KCR : తెలంగాణ సీఎం కేసీఆర్ తన పోటీపై ట్విస్ట్ ఇచ్చారు. కేసీఆర్ రెండు స్థానాల నుంచి బరిలోకి దిగనున్నారు. గజ్వేల్ తోపాటు కామారెడ్డి నుంచి వచ్చే ఎన్నికల్లో పోటీ చేయనున్నారు. బీఆర్ఎస్ ఎమ్మెల్యే అభ్యర్థుల తొలి జాబితాను విడుదల చేసిన కేసీఆర్ తాను రెండు చోట్ల పోటీ చేస్తానని ప్రకటించారు.
వచ్చే ఎన్నికల్లో కేసీఆర్ గజ్వేల్ నుంచి పోటీ చేయరని విస్తృతంగా ప్రచారం జరిగింది. ఆయన పోటీ చేసే స్థానంపై రకరకాల ఊహాగానాలు వెలువడ్డాయి. పెద్దపల్లి, కామారెడ్డి ఇలా చాలా పేర్లు వినిపించాయి. చివరికి కామారెడ్డినే కేసీఆర్ ఎంచుకున్నారు. ప్రస్తుతం కామారెడ్డి నుంచి గంప గోవర్ధన్ ప్రాతినిత్యం వహిస్తున్నారు. కేసీఆర్ పోటీకి సిద్ధంకావడంతో గంప గోవర్ధన్ కు టిక్కెట్ దక్కలేదు.
గంప గోవర్ధన్ కామారెడ్డి నుంచి 4 సార్లు ఎమ్మెల్యేగా గెలిచారు. 1994లో టీడీపీ నుంచి పోటీ చేసి తొలిసారి ఎమ్మెల్యే అయ్యారు. ఆ తర్వాత 2009 రెండో టీడీపీ నుంచే గెలిచారు. 2014, 2018 ఎన్నికల్లో బీఆర్ఎస్ నుంచి బరిలోకి దిగి విజయం సాధించారు. అలాంటి నేతను పక్కకు తప్పించి కేసీఆర్ పోటీకి దిగనుండటం ఆసక్తి రేపుతోంది.
ప్రస్తుతం కేసీఆర్ గజ్వేల్ నుంచి ప్రాతినిత్యం వహిస్తున్నారు. అక్కడ ఈసారి గట్టి పోటీ ఎదురవుతుందనే అంచనాలున్నాయి. బీజేపీ నుంచి ఈటల రాజేందర్ తాను పోటీలో ఉంటానని ప్రకటించి కేసీఆర్ లో టెన్షన్ పెంచారు. ఈ నేపథ్యంలో కేసీఆర్ కామారెడ్డి నుంచి బరిలోకి దిగుతున్నారని టాక్. కేసీఆర్ కు కామారెడ్డిలో కాంగ్రెస్ నుంచి గట్టి పోటీ ఎదురుకానుంది. కామారెడ్డిలో కాంగ్రెస్ అభ్యర్థిగా షబ్బీర్ అలీ బరిలో ఉంటారు. ఆయన 1989, 2004లో అక్కడ నుంచి ఎమ్మెల్యేగా ఎన్నికయ్యారు.
కేసీఆర్ 2014లో తొలిసారిగా గజ్వేల్ నుంచి పోటీ చేశారు. ఆ ఎన్నికల్లో దాదాపు 19 వేల మెజార్టీతో విజయం సాధించారు. 2014లో టీడీపీ అభ్యర్థి వంటేరు ప్రతాప్ రెడ్డి గట్టి పోటీ ఇచ్చారు. 2018 ఎన్నికల్లోనూ అక్కడ నుంచే కేసీఆర్ బరిలోకి దిగారు. ఈసారి కాంగ్రెస్ నుంచి వంటేరు ప్రతాప్ రెడ్డి పోటీ చేశారు. 2018లో కేసీఆర్ దాదాపు 58 వేల మెజార్టీతో గెలిచారు. కానీ ఈసారి విజయంపై అనుమానం కలగడంతో ఓటమి భయం పట్టుకుని కేసీఆర్ గజ్వేల్ తోపాటు కామారెడ్డి నుంచి కూడా పోటీ చేయబోతున్నారని రాజకీయ విశ్లేషకుల మాట.
Share
BRS: రాజయ్యకు అలా.. చిన్నయ్యకు ఇలా.. ఎందుకలా?
Paleru: షర్మిల ప్రత్యర్థి ఫిక్స్.. తుమ్మలకు హ్యాండ్.. ఇక కాస్కో..
