Hyderabad City: దేశవ్యాప్తంగా ‘సర్’ వ్యవహారంపై చర్చ తీవ్రమవుతోంది. ఇదే సమయంలో తెలంగాణలో అధికార కాంగ్రెస్-విపక్ష బీజేపీ మధ్య మాటల యుద్ధం ముదిరింది. తాజాగా బీజేపీ రాష్ట్ర అధ్యక్షుడు రామచంద్రరావుకు మంత్రి పొన్నం ప్రభాకర్ సవాల్ విసిరారు. ఓటు హక్కు కోల్పోయిన వారందరినీ తీసుకొస్తానని, తేదీ-సమయం చెప్పాలని డిమాండ్ చేశారు.
ఆదివారం మీడియాతో మాట్లాడిన మంత్రి పొన్న ప్రభాకర్.. సర్ వ్యవహారంపై బీజేపీ నేతల మాటలపై మండిపడ్డారు. ఓటు హక్కు కోల్పోయిన వారందరినీ తీసుకొస్తానని, తేదీ-సమయం చెప్పాలన్నారు. దీంతో ఎస్సీ, ఎస్టీ, బీసీ, మైనార్టీల ఓట్ల తొలగింపుపై కూడా సమాధానం చెప్పాలన్నారు. ఓటు బచావో-దేశ్ బచావో- ప్రజాస్వామ్యాన్ని, రాజ్యాంగాన్ని కాపాడుకుందామని అన్నారు. తెలంగాణ బీజేపీ చీఫ్ రాంచందర్‌రావు చేసిన వ్యాఖ్యలపై మండిపడ్డారు. ఓటర్ల జాబితా సవరణలో ఏమైనా తప్పులు జరిగితే వాటిని సరిదిద్దుకుందామని, అర్హులైన ప్రతి ఒక్కరి ఓటు హక్కును కాపాడేందుకు బీజేపీ కార్యకర్తలు భాగస్వాములు కావాలని పిలుపునిస్తే ప్రజాస్వామ్యానికి మేలు జరిగేదన్నారు. ఓటర్ల జాబితా సవరణపై జరుగుతున్న ఆందోళనలను తప్పుబట్టడం మంచిది కాదన్నారు.
ఓటు హక్కు కోల్పోయిన వారు ఎవరైనా ఉన్నారా అని ఆయన ప్రశ్నించడం సరికాదన్నారు మంత్రి. ఆందోళన చేస్తున్నవారిని పోలీసుల చేత అరెస్టులు చేయించడం తగదన్నారు. ఓటు హక్కు కోల్పోయామని ఆందోళన చెందుతున్న బాధితులను మీ ముందుకు తీసుకొస్తానన్నారు. మా సవాల్‌ను స్వీకరించి తేదీ, సమయం నిర్ణయించాలన్నారు. ఎన్నికల సంఘం రికార్డులను పరిశీలించి, అర్హులైన ప్రతి ఒక్కరి ఓటు హక్కును కాపాడేందుకు చర్యలు తీసుకోవాలని డిమాండ్ చేశారు. ఓటర్ల జాబితాలో జరిగిన తొలగింపులపై ఎన్నికల రికార్డులను పరిశీలించి వాస్తవాలను ప్రజలకు వివరించాలన్నారు. నా ఓటుతోపాటు తండ్రి పేరులో వ్యత్యాసాలను సాకుగా చూపి ఓటు తొలగించే ప్రయత్నం జరిగిందన్నారు.
ALSO READ: ఎల్లంపేట్ మున్సిపాలిటీలో పడకేసిన పారిశుధ్యం.. పట్టించుకోని అధికారులు
అర్హులైన వారి ఓట్లను తొలగిస్తే వాటిపై సమాధానం చెప్పాల్సిన బాధ్యత సంబంధిత అధికారులు, ఎన్నికల వ్యవస్థపై ఉందన్నారు మంత్రి పొన్నం. దేశ వ్యాప్తంగా 13 కోట్ల ఓట్లు పోయాయని, హైదరాబాద్ లో 40 లక్షల మంది తమ తమ ఓటు హక్కు కోల్పోయారని మండిపడ్డారు. తెలంగాణ వ్యాప్తంగా 70 లక్షల ఓట్లు సవరణ పేరుతో తొలగిపోయాయని ఆందోళన వ్యక్తం చేశారు. ఎన్ని ఓట్లు తొలగించారు? వాటిలో అనర్హులైనవారి ఓట్లు ఎన్ని? అర్హులైనవారి ఓట్లు పొరపాటున తొలగించబడ్డాయా? అనే అంశాలపై స్పష్టమైన వివరాలు వెల్లడించాలన్నారు.
బీజేపీకి వ్యతిరేకంగా ఉండే ఎస్సీ, ఎస్టీ, బీసీ, మైనార్టీ వర్గాలకు చెందిన ఓట్లు తొలగించారని విమర్శించారు. 80 ఏళ్ల స్వతంత్ర భారతదేశంలో ప్రజలు తమ ఓటు హక్కును కాపాడుకోవడానికి పోరాడాల్సిన పరిస్థితి ఏర్పడటం ఆందోళనకరమన్నారు. ప్రజాస్వామ్య హక్కుల పరిరక్షణ కోసం ఉద్యమించాల్సిన అవసరం ఏర్పడిందన్నారు.
Share
ఎల్లంపేట్ మున్సిపాలిటీలో పడకేసిన పారిశుధ్యం.. పట్టించుకోని అధికారులు
బోటీ కూర అంటే ఇష్టముండదా? చింతచిగురుతో ఇలా చేస్తే ప్లేట్లు నాకేస్తారు!
