కరీంనగర్ జ్యువెలరీ షాప్ ఘటన.. ఇది మామూలు ప్లాన్ కాదు, కేంద్ర మంత్రి బండి సంజయ్ ఏమన్నారంటే?

కరీంనగర్ నగరంలో ఆదివారం నాడు అత్యంత సాహసోపేతమైన సంచలన దోపిడీ చోటుచేసుకుంది. పట్టపగలు నగర నడిబొడ్డున ఉన్న పీఎంజే జ్యువెలరీ షాపులోకి చొరబడ్డ దుండగులు తుపాకులతో హల్చల్ చేశారు. అడ్డుకోబోయిన సిబ్బందిపై విచక్షణారహితంగా కాల్పులు జరిపి భారీ మొత్తంలో బంగారు ఆభరణాలతో ఉడాయించారు. ఈ ఘోర దురాగతం స్థానికంగా తీవ్ర భయాందోళనలకు గురిచేసింది. ఘటన గురించి సమాచారం అందిన వెంటనే కేంద్రమంత్రి బండి సంజయ్ కుమార్ హుటాహుటిన జ్యువెలరీ షాపునకు చేరుకున్నారు. అక్కడ జరిగిన పరిస్థితిని క్షుణ్ణంగా సమీక్షించి బాధితులకు భరోసా కల్పించారు.

దోపిడీ తీరును పరిశీలించిన బండి సంజయ్ ఇది పక్కా పథకం ప్రకారం జరిగిన నేరమని అభిప్రాయపడ్డారు. దుండగులు తుపాకులతో ప్రాణహాని తలపెడుతున్నా వెనకాడకుండా ఎదురుతిరిగిన షాపు సిబ్బంది సాహసాన్ని ఆయన ప్రత్యేకంగా అభినందించారు. ఈ కాల్పుల్లో ముగ్గురు సిబ్బందికి గాయాలయ్యాయని.. ప్రస్తుతం వారు ఆసుపత్రిలో చికిత్స పొందుతున్నారని తెలిపారు. వారికి ప్రాణాపాయం లేదని వైద్యులు ధృవీకరించినట్లు పేర్కొన్నారు. మెరుగైన వైద్య సాయం కోసం అవసరమైన వారిని వెంటనే హైదరాబాద్ తరలిస్తున్నట్లు వెల్లడించారు. నిందితులు తెలుగుతో పాటు హిందీ భాషలో మాట్లాడుతున్నట్లు ప్రాథమిక విచారణలో తేలిందన్నారు. పోలీసులు గాలింపు చర్యలు ముమ్మరం చేశారని.. నేరస్థులు త్వరలోనే పట్టుబడతారన్న ధీమాను ఆయన వ్యక్తం చేశారు.

అసలు ఏం జరిగిందనే వివరాల్లోకి వెళ్తే.. ఆదివారం ఉదయం 11 గంటల సమయంలో ఐదుగురు దుండగులు కస్టమర్ల ముసుగులో షాపులోకి ప్రవేశించారు. నగలు కొనుగోలు చేసే వారిలా నటించి సిబ్బందిని ఆభరణాలు చూపమని అడిగారు. పనిలో నిమగ్నమైన సిబ్బందిని ఒక్కసారిగా తుపాకులతో బెదిరించి తమ ఆధీనంలోకి తీసుకున్నారు. ప్రతిఘటించిన వారిపై కాల్పులు జరిపి షాపులోని విలువైన బంగారాన్ని దోచుకున్నారు. దుండగులు ప్రయోగించిన బుల్లెట్లు తగలడంతో ముగ్గురు ఉద్యోగులు తీవ్రంగా గాయపడి రక్తపు మడుగులో పడిపోయారు. దోపిడీ అనంతరం నిందితులు అక్కడి నుంచి పరారయ్యారు.

ఘటనపై సమాచారం అందగానే కరీంనగర్ సీపీ గౌస్ ఆలం ఆధ్వర్యంలో పోలీసు బలగాలు రంగంలోకి దిగాయి. క్లూస్ టీమ్ సభ్యులు షాపు లోపల వెలుపల క్షుణ్ణంగా తనిఖీ చేసి కీలక ఆధారాలు సేకరించారు. జ్యువెలరీ షాపు సమీపంలోని డ్రైనేజీ కాలువలో దుండగులు వదిలివెళ్లిన కత్తెర.. ప్లాస్టర్.. తుపాకీ మ్యాగ్జిన్‌ను పోలీసులు స్వాధీనం చేసుకున్నారు. ఘటనా స్థలంలో పడి ఉన్న బుల్లెట్ కోశాలను కూడా సేకరించారు. నిందితుల కదలికలను గుర్తించేందుకు షాపులోని సీసీటీవీ ఫుటేజీలను పోలీసులు నిశితంగా పరిశీలిస్తున్నారు.

ఈ భారీ దోపిడీతో కరీంనగర్ నగరం ఒక్కసారిగా ఉలిక్కిపడింది. నిత్యం రద్దీగా ఉండే ప్రాంతంలో ఇంత పెద్ద సాహసానికి దుండగులు పాల్పడటం గమనార్హం. నగర సరిహద్దులను అష్టదిగ్బంధనం చేసిన పోలీసులు తనిఖీలు ముమ్మరం చేశారు. శాంతిభద్రతల పరిరక్షణ విషయంలో రాజీ పడేది లేదని.. దోషులను కఠినంగా శిక్షిస్తామని బండి సంజయ్ హెచ్చరించారు. బాధితులకు ప్రభుత్వం అండగా ఉంటుందని హామీ ఇచ్చారు. ఈ కేసును త్వరగా ఛేదించి ప్రజల్లో నెలకొన్న భయాన్ని పోగొట్టాలని పోలీసు అధికారులను ఆదేశించారు.

ALSO READ: AP Results: దేశ చరిత్రలోనే ఫస్ట్ టైమ్.. ఏపీ ప్రభుత్వం తీసుకున్న ఈ నిర్ణయం చూశారా?