమంలో ఆ ఫిర్యాదుల స్థితిగతులను అడిగి తెలుసుకోవచ్చు. తమ ఫిర్యాదు ఎందుకు పెండింగ్లో ఉంది? ప్రస్తుతం ఏ దశలో ఉంది? అనే అంశాలపై కమిషనర్ నేరుగా వివరణ ఇచ్చే అవకాశం ఉంది.
నగర జీవన ప్రమాణాలను మెరుగుపరిచేందుకు, సహజ వనరులను కాపాడేందుకు ప్రజల భాగస్వామ్యం అత్యంత అవసరమని హైడ్రా భావిస్తోంది. ఆక్రమణల చెరలో ఉన్న భూములను విడిపించడంలో ప్రజలు ఇచ్చే సమాచారం కీలక పాత్ర పోషిస్తుంది. ఈ క్రమంలోనే, కార్యాలయాల చుట్టూ తిరిగే శ్రమను తగ్గించి, ఒక్క ఫోన్ కాల్తో వ్యవస్థను కదిలించేలా ఈ నిర్ణయం తీసుకున్నట్లు తెలుస్తోంది. ఇకపై బాధ్యతాయుతమైన పౌరులుగా ఎక్కడ అక్రమ కట్టడాలు కనిపించినా, తక్షణమే హైడ్రా కమిషనర్ దృష్టికి తీసుకురావాలని అధికారులు కోరుతున్నారు.
Share
Minister Ponguleti: కల్లూరు గడ్డపై 'గులాబీ' గూండాయిజం సాగనివ్వం.. మంత్రి పొంగులేటి ఫైర్..!
Family Drama OTT : శరీరాలను మార్చే ఆత్మలు... గందరగోళంలో పడే ఫ్యామిలీ... మనసుకు హత్తుకునే క్లైమాక్స్
