Janasena: తెలంగాణ‌పై ప‌వ‌న్ క‌ళ్యాణ్ ఫోక‌స్.. జనసేన బలోపేతం దిశగా మరో అడుగు!

Janasena: తెలంగాణ రాష్ట్రంలో జనసేన పార్టీని క్షేత్రస్థాయిలో బలోపేతం చేసేందుకు పార్టీ అధినేత పవన్ కళ్యాణ్ కీలక నిర్ణయం తీసుకున్నారు. ఇందులో భాగంగా “తెలంగాణ రాష్ట్ర జనసేన ఉద్మమి సభ్యత్వ నమోదు కార్యక్రమం” కోసం ప్రత్యేక కమిటీలను ఏర్పాటు చేస్తూ పార్టీ కేంద్ర కార్యాలయం ప్రకటన విడుదల చేసింది. ఈ నెల 26వ తేదీ నుండి దేశవ్యాప్తంగా సభ్యత్వ నమోదు కార్యక్రమాన్ని ప్రారంభించాలని పార్టీ నిర్ణయించిన నేపథ్యంలో, తెలంగాణలో ఈ ప్రక్రియను విజయవంతం చేయడానికి జిల్లాల వారీగా, గ్రేటర్ పరిధిలోని కార్పొరేషన్లకు ఇన్ఛార్జులను నియమించారు.

పార్టీ కార్యకర్తలు, నాయకులు సమన్వయంతో పనిచేసి, తమకు కేటాయించిన ప్రాంతాల్లో సభ్యత్వ నమోదు కార్యక్రమాన్ని విజయవంతం చేయాలని పార్టీ కేంద్ర కార్యాలయం కోరింది. గ్రేటర్ పరిధిలో నూతనంగా విభజించబడిన కార్పొరేషన్లపై ప్రత్యేక దృష్టి సారించాలని సూచించింది.

రాష్ట్ర స్థాయిలో ఈ కార్యక్రమాన్ని పర్యవేక్షించే బాధ్యతను పార్టీ ఉపాధ్యక్షులు బోంగునూరి మహేందర్ రెడ్డి, తెలంగాణ రాష్ట్ర ఇన్ఛార్జ్ నేమూరి శంకర్ గౌడ్, పార్టీ సీనియర్ నాయకులు రాధారం రాజలింగం, శ్రీమతి కావ్య మండపాక మరియు శ్రీమతి శిరీష పొన్నూరులకు అప్పగించారు. వీరు రాష్ట్రవ్యాప్తంగా సభ్యత్వ నమోదు ప్రక్రియను పర్యవేక్షిస్తూ, కింది స్థాయి నాయకులకు దిశానిర్దేశం చేస్తారు. పార్టీని సంస్థాగతంగా పటిష్టం చేయడమే లక్ష్యంగా ఈ కమిటీలు పనిచేయనున్నాయి.